ƐLĀ Ō NWU ƆMƐ 15
Ɔnyɛ Wɛ Ujisɔsi A?
Ujisɔsi wɛ ɔcɛ nōo loofu fiyɛ duu ipu ɔ̄kā ku alɛɛcɛ a. Naana a, ācɛ alɛwa jé iye nu amáŋ é jé ɔdā alɛwa lɛyikwu ɔ ŋ. Ācɛ ɔhá gē kɛla ɛyɛɛyɛyi lɛyikwu ɔcɛ nɛ Ujisɔsi wɛ a. Ɔdi nɛ Ubáyíbu ka lɛyikwu ɔ a?
1. Ɔnyɛ nɛ Ujisɔsi wɛ?
Ujisɔsi lā ɔkpanco, ó wɛ alelekwu otɛhɔ nōo lɔfu nɛhi. Anu nɛ Ujehofa ya aflɛyi ɛɛ nɛ ó gbɔɔ ō ya aɔdā ohile a. Ohigbu ɛnyā, anu “kē wɛ aflɛ́yí . . . [ku] ɔdā dóódu nēe yá ā.” (Ācɛ Ukólōsi 1:15) Ubáyíbu ka Ujisɔsi ɔ wɛ “Ɔyínɔ̄nyīlɔ ékpónú” ku Ɔwɔico, ohigbu ka anu foofunu nɛ Ujehofa bi abɔ ku nu le ya a. (Ujɔ́ni 3:16) Ujisɔsi yuklɔ tɔha mla Adā nu nōo wɛ Ujehofa a kéē ya ɛjɛɛji aɔdā ohile a. (Jé Aíita 8:30.) Ujisɔsi gɔbu yɔ i jɔɔnyɛ ɛma ku anu mla Ujehofa. Ó gē lɛyitaajɛ klla gē kɛla kwɛyi Ɔwɔico. Anu nɛ Ubáyíbu hi ka “Ɛlā ā” gē ka olɛhɔ mɛmla aukɔ́ ku Ɔwɔico tɛɛcɛ.—Ujɔ́ni 1:14.
2. Ɔdiya nɛ Ujisɔsi wa ɛcɛ nyā a?
Bɛɛka ihayi ula ɛhɔ (2,000) nōo gā yɛ a, Ujehofa bi alelekwu ihɔ kwu oyeeyi ku Ujisɔsi u ŋma ɔkpanco gā ɔgɔɔma ku Umeri ɔwɛ ohidaago. Ɔwɛ ɛgɛnyā, é lɛ Ujisɔsi ma ɔcɛ ɔlamu. (Jé Ulúku 1:34, 35.) Ujehofa tu Ujisɔsi ɛhɔ wa ipu ɛcɛ nyā ka ó wɛ Umɛsayiya amāŋ Ukraist néē cokonu nu a, kóō klla lɛ alɛɛcɛ hɛta. a Ɛjɛɛji aakacɛ ku ipu Ubáyíbu lɛyikwu Umɛsayiya a le ya jila ikpɛyi ku Ujisɔsi, ɛnyā cɛ lɛ ācɛ jé ku Ujisɔsi wɛ “Ɔyínɔ̄nyīlɔ kú Ɔwɔicō nōo yēeyi ā á.”—Umátiyu 16:16.
3. Imi nɛ Ujisɔsi yɔ babanya a?
Igbihi nɛ Ujisɔsi gekwu a, Ɔwɔico kwu Ujisɔsi i heyi ŋma ɔlekwu gáā kwu ɔ u piya alelekwu otɛhɔ, anu ó kwu cigbihi gā ɔkpanco a. Abɔɔ a, “Ɔwɔicō kwú ɔ̄ ú gicō ga ɛga ojīlīmā nōo fíyɛ́ dúú.” (Ācɛ Ufílipāyi 2:9) Babanya, Ujisɔsi wɛ alelekwu otɛhɔ nōo lɔfu nɛhi. Ujehofa foofunu lɔfu fiyɛ ɔ a.
JÉ GƆBU
Jé odee lɛyikwu ɔcɛ nɛ Ujisɔsi wɛ a mla ɔdā nōo ya ɛɛ nōó kē cɛgbá ō jé odee lɛyikwu ɔ a.
4. Ujisɔsi i wɛ Ɔwɔico ŋ
Naana nɛ Ubáyíbu ka ku Ujisɔsi wɛ alelekwu nōo lɔfu nɛhi ipu ɔkpanco a, ó gē lɛyitaajɛ lɛ Ɔwɔico Adā nu Ujehofa. Ɔdiya nɛ alɔ ka lɛ a? Lɛ UVIDIO nyā mafu, cɛɛ ku a má ɔdā nɛ Ubáyíbu nwu lɛyikwu ɛgɛ nɛ Ujisɔsi wɛ ɛyɛɛyi gwu Ɔwɔico nōo lɔfu fiyɛ duu a ta a.
Aɛga ku Ubáyíbu nōo ba nyā géē tu alɔ abɔ má ɛma nɛ Ujehofa lɛ mla Ujisɔsi a. Jé eyeeye ku Ubáyíbu a, cɛɛ ku aa kɔka lɛyikwu ɔka nyā:
Jé Ulúku 1:30-32.
-
Ɔdi nɛ alelekwu otɛhɔ a ka lɛyikwu ɛma ku Ujisɔsi mla Ɔwɔico Ujehofa “nōo lɔfú fíyɛ́ dúú ā”?
Jé Umátiyu 3:16, 17.
-
Eko nɛ Ujisɔsi ya ubatisim a, ɔdi nɛ ɔkɔ nōo kɛla ŋma ɔkpanco a ka a?
-
Ɔkɔ ku ɔnyɛ nɛ a gbɛla ka ó wɛ a?
Jé Ujɔ́ni 14:28.
-
Ɔnyɛ lé lɛ ɔmpa nu klla lɛ íkwu fiyɛ duu a? Adā nɛɛ kɛɛ ka ɔyi?
-
Ujisɔsi hi Ujehofa ka Adā nu. Ɔdi nɛ ɛnyā nwu alɔ a?
Jé Ujɔ́ni 12:49.
-
Ujisɔsi gbɛla ka anu mla Adā nu wɛ ɔcɛ ekponu nɛɛ? Ɔdi nɛ a gbɛla?
5. Ɔdi mafu ka Ujisɔsi wɛ Umɛsayiya a?
Ubáyíbu lɛ akacɛ alɛwa nōo géē tu ācɛ abɔ jé ɔcɛ nōo géē wɛ Umɛsayiya a nɛ Ɔwɔico fu ka ó nya alɛɛcɛ ta a. Lɛ UVIDIO nyā mafu nōo kɛla kpii lɛyikwu akacɛ ōhī nɛ Ujisɔsi ya jila eko nɛ ó wa ipu ɛcɛ nyā.
Jé aakacɛ néē ta ipu Ubáyíbu nyā, cɛɛ ku aa kɔka lɛyikwu aɔka nōo nōo ba nyā:
Jé Umáyíka 5:2 ku a jé ɛga néē ma Umɛsayiya a. b
-
Lɛyikwu ɛga néē ma Ujisɔsi a, akacɛ nyā le ya jila a?—Umátiyu 2:1.
Jé Aíjē Kú Ɛ̄gbā 34:20 mla Usakaríya 12:10 ku a jé ɔdā nɛ Ubáyíbu ka lɛyikwu ikwū ku Umɛsayiya a.
-
Aakacɛ nyā le ya jila?—Ujɔ́ni 19:33-37.
-
A gbɛla kóō tɔ̄ɔ̄tɛ ku Ujisɔsi kóō ya ku aakacɛ nyā kóō le ya jila a?
-
Ɔdi nɛ ɛnyā mafu gā uwɔ lɛyikwu Ujisɔsi a?
6. Alɔ gē lɛ itene ŋma ō nwu ɛlā lɛyikwu Ujisɔsi
Ubáyíbu ka ó cɛgbá nɛhi ku alɔ nwu ɛlā lɛyikwu Ujisɔsi mla ɔdā nɛ Ɔwɔico dɔka kóō ya a. Jé Ujɔ́ni 14:6 mla 17:3, cɛɛ ku aa kɔka lɛyikwu ɔka nyā:
-
Ɔdiya nōó cɛgbá ku alɔ nwu ɛlā lɛyikwu Ujisɔsi a?
Ujisɔsi lɛ ɔwɛ ō je piya ɔya ku Ɔwɔico ya tɔɔtɛ. Ó nwu ɔkwɛyi lɛyikwu Ujehofa. Alɔ klla lɛ oyeeyi opiyoo gla ohigbu nu
ĀCƐ ŌHĪ GĒ KA: “Ācɛ Ocijali Ku Ujehofa i kpɔtuce Ujisɔsi ŋ.”
-
Ohi nyá nɛ a géē cila a?
ƆDI NƐ A NWU A?
Ujisɔsi wɛ alelekwu otɛhɔ nōo lɔfu nɛhi. Ó wɛ Ɔyinɔnyilɔ ku Ɔwɔico klla wɛ Umɛsayiya.
Aɔka ō tu alɔ ɛlá kwu ɔdā nɛ alɔ nwu
-
Ɔdiya néē hi Ujisɔsi ka “aflɛ́yí . . . [ku] ɔdā dóódu nēe yá ā”?
-
Ɔdi nɛ Ujisɔsi ya gbɔbu ɛɛ nɛ ó wa ipu ɛcɛ nyā a?
-
Ɛgɛnyá nɛ alɔ jé ka Ujisɔsi wɛ Umɛsayiya a?
JILA ƐLĀ NYĀ MÁ TŌŌTƆ̄Ɔ̄
Jé gɔbu lɛyikwu ɔdā nōo ya ɛɛ nɛ alɔ kpɔtuce ka Ujisɔsi wɛ Umɛsayiya.
“Aakacɛ Lɛyikwu Umɛsayiya A Mafu Ka Ujisɔsi Wɛ Umɛsayiya A?” (Web article)
Jila ɛlā má ɔdaŋ ka Ubáyíbu ka Ɔwɔico ɔ je piya adā Ujisɔsi ɔwɛ ekponu nɛ alɛɛcɛ gē je piya adā ku ɔyi a.
“Ɔdiya Néē Hi Ujisɔsi Ka Ɔyinɔnyiɔ Ku Ɔwɔico A?” (Web article)
Leyi yɛ ɔdā nōo ya ɛɛ nɛ ɛlā ō nwu nōo ka Ɔwɔico wɛ ɛta ipu ekponu i wɛ ɛlā ō nwu ku Ubáyíbu ŋ ma.
Jé odee lɛyikwu ɛgɛ nɛ oyeeyi ku ɔcɛnya éyi piyabɔ igbihi nɛ ó gáā lɛ ɛlā nɛ Ubáyíbu ka lɛyikwu Ujisɔsi jé a.
“A Jewish Woman Explains Why She Reexamined Her Faith” (Awake!, May 2013)
a Ɛlā ō nwu ɔmɛ 26 mla 27 géē kɛla lɛyikwu ɔdā nōo ya ɛɛ nɛ alɛɛcɛ cɛgbá onyata a mla ɛgɛ nɛ Ujisɔsi nya alɔ ta lɛ a.
b Má ɛlā néē ta oŋmɛyi ku ɔkpá a 2 lɛyikwu akacɛ nōo ka eko kpaakpa nɛ Ujisɔsi géē wa ipu ɛcɛ nyā.
