ILUẸMHIN 15
Họ Bhọ Hi Jesu?
Ọria nin ẹbho ne bunbun manman lẹn, ọle Jesu khin. Ọrẹyiriọ, ene bunbun bhi ẹwẹ ele bha lẹn unan ọria nin Jesu gene khin. Elin nọnsọle ọkpa ele lẹnlẹn. Ele mhọn emhin kẹkẹ nin ele rẹọ i rẹji unan ọria nin Jesu gene khin. Ọkpakinọn, be iBaibo tale rẹji ọle?
1. Họ bhọ hi Jesu?
Ẹlinmhin Jesu khin. Okhun ọle da nyẹnlẹn. Ọle Osẹnobulua ka man ọkuẹsẹ ọle man emhin nekẹle rebhe. Ọnan zẹle nin Baibo da tiọle “ọmọndiọn bhi emhin rebhe nan manlẹn.” (Colossians 1:15) Bhi ẹkẹ Baibo, a da yẹ tie iJesu ‘ukpọ Ọmọn ọkpa sẹsẹ nọnsi Osẹnobulua,’ ranmhude, ọle ọkpa Jehova tobọle man. (John 3:16) Jesu wo deba Aba ọle ha wẹnna. Ọle hi ọnọn rẹkpa Aba ọle man emhin nekẹle rebhe. (Tie Proverbs 8:30.) Jesu bi Aba ọle sẹyẹ wo sikẹ egbe. Ọle Osẹnobulua noo rẹ wewe uhọnmhunje nọnsọle. Ọnan zẹle nan da ha tiọle “ọne Ọta.”—John 1:14.
2. Bezẹle nin Jesu da vae bhi ọne otọ nan?
Ebe sẹ ikpe uli eva ne gbera, Osẹnobulua da lu emhin ọhan-ilo. Ọle da re ẹlinmhin nọn khiale nọnsọle rẹ re iẹnlẹn nọnsi Jesu ọbhi ẹkpọmọn ọsi ọmanmhẹn nọn bha sẹ hẹgẹn natiọle Mary. Iriọ a rẹ biẹ iJesu bhi ọne otọ nan. (Tie Luke 1:34, 35.) Jehova je iJesu vae bhi ọne otọ nan nin ọle dọ miẹn mhan fan. Ọnan zẹle nan da ha tiọle Mezaya la Kristi. a Ọta akhasẹ rebhe ne tẹmhọn ebi ọne Ọmiẹnmhanfan da lu, da munsẹ bhi egbe iJesu. Ọnan zẹle nin ẹbho da sabọ lẹn ghe ọle hi “Kristi, Ọmọn nọnsi Osẹnobulua nọn nyẹnlẹn.”—Matthew 16:16
3. Ejela Jesu ki ye nian?
Ẹghe nin Jesu rẹ yu fo, Osẹnobulua da riọ ọle kpanọ. Egbe ẹlinmhin ọle rẹ riọ kpanọ. Beji ọle riọ kpanọ fo, ọle da fikie ha khian okhun. Bhi enin, “Osẹnobulua da si ọle okhun yẹ re ọle ọbhi ihe nọn khua.” (Philippians 2:9) Ejayenan nian, ihe nọn khua, ọle Jesu ki ye. Ọle hi ọnọn zẹ sikẹ Jehova tobọle.
MANMAN LẸN OTỌLE NỌNSẸN
Manman luẹ unan ọria nin Jesu khin, bi ebezẹle nọn da khẹke nin mhan lẹn ọlẹn.
4. Jesu iyi Osẹnobulua nin Jehova
Baibo rẹman mhan ghe, arẹmiẹn ẹlinmhin nọn manman mhọn ahu, ọle Jesu khin bhi okhun, odotọ Osẹnobulua nin Aba ọle, ọle sẹyẹ ye. Be iBaibo rẹ re ọnan man yẹ? Ghe ọne IVIDIO nin uwẹ daghe ebi Baibo tale rẹji ihe nin Jesu ye.
Ene iBaibo ne ribhi otọle nan, dẹ rẹkpa mhan rẹ lẹn ikẹkẹ nọn ribhi ihe nin Jehova ye bi ihe nin Jesu ye. Tie ene iBaibo, bha ha zilo nyan inọnta nan gbẹn rẹkhan ele.
Tie Luke 1:30-32.
-
Be ọne ẹhi yọle Jesu dẹ ha khin rẹji Jehova nin “Osẹ Nọn Ke Ọkhun Nẹ”?
Tie Matthew 3:16, 17.
-
Be ukpuru nan họnlẹn ẹghe nin Jesu rẹ mianmẹn tale?
-
Họ bhọ ha talọ?
Tie John 14:28.
-
Bhi ẹwẹ aba bi ọmọn, họla ke okhun nẹ?
-
Jesu da tie Jehova Aba ọle. Be uwẹ riale ọnin rẹman?
Tie John 12:49.
-
Jesu be ha riale ọkpa ọle bi Aba ọle khin? Bezẹle nin uwẹ da ta iriọ?
5. Be imhan rẹ lẹn yẹ ghe Jesu hi Ọmiẹnmhanfan nin Osẹnobulua jere?
Ọta akhasẹ ne bunbun ribhi Baibo ne tẹmhọn ọne Ọmiẹnmhanfan nin Osẹnobulua jere. Ene ọta akhasẹ nan, ele rẹkpa ẹbho rẹ lẹn ọne Ọmiẹnmhanfan ẹghe nin ọle rẹ vae. Ghe ọne IVIDIO nin uwẹ re daghe ọta akhasẹ eso ne munsẹ bhi egbe iJesu ẹghe nin ọle rẹ vae bhi ọne otọ nan.
Tie ene ọta akhasẹ nan bhi ẹkẹ iBaibo, bha ha yẹ zilo nyan inọnta nan gbẹn rẹkhan ele.
Tie Micah 5:2 nin uwẹ rẹ lẹn eji Baibo yọle a ha da biẹ ọne Ọmiẹnmhanfan. b
-
A ibe gene biẹ ọle bhi ẹnin?—Matthew 2:1.
Tie Psalm 34:20 bi Zechariah 12:10 nin uwẹ daghe emhin eso nan ka ta ọbhi otọ rẹji ebi Mezaya da rẹ yu yẹ.
-
Ene ọta akhasẹ nan be gene munsẹ?—John 19:33-37.
-
Uwẹ be riale Jesu tobọle mhanmhanlẹn nin ene ọta akhasẹ nan munsẹ bhi egbe ọle?
-
Be ene ọta akhasẹ nan rẹman uwẹ rẹji Jesu?
6. Mhan dẹ miẹn elele bhọ sade mhan luẹ ẹmhọn iJesu
Baibo rẹkpa mhan rẹ lẹn ghe, ọ manman khẹke nin mhan luẹ ẹmhọn iJesu bi ihe nin Osẹnobulua re ọle ọi. Tie John 14:6 bi 17:3, bha ha zilo nyan ọne inọnta nan:
-
Bezẹle nọn da khẹke nin mhan luẹ ẹmhọn iJesu?
Jesu hi ọnọn tuje uwedẹ a nin mhan rẹ sabọ kiẹn imọẹ Osẹnobulua. Ọle da man ẹbho ẹmhọanta rẹji Jehova. Sẹyẹ, rẹ na bhi obọ ọle, ọle mhan ha da sabọ miẹn iẹnlẹn ọsi ighegheghe
ẸBHO ESO SABỌ YỌLE: “Esali Jehova bha rẹọ bhi Jesu.”
-
Be uwẹ ha rẹ wanniẹn ele yẹ?
EBI MHAN LUẸLE
Ẹlinmhin Jesu khin. Ọle manman mhọn ahu. Ọmọn nọnsi Osẹnobulua ọle khin. Ọle yẹ hi Ọmiẹnmhanfan nin Osẹnobulua jere bhi ọne agbọn nan.
Uwẹ Be Yẹ Yere?
-
Bezẹle nan da tie iJesu ‘ọmọndiọn ọsi emhin rebhe nan manlẹn’?
-
Ọkuẹsẹ Jesu vae bhi ọne otọ nan, be ọle ka ha lu bhi okhun?
-
Be imhan rẹ lẹn yẹ ghe Jesu hi Ọmiẹnmhanfan nin Osẹnobulua je vae bhi ọne agbọn nan?
FẸ ENE EMHIN NAN GHE
Manman luẹ emhin ne rẹ mhan lẹn ghe Jesu hi ọne Ọmiẹnmhanfan.
“Ọta Akhasẹ Ne Ribhi Baibo Be Gene Rẹman Ghe Jesu Hi Ọmiẹnmhanfan?” (Ebe nọn ribhi jw.org)
Baibo be yọle ghe Osẹnobulua nẹkẹ iJesu beji aba rẹ nẹkẹ ọmọn? Tie ọne ebe nan nin uwẹ rẹ lẹn.
“Bezẹle Nan Da Tie IJesu Ọmọn Nọnsi Osẹnobulua?” (Ebe nọn ribhi jw.org)
Fẹ emhin ne rẹ mhan lẹn ghe Baibo bha re obọ ba ọne iman-emhin nọn yọle ghe, itue ea ribhi Osẹnobulua ọkpa.
Fẹ ebi iẹnlẹn ọsi okhuo ọkpa rẹ fidenọ yẹ ẹghe nin ọle rẹ dọ luẹ ebi Baibo tale rẹji Jesu.
a Iluẹmhin nọnzi 26 bi 27 dẹ tẹmhọn emhin nọn sunu nọn zẹle nọn da khẹke nan dọ miẹn mhan fan, bi ebi Jesu rẹ dọ miẹn mhan fan yẹ.
b Fẹ Ebi A Gbẹn Ba Ọle nọnzi 2 ghe,nin uwẹ daghe ọta akhasẹ nọn tẹmhọn ẹghe nin Jesu rẹ zegbere bhi ihe ọsi Ọmiẹnmhanfan.
Emhin Ebhebhe Ne Ha Yẹ Ti Uwẹ Bhọ
INỌNTA NIN ẸBHO KẸ NỌỌN
Bebhọ Iluẹmhin IBaibo?
Min ewanniẹn rẹji inọnta rẹji iluẹmhin iBaibo nin man nẹn ẹbho luẹ ọsọhẹ.
