TZOLOM 15
Ani li Jesús?
Nawbʼil ru chiʼus li Jesús xbʼaanebʼ li kristiʼaan. Naabʼalebʼ nekeʼxnaw li xkʼabʼaʼ abʼan inkʼaʼ nekeʼxnaw ru chi tzʼaqal re ru ut wankebʼ chik jalan li naʼlebʼ nekeʼxkʼoxla chirix. Kʼaru naxkʼut li Santil Hu chirix li Jesús?
1. Ani li Jesús?
Li Jesús aʼan jun li musiqʼej li wank xwankil li wank saʼ choxa. Aʼan li xbʼeen li kiyobʼtesiik xbʼaan li Jehobʼa. Joʼkan naq nayeemank naq «aʼan li yoʼlajenaq xbʼenwa chiru chixjunil li yoobʼtesinbʼil» (Colosenses 1:15). Li Santil Hu naxye naq li Jesús aʼan ralal li Yos «li jun ajwiʼ chiru» xbʼaan naq kaʼajwiʼ aʼan kiyobʼtesiik xbʼaan li Jehobʼa (Juan 3:16, TNM). Li Jesús kikʼanjelak chixkʼatq li Jehobʼa, li Xyuwaʼ, re xtenqʼankil chi xyobʼtesinkil chixjunil (yaabʼasi Proverbios 8:30, TNM). Ut saʼ kabʼichal wankebʼ saʼ tzʼaqal amiiwil. Li Jesús aʼan «li Aatin» li naraj xyeebʼal naq naxkʼe chi naweʼk li esil li nayeheʼk re xbʼaan li Yos (Juan 1:14).
2. Kʼaʼut naq kichalk li Jesús saʼ Ruuchichʼochʼ?
Numenaq 2,000 chihabʼ anaqwan, li Jehobʼa kixbʼaanu jun li sachbʼachʼoolej naq kiroksi li xsantil musiqʼej re xkʼebʼal li xyuʼam li Jesús, jun li ánjel li nim xwankil, saʼ xkʼubʼ saʼ li xMaría. Chi joʼkan li Jesús kiruuk chi yoʼlaak joʼ jun kʼuulaʼal (yaabʼasi Lucas 1:34, 35). Li Jehobʼa kixtaqla chaq li Jesús saʼ Ruuchichʼochʼ, joʼ li Kriist malaj joʼ li Mesiiy re xkolbʼalebʼ li qas qiitzʼin. a Chixjunil li kixye chaq li Jehobʼa saʼ li Santil Hu chirix li Mesiiy kitzʼaqlok ru rikʼin li Jesús. Chi joʼkan ebʼ li kristiʼaan keʼxnaw ru li Jesús joʼ «li Kriist, li Ralal li yoʼyookil Yos» (Mateo 16:16).
3. Bʼar wank li Jesús anaqwan?
Naq ak kikamk li Jesús li Yos kixwaklesi wiʼ chik chi yoʼyo joʼ musiqʼej ut kisutqʼiik saʼ choxa. Ut aran «kitaqsiik xwankil xbʼaan li Yos» (Filipenses 2:9). Anaqwan li Jesús aʼan jun li ánjel li nim xwankil; abʼan kaʼajwiʼ li Jehobʼa qʼaxal nim xwankil chiru li Jesús.
QASIKʼAQ XCHAMAL LI NAʼLEBʼ
Tqatzol ani tzʼaqal li Jesús ut kʼaʼut aajel ru xnawbʼal wiibʼ oxibʼ li naʼlebʼ chirix.
4. Li Jesús moko aʼan ta li Nimajwal Yos
Usta li Jesús nim xwankil saʼ choxa, li Santil Hu naxye naq naxkubʼsi ribʼ rubʼel xwankil li Jehobʼa, li Xyuwaʼ. Kʼaʼut naqaye aʼin? Cheerilaq li BʼIDEO ut cheekʼe reetal kʼaʼut li Santil Hu naxye naq li Jesús jalan chiru li Jehobʼa.
Saʼebʼ li raqal aʼin tqil kʼaʼut naq li Jehobʼa ut li Jesús moko juntaqʼeetebʼ ta. Cheeyaabʼasi chixjunil ebʼ li raqal ut chexʼaatinaq chirix ebʼ li patzʼom aʼin:
Cheeyaabʼasi Lucas 1:30-32.
-
Chanru kixkʼut li ánjel naq moko juntaqʼeet ta li xwanjik li Jesús rikʼin li Jehobʼa «li Nimajwal» Yos?
Cheeyaabʼasi Mateo 3:16, 17.
-
Naq ak xkubʼeek xhaʼ li Jesús, kʼaru li esil kiʼabʼimank saʼ choxa?
-
Kʼaru nakaaye, ani aj e li xyaabʼ kuxej li kiʼabʼimank chaq saʼ choxa?
Cheeyaabʼasi Juan 14:28.
-
Ani más nim xwankil, ma li yuwaʼbʼej malaj li alalbʼej?
-
Li Jesús kixye naq li Jehobʼa aʼan «li Yuwaʼbʼej», kʼaru naraj xyeebʼal aʼin?
Cheeyaabʼasi Juan 12:49.
-
Ma naxkʼoxla li Jesús naq juntaqʼeet rikʼin li Xyuwaʼ? Kʼaru nakaakʼoxla laaʼat?
5. Kʼaru naxkʼutbʼesi naq li Jesús aʼan li Mesiiy
Saʼ li Santil Hu natawmank naabʼal li propesiiy chirix li Mesiiy, li naraj xyeebʼal li sikʼbʼil ru xbʼaan li Yos re xkolbʼalebʼ li qas qiitzʼin. Ebʼ li propesiiy aʼin kitenqʼank rehebʼ li kristiʼaan re xnawbʼal ani li Mesiiy. Cheerilaq li BʼIDEO ut cheekʼe reetal wiibʼ oxibʼ li propesiiy li kitzʼaqlok ru naq li Jesús kiwank saʼ Ruuchichʼochʼ.
Cheeyaabʼasi ebʼ li propesiiy li wank saʼ li Santil Hu ut chexʼaatinaq chirix li patzʼom aʼin:
Cheeyaabʼasi Miqueas 5:2 re naq teekʼe reetal bʼar tyoʼlaaq li Mesiiy. b
-
Ma kitzʼaqlok ru li propesiiy aʼin? (Mateo 2:1).
Cheeyaabʼasi Salmo 34:21 ut Zacarías 12:10 re xkʼebʼal reetal wiibʼ oxibʼ li propesiiy li kixye chaq li Santil Hu chirix li xkamik li Mesiiy.
-
Ma keʼtzʼaqlok ru ebʼ li propesiiy aʼin? (Juan 19:33-37).
-
Ma nakaakʼoxla naq wank kʼaru kixbʼaanu li Jesús re naq teʼtzʼaqloq ru ebʼ li propesiiy?
-
Kʼaru naxkʼut aʼin chaawu chirix li Jesús?
6. Wank rusilal xnawbʼal ru li Jesús
Li Santil Hu naxye naq aajel ru xnawbʼal ru li Jesús ut li kʼanjel li kʼebʼil re xbʼaan li Jehobʼa. Cheeyaabʼasi Juan 14:6 ut 17:3 ut chexʼaatinaq chirix li patzʼom aʼin:
-
Kʼaʼut aajel ru xnawbʼal ru li Jesús?
Li Jesús aʼan li bʼe li nokooxkʼam re wank choʼq ramiiw li Yos. Kixkʼut ajwiʼ li yaal chirix li Jehobʼa ut nokooxtenqʼa chi xtawbʼal li junelik yuʼam.
WIIBʼ OXIBʼ NEKEʼXYE: «Ebʼ laj testiiw re li Jehobʼa inkʼaʼ nekeʼxpaabʼ li Jesukriist».
-
Kʼaru raj taasume?
LI AK XQATZOL
Li Jesús aʼan jun li musiqʼej li wank xwankil, aʼan Ralal li Yos ut li Mesiiy.
Qajultikaq
-
Kʼaʼut nayeemank naq li Jesús «aʼan li yoʼlajenaq xbʼenwa chiru chixjunil li yoobʼtesinbʼil»?
-
Kʼaru naxbʼaanu chaq li Jesús naq toj maajiʼ nakʼulunk saʼ Ruuchichʼochʼ?
-
Chanru naqanaw naq li Jesús aʼan li Mesiiy?
SIKʼ XKOMON LI NAʼLEBʼ
Tzol xkomon li naʼlebʼ li naxkʼut naq li Jesús aʼan li Mesiiy.
Kʼe reetal ma naxye li Santil Hu naq li Yos kiwank choʼq xyuwaʼ li Jesús joʼ chanru ebʼ li kristiʼaan nekeʼwank ralal xkʼajol.
«Kʼaʼut nayeemank re li Jesús naq aʼan Ralal li Yos?» (Li naʼlebʼ re jw.org)
Tzol kʼaʼut li Santil Hu inkʼaʼ naxkʼut naq oxibʼ ru li Yos.
«Ma li Jesús aʼan li Yos?» (Laj Kʼaakʼalehom, 1 re abril 2009)
Tzol chanru kijalaak li xyuʼam jun li ixq naq kixtzʼil rix li naxye li Santil Hu chirix li Jesús.
«Jun li ixq aj Judiiy naxchʼolobʼ kʼaʼut kixtzʼil rix li xpaabʼal» (Ajsi aawu!, mayo 2013)
a Saʼ li tzolom 26 ut 27 tqatzol kʼaʼut naʼajmank naq tookoleʼq ut chanru tooxkol li Jesús.
b Chaawil xyaalalil li naʼlebʼ 2 bʼarwiʼ naxchʼolobʼ chi tzʼaqal re ru jun li propesiiy li naxye joqʼe kikʼulunk li Jesús saʼ Ruuchichʼochʼ.
Maare twulaq ajwiʼ chaawu
LI NAPATZʼMANK CHI RAJLAL
Chanru nekeʼxkʼe li tzolok chirix li Santil Hu ebʼ laj testiiw re li Jehobʼa?
Rikʼin li tzolok li nekeʼxkʼe ebʼ laj Testiiw naru nakaawoksi yalaq kʼaru chi Santil Hu. Naru nakateʼrochbʼeni ebʼ laawamiiw malaj ebʼ laakomon.
