MWE LUTLUT 15
Suc Jesus?
Jesus el sie sin mwet suc etweyuck emeet fin facluh. Tuhsruhktuh, oasr mwet pucspucs suc tiacna etwacl na pwacye, ac tiac oacna sie nuhnak laltahl lah suc na pwacye Jesus. Meac Bible uh fahk kacl?
1. Suc Jesus?
Jesus el sie lipufacn kuhlacna suc muhta inkuhsrao. El oreklac sin Jeova God meet liki ma nuhkewa sahyac. Ke srihpac se inge, pahngohnyuck el oacna “wounse, suc fuhlwact liki ma oreklac nuhkewa.” (Colossae 1:15) Bible uh pahnglol Jesus oacna “wen sefanna” mweyen el muhkwena pa Jeova sifacna el oraclah uh. (John 3:16) Ke pacl ma Jeova el oraclah ma nuhkewa sahyac, Jesus el kahsruh Pahpah se tuhmwacl inge. (Riti Soakas 8:30.) Oasr fototo wowo lal Jesus nuh sin Jeova. Oacna mwet kahskahs luhn God, el oaru in fahkwack pweng ac kahs in kolyuck luhn God, pa sis pahngohnyuck el oacna “Kahs.”—John 1:14.
2. Efuh kuh Jesus el tuhkuh nuh facluh?
Yac 2,000 somlah, Jeova el oraclah sie mwenmwen. El orekmakihn nguhn muhtahl lal in fihliyac moul lal Jesus nuh insiacl Mary, muhtwacn virgin se. Ke inkacnek se inge, Jesus el isuslac oacna sie mwet. (Riti Luke 1:34, 35.) Jesus el tuhkuh nuh facluh oacna Messiah, kuh Christ, in molwelah mwet uh. a Kahs pahluh nuhkewa in Bible ke Messiah ahkpwacyeyuck kacl, ma inge kahsruh mwet uh in etuh lah Jesus pa “Christ, Wen nuhtin God moul.”—Matthew 16:16.
3. Jesus el oasr oyac ingena?
Tukun Jesus el misac, ahkmoulyeyuckyak el oacna sie nguhn ac el fohlohklac nuh lucng. Inkuhsrao “God el fihliyac ma nuhkewa ye nien Christ . . . tuh elan Leum fuhlwact fin ma nuhkewa.” (Efesus 1:22) Ingena, oasr kuh yohk ac wal fuhlwact lal Jesus—el ahkluo sin Jeova.
AHKYOHKYE LUTLUT LOM
Eis etwacack yohk kacl Jesus ac kwacfeacng in etuh lah efuh yohk srihpac kom in etwacl na pwacye.
4. Tiac Jesus pa God Kuhlacna
Bible uh luti lah finne Jesus el sie lipufacn kuhlacna inkuhsrao, el oasr ye kuh luhn God lal, ac Pahpah tuhmwacl, Jeova. Efuh kuht kuh in fahk ohinge? Liye VIDEO se in etuh lah efuh kuh Bible uh luti lah Jesus ac God kuhlacna elos tiac oacna sie.
Fuhs tohkoh inge ac kahsre kuht in kahlwem ke ma tiac oacna sie inmahsrlon Jeova ac Jesus. Rit kais sie fuhs inge, ac tohkohyang sramsramkihn kihsen siyuck ekahsr ten inge.
Riti Luke 1:30-32.
-
Lipufacn se el ahkuhtweyac fuhkah kuhpahsr lal Jesus nuh sin Jeova, “God Fuhlwactlacna”?
Riti Matthew 3:16, 17.
-
Ke pacl se ma Jesus el bacptaislac, meac puhsra se tuhkuh inkuhsrao me fahkwacng?
-
Puhsren suc lohngyuck ngacn?
Riti John 14:28.
-
Suc mahtuh luhkeltahl ac oasr kuh yohk la? Pahpah se kuh wen se?
-
Meac kalmacn kahs lal Jesus ke el pahnglol Jeova oacna Pahpah tuhmwacl?
Riti John 12:49.
-
Yac Jesus el nuhnkuh muh el ac Pahpah tuhmwacl oacna sie? Meac kom nuhnkuh?
5. Jesus el ahkpwacyeye lah el pa Messiah
Oasr kahs pahluh pucspucs in Bible ma ac kahsruh mwet in etuh lah suc Messiah—sulohsohllah luhn God in molwelah mwet uh. Liye VIDEO se in liye kuhtuh kahs pahluh ma Jesus el ahkpwacyeye ke el tuhkuh nuh facluh.
Riti kahs pahluh in Bible inge, ac tohkohyang sramsramkihn kihsen siyuck ekahsr ten inge:
Riti Micah 5:2 in lotwelah lah Messiah el ac fah isuslac oyac. b
-
Yac isuslac lal Jesus ahkpwacyeye kahs pahluh se inge—Matthew 2:1.
Riti Psalm 34:20 ac Zechariah 12:10 in lotwelah ke ma Bible uh palye ke misac luhn Messiah.
-
Yac kahs pahluh inge ahkpwacyeyuck?—John 19:33-37.
-
Kom nuhnkuh muh Jesus el kuh in kihfaslah kuhtwena sin mwe ahkpwacyeye ke kahs pahluh inge?
-
Meac ma inge ahkpwacyeye kacl Jesus?
6. Kuht ac fah eis ma wo kuht fin etwacllah Jesus na pwacye
Bible uh fahk lah yohk srihpac na pwacye in etwacl Jesus ac ke kunohkohn lal. Riti John 14:6 ac 17:3. Tohkohyang sramsramkihn kihsen siyuck se inge:
-
Efuh yohk srihpac in lotwelah kacl Jesus?
Jesus el ikacslah inkacnek tuh mwet uh kuh in kawuck luhn God. El luti ma pwacye kacl Jeova, ac ke srihpacl, kuht kuh in eis moul ma pahtpaht
KUHTUH MWET UH FAHK: “Mwet Loh luhn Jeova tiac luhlahlfongi kacl Jesus.”
-
Kom ac topuk fuhkah?
MA KUHT LOTWELAH
Jesus el sie lipufacn kuhlacna. El Wen nuhtin God, ac el pa Messiah.
Kalweni
-
Efuh kuh Jesus el pahngpahng “wounse, suc fuhlwact liki ma oreklac nuhkewa”?
-
Meet liki el tuhkuh nuh facluh, meac Jesus el oraclah?
-
Kuht etuh fuhkah lah Jesus pa Messiah?
LIYE PAC MA INGE
Lotwelah lah efuh kuh Jesus pa Messiah.
“Do Messianic Prophecies Prove That Jesus Was the Messiah?” (Web article)
Liye in Bible lah ke inkacnek fuhkah God pa pahpah tuhmwacl Jesus.
Lotwelah lah efuh kuh Bible uh tiac luti ke Trinity.
Riti lah moul luhn sie muhtwacn eklac fuhkah tukun el lutlutkihn ma Bible uh luti kacl Jesus.
“A Jewish Woman Explains Why She Reexamined Her Faith” (Awake!, May 2013)
a Mwe lutlut 26 ac 27 ac fah ahkuhtweyac lah efuh mwet uh enenuh in moliyucklac ac Jesus el molikuhtlac fuhkah.
b Liye Kuhtuh Pac Mwe Ahkuhtweyac 2 in etuh ke kahs pahluh lah piyac pacl Jesus ac tuhkuh nuh facluh.
