DILONGI 15
Yesu kele nani?
Yesu kele mosi ya bantu yina mezabana mingi na masolo ya bantu. Kasi, katula kuzaba nkumbu na yandi, bantu mingi zaba ve mambu mingi yina metadila yandi, mpe bantu mingi kele na bangindu ya mutindu na mutindu na yina metadila Yesu. Mpe yinki Biblia ketubaka samu na yandi?
1. Yesu kele nani?
Yesu kele kisemua mosi ya mpeve ya kilendo yina kezingaka na dizulu. Yandi kele kisemua ya ntete yina Yehova Nzambi salaka tekila bima yankaka. Samu na yau nde, bakebokidilaka yandi ‘muana ya ntete na nsemono nionso.’ (Bakolosai 1:15) Biblia ketubilaka Yesu lokola ‘Muana mosi kaka ya kubutuka’ ya Nzambi samu Yesu kaka nde salamaka mbala mosi na Yehova. (Yoane 3:16) Yesu salaka kintuadi na Tata yandi, Yehova, mpe yandi sadisaka Yandi samu na kusala bima nionso yankaka. (Tanga Bingana 8:30.) Yesu tatamanaka kusepela kuvuanda na nguizani ya mbote na Yehova. Yesu salaka lokola ntubidi ya Nzambi, ‘Mpova,’ samu yandi tubilaka nsangu mpe minsiku na yandi.—Yoane 1:14.
2. Samu na yinki Yesu kuizaka na ntoto?
Bamvula 2000 meluta, Yehova sadilaka mpeve ya nlongo na yandi samu na kukatula luzingu ya Yesu na dizulu mpe yandi tulaka yandi na kivumu ya ntuenia mosi ya nketo yina zabaka babakala ve na nkumbu ya Maria. Na mutindu yina nde Yesu butukaka lokola muntu awa na ntoto. (Tanga Luka 1:34, 35.) Yesu kuizaka awa na ntoto samu na kuvuanda Masiya yina lakamaka, to Klisto, mpe samu na kuvukisa bantu. a Bambikudulu ya Biblia nionso yina metadila Masiya mekokisamaka na Yesu, yasadisaka bantu na kuzaba mbote Yesu lokola ‘Klisto, mpe Muana ya Nzambi ya moyo.’—Matayo 16:16.
3. Wapi kisika Yesu kele bubu yayi?
Na manima ya kufua na nzutu ya kinsuni, Yesu futumukaka na nzutu ya kimpeve mpe yandi vutukaka na dizulu. Kuna na dizulu, ‘Nzambi zangulaka yandi na kisika mosi ya kunanguka.’ (Bafilipi 2:9) Bubu yayi, Yesu kele mbasi mosi yina kele na kilendo—kaka Yehova nde kele na kilendo kuluta.
KOTA NA MPINDA
Sosa kuzaba mbotembote Yesu kele mpenza nani mpe samu na yinki kuzaba yandi kele na mfunu.
4. Yesu kele ve Nzambi Nkua-Ngolo-Nionso
Biblia kelongaka ti atako Yesu kele kisemua mosi ya kimpeve ya kilendo yina kezingaka na dizulu, kasi yandi kezitisaka Tata na yandi Yehova mpe Nzambi na yandi. Samu na yinki beto metuba mutindu yina? Tula Video samu na kumona mutindu Biblia kena kusasila lusuasanu yina kele kati na Yesu mpe Nzambi Nkua-Ngolo-Niono.
Bafoto yayi melanda kesadisa beto na kubakusa nguizani yina kele kati na Yehova mpe Yesu. Tanga konso verse, mpe na manima tubila biuvu yayi melanda.
Tanga Luka 1:30-32.
-
Yinki mutindu mbasi monisaka nguizani yina kele kati na Yesu mpe Yehova Nzambi, ‘Muntu yina Meluta Zulu’?
Tanga Matayo 3:16, 17.
-
Na mbotama ya Yesu, yinki ndinga yina katukaka na dizulu tubaka?
-
Ndinga yango vuandaka ya nani?
Tanga Yoane 14:28.
-
Nani kele mbuta mpe na kimfumu mingi? Tata to muana?
-
Yinki Yesu zolaka monisa ntangu yandi bokidilaka Yehova Tata na yandi?
Tanga Yoane 12:49.
-
Yesu kekanisaka ti yandi na Tata na yandi bakele kaka muntu mosi? Yinki nge mekanisa?
5. Yesu monisaka ti yandi kele Masiya
Biblia kele na bambikudulu mingi yina lenda sadisa bantu na kuzaba mbote Masiya—Muntu yina Nzambi ponaka samu na kuvukisa bantu. Tula VIDEO samu na kutala ndambu ya bambikudulu yina Yesu kokisaka ntangu yandi kuizaka awa na ntoto.
Tanga bambikudulu yango ya Biblia, mpe na manima tadila biuvu yayi melanda:
Tanga Mika 5:2 samu nge zaba kisika yina Masiya fueti butukila. b
-
Kubutuka ya Yesu kokisaka mbikudulu yango?—Matayo 2:1.
Tanga Nkunga 34:20 mpe Zekaria 12:10 samu na kumona yina Biblia samunaka na diambu metadila lufua ya Masiya.
-
Wapi kisika bambikudulu yayi kokisamaka?—Yoane 19:33-37.
-
Nge mekanisa ti Yesu nde salaka nionso samu bambikudulu yango kokisama?
-
Yinki yakena kundimisa nge samu na Yesu?
6. Kulonguka kuzaba Yesu kepesa beto mambote
Biblia kemonisaka mfunu ya kulonguka kuzaba Yesu mpe kiyekua na yandi. Tanga Yoane 14:6 mpe 17:3, mpe na manima tadila kiuvu yayi:
-
Samu na yinki yakele mfunu kulonguka kuzaba Yesu?
Yesu mezibudilaka beto nzila samu beto kuma bankundi ya Nzambi. Yandi longaka kedika yina metadila Yehova, mpe na nzila na yandi, beto lenda baka luzingu ya mvula na mvula
BANTU YANKAKA METUBA: “Bambangi ya Yehova kendiminaka ve Yesu.”
-
Yinki mvutu nge kepesa?
BUNKUFI
Yesu kele kisemua mosi ya mpeve ya kilendo. Yandi kele Muana Nzambi mpe Masiya.
Mvutukulu
-
Samu na yinki Biblia mebokidila Yesu ‘muana ya ntete na nsemono nionso?’
-
Tekila Yesu kuiza awa na ntoto, yinki yandi vuandaka sala na dizulu?
-
Yinki mutindu nge mezaba ti Yesu kele Masiya?
SOSA
Longuka kuzaba mambu mingi na yina metadila kiyekua ya Yesu lokola Masiya.
“Bisakweli oyo elobeli Masiya emonisaki ete Yesu azalaki Masiya?” (Disolo na Internet)
Sosa kuzaba kana Biblia kelongaka ti Nzambi butaka Yesu mutindu bantu kesalaka samu na kubuta bana.
“Mpo na nini Yesu abengami Mwana ya Nzambe?” (Disolo na Internet)
Tadila samu na yinki dilongi ya Butatu kele ve dilongi ya Biblia.
“Yesu azali Nzambe?” (Linɔ́ngi ya Mosɛnzɛli ya 1 Avril 2009)
Tala mutindu luzingu ya nketo mosi sobaka na manima ya kuzaba yina Biblia kelongaka samu na Yesu.
a Dilongi 26 mpe 27 ketubila samu na yinki bantu kele na nsatu ya luvuluzu mpe yinki mutindu Yesu kevukisaka beto.
