KILESO 15
Yesu kele nani?
Yesu me zabana mingi kuluta bantu nyonso. Bantu mingi me zaba nkumbu ya yandi, kasi ba me zaba ve mbote-mbote nani yandi kele. Ba kele ve na makanisi mosi na yina me tadila Yesu. Yinki Biblia ke zonzá na yina me tadila yandi?
1. Yesu kele nani?
Yesu ke mbazi ya ngolo mingi yina ke vandá na zulu. Ni Yehova Nzambi yidikaka yandi tekila yandi yidika bima nyonso ya nkaka. Ni na yawu, ba ke bokilaka yandi “mwana ya ntete na kati ya bantu mpe bima nyonso yina Nzambi yidikaka.” (Bakolose 1:15) Biblia ke bokilá Yesu ‘mwana ya Nzambi kaka mosi’ samu kaka ni yandi, Yehova yidikaka yandi mosi. (Yoane 3:16) Yesu vandá sala kintwadi na Tata ya yandi. Yandi sadisá Yehova na kuyidika bima nyonso ya nkaka. (Tanga Bingana 8:30.) Tii bubu yayi, Yesu kele kaka na bundiku ya ngolo na Yehova. Biblia ke bokilaka yandi, “Ndinga,” samu yandi ke zonzá mambu ya Nzambi mpe misiku ya Nzambi na bantu mpe na bambazi ya nkaka.—Yoane 1:14.
2. Samu na yinki Yesu kwizá awa na ntoto?
Bamvula 2 000 me luta, Yehova salá kimangu samu mwana ya yandi butama awa na ntoto. Yandi sadilá mpeve ya yandi ya santu na kutula luzingu ya Yesu na kati ya kivumu ya Maria, kento yina zabá ntete ve babakala. Ni faso yina Yesu butuká muntu. (Tanga Luke 1:34, 35.) Yesu kwizá na ntoto samu na kuvanda Masiya to Kristo, mpe samu na kuvuukisa bantu. a Bambikululu nyonso ya Biblia yina vanda zonzila Masiya lunganá na Yesu. Ya sadisá bantu na kuzaba ti Yesu vandá “Masiya, Mwana ya Nzambi yina kele moyo.”—Matayi 16:16.
3. Wapi kisika Yesu kele bubu yayi?
Na manima ya lufwa ya Yesu awa na ntoto, Yehova vumbulaka yandi na nzutu ya bambazi, mpe yandi vutukaka na zulu. Kuna, “Nzambi [. . .] zangulaka yandi na kimfumu yina me lutila bimfumu nyonso.” (Bafilipi 2:9) Yesu me lutila bambazi nyonso na ngolo mingi, kasi kaka ni Yehova me lutila yandi na ngolo.
SOSA KUZABA MBOTE-MBOTE
Tala samu na yinki kulongoka mbote-mbote na kuzaba Yesu mpe kulongoka mambu yina me tadila yandi ke mfunu mingi.
4. Yesu ke ve Nzambi ya Ngolo-Nyonso
Biblia ke zonzá ti ata Yesu me lutila bambazi nyonso na ngolo, yandi ke tumamá na Yehova yina ke Nzambi mpe Tata ya yandi. Samu na yinki beto lenda zonza faso yina? Landa VIDEO samu na kutala mutindu Biblia ke lakisá ti Yesu kele ve faso mosi na Nzambi.
Baverse yina ke landa, ke sadisa beto na kuzaba ti Yehova ke Tata ya Yesu. Tanga mosi na mosi ya baverse yayi, mpe na manima beto zonzila byuvu yina ke landa.
Tanga Luke 1:30-32.
-
Wa’ faso mambu yina mbazi mosi zonzá ke na lakisá ti Yesu na Yehova Nzambi ya ‘Kulutila Zulu’ ke ve mutindu mosi?
Tanga Matayi 3:16, 17.
-
Ntangu Yesu kuzwá mbotokolo, yinki ndinga yina katuká na zulu zonzaka?
-
Nge me kanisa ti ya vandá ndinga ya nani?
Tanga Yoane 14:28.
-
Na nge, na tata na mwana nani ke kuluntu?
-
Yesu bokilá Yehova, Tata. Samu na yinki?
Tanga Yoane 12:49.
-
Yesu ke kanisá kwandi ti yandi na Tata ya yandi kele muntu mosi? Nge me kanisa yinki?
5. Yinki lakisá ti Yesu vandá Masiya
Ya ke na bambikululu mingi na Biblia yina ke zonzilá Masiya— muntu yina Nzambi soolá samu na kuvuukisa bantu. Landa VIDEO samu na kutala ndambu ya bambikululu yina lunganá na Yesu ntangu yandi kwizá awa na ntoto.
Tanga bambikululu yayi na Biblia, mpe na manima beto zonzila byuvu yina ke landa.
Tanga Mika 5:2 samu na kuzaba wapi kisika Yesu butukaka. b
-
Mbikululu yayi lunganá kwandi?—Matayi 2:1.
Tanga Nkunga 34:20 mpe Zakari 12:10 samu na kutala yinki Biblia zonzá na yina me tadila lufwa ya Yesu.
-
Wa’ faso bambikululu yayi lunganaka? —Yoane 19:33-37.
-
Nge me kanisa ti ni Yesu yandi mosi vandá sala ti bambikululu nyonso yayi lungana?
-
Yinki ya ke na lakisá nge na yina me tadila Yesu?
6. Kulongoka kuzaba Yesu ke natina beto bambote mingi
Biblia ke zonzá ti kulongoka na kuzaba Yesu mpe yina Nzambi me lomba yandi na kusala ke mfunu mingi. Tanga Yoane 14:6 na 17:3, mpe na manima beto zonzila kyuvu yayi:
-
Samu na yinki kulongoka na kuzaba Yesu ke mfunu mingi?
Yesu fungulá beto nzila ya kukuma ndiku ya Nzambi. Yandi longá beto matsyeleka na yina me tadila Yehova. Na nzila ya yandi beto lenda kuzwa mpe luzingu ya ntangu nyonso
BANTU YA NKAKA KE ZONZAKA: “Bambangi ya Yehova ke kwikilá ve na Yesu.”
-
Nge me kanisa yinki?
NA BUNKUFI
Yesu ke na ngolo ya kulutila bambazi nyonso ya nkaka, yandi ke Mwana ya Nzambi mpe Masiya.
Mambu ya kusimba
-
Samu na yinki ba me bokila Yesu “mwana ya ntete na kati ya bantu mpe bima nyonso yina Nzambi yidikaka”?
-
Yinki Yesu vandá sala tekila yandi kwiza awa na ntoto?
-
Wapi faso beto me zaba ti Yesu kele Masiya?
SOSA KUZABA DYAKA
Longoka mambu ya nkaka yina ke na lakisá ti Yesu kele Masiya.
Biblia ke zonzá ti Yehova ke Tata ya Yesu. Ya zola zonza ti yandi butá Yesu faso bantu ke butá bana? Tala mvutu.
“Samu na yinki ba me bokila Yesu Mwana ya Nzambi?” (Tanga yawu na jw.org)
Tala samu na yinki malongi ya Trinité ke katuká ve na Biblia.
Tala faso luzingu ya kento mosi sobá ntangu yandi longoká matsyeleka na yina me tadila Yesu.
“ Une femme juive explique pourquoi elle a remis sa foi en question ” (Réveillez-vous !, Mai 2013)
