KĨTHOOMO KĨA 15

Jesũ Nũũ?

CHETHA

Jesũ Nũũ?

Kĩrĩ antũ barĩa banatũũra, Jesũ nĩ ũmwe wa antũ barĩa baijĩkene nkũrũki. Amwe na bũu, antũ babaingĩ baijĩ riĩtwa rĩawe akĩ, batijĩ jamaingĩ jamwegie, na babaingĩ nĩbethagĩrwa na maoni mwanyamwanya jegie Jesũ nũũ kamma. Nĩatĩa Bibiria yugaga bũmwegie?

1. Jesũ Nũũ?

Jesũ nĩ muntũ wa gĩkĩrundu, ũrĩ na inya, na atũũraga ĩgũrũ. Nĩwe woombĩrwe nĩ Jehova Mũrungu mbere ya gĩntũ kĩngĩ kinya kĩrĩkũ. Nĩ ũntũ bwa gĩtũmi kĩu etagwa “kiranga” kĩa “into bionthe.” (Akolosai 1:15) Bibiria ĩĩtaga Jesũ ‘mutana wa mumwe’ wa Murungu, tontũ Jesũ nĩwe wenka akĩ ombĩrwe nĩ Jehova ĩmwe kwa ĩmwe. (Johana 3:16) Jesũ naaritanĩĩrie ngũgĩ amwe na Ĩthe, Jehova, akĩmũtethagĩĩria kũũmba into bingĩ bionthe. (Thooma Njuno 8:30.) Jesũ no etĩte na mbere kũgwĩrĩrua ngwatanĩro ya akuĩ amwe na Jehova. Natumĩkaga na njĩra ya wĩtĩkĩkua arĩ mwaria wa Mũrungu, “Ruteto,” akĩmenyithanagia ntũmwa na kĩrĩra kĩawe.—Johana 1:14.

2. Nĩkĩ Jesũ ejĩre nthĩgũrũne?

Gĩntũ ta mĩaka 2000 mĩthiru, Jehova naatumĩĩre kĩrundu kĩawe gĩkĩtheru kũthamia mwoyo jwa Jesũ na njĩra ya kĩama, kuuma ĩgũrũ mwanka kĩune kĩa mwarĩ ũmwĩthĩ bikira, ũgwĩtwa Maria. Ũu nĩu Jesũ aciarĩrwe arĩ muntũ nthĩgũrũne. (Thooma Luka 1:34, 35.) Jehova aatũmĩre Jesũ nthĩgũrũne nĩkenda aa Mesiya ũrĩa weranĩri, kana Kristũ, nĩkenda onokia antũ. a Jesũ nojũrĩrie mororia jonthe ja Bibiria jegie Mesiya, na bũu bũratũma antũ bamenya nĩwe “Kristo, Mutana wa Murungu uria utuuraga mwoyo.”—Mathayo 16:16.

3. Nĩkũ Jesũ arĩ nandĩ?

Nyuma ya ũtũũro bwa Jesũ gũkinya mũthia arĩ muntũ nthĩgũrũne, naariukĩrue arĩ na mwĩrĩ jwa gĩkĩrundu na aracooka ĩgũrũ. Naarĩa ĩgũrũ, “Murungu naamuthunguurire mono.” (Afilipi 2:9) Nandĩ Jesũ arĩ na kaanya gakanene mũno ka wathaani—nĩwe wa baĩrĩ kuuma kĩrĩ Jehova.

ĨNJA NKŨRŨKI

Cũnkũũna nkũrũki Jesũ nũũ kamma, na nĩkĩ bũrĩ ũntũ bwa gĩtũmi kwiritana bũmwegie.

4. Jesũ tĩ Mũrungu Mwene inya yonthe

Bibiria ĩritanaga kinya kethĩra Jesũ nĩ muntũ wa gĩkĩrundu naarĩa ĩgũrũ, nainyiagia kĩrĩ Jehova, ũrĩa nĩ Ĩthe na Mũrungu waawe. Nĩkĩ tũũmba kuuga ũu? Tega VIDIO nĩkenda wona ũrĩa Bibiria ĩritanaga bwegie ũrĩa Jesũ arĩ mwanya na Mũrungu Mwene inya yonthe.

VIDIO: Jesũ Kristũ-rĩ, Nĩwe Mũrungu? (3:22)

Maandĩko jaja jathingatĩte nĩjatũtethagia kũmenya ngwatanĩro ĩrĩa Jehova na Jesũ bethagĩrwa nayo. Thooma o ĩandĩko, rĩu bwarĩĩrie biũria bibi bithingatĩte.

Thooma Luka 1:30-32.

Nĩatĩa Mũraĩka aatarĩĩrie ngwatanĩro ĩrĩa ĩrĩ gatĩgatĩ ka Jesũ na Jehova Mũrungu, “Mwene inya yonthe”?

Thooma Mathayo 3:16, 17.

Rĩrĩa Jesũ aabatithagua, nĩatĩa kaajũ kuuma ĩgũrũ kaugĩre?
Kaajũ kau ũrĩthũgaania kaarĩ kaaũ?

Thooma Johana 14:28.

Nũũ mũkũrũ kĩrĩ ũngĩ, na nũũ ũrĩ na waathani nkũrũki ya ũngĩ? Nĩ Ĩthe kana nĩ mũtaana?
Nĩatĩa Jesũ eendaga kwonania rĩrĩa eetĩre Jehova Baaba waawe?

Thooma Johana 12:49.

Rĩ, Jesũ nathũgaanagia atĩ we na Ĩthe nĩ mũntũ ũmwe? Ũrĩona atĩa?

5. Jesũ naarikithĩrie atĩ nĩwe Mesiya

Bibiria ĩrĩna mororia jamaingĩ jarĩa joomba gũtethia antũ kũmenya Mesiya.—Ũrĩa ũthuuri nĩ Mũrungu kwonokia antũ. Tega VIDIO kenda wona jamwe ja mororia jarĩa Jesũ oojũrĩrie rĩrĩa ejĩre nthĩgũrũne.

VIDIO: Jesũ Nojũragia Ũroria (3:03)

Thooma mororia jaja ja Bibiria, rĩu bwarĩĩrie biũria bibi bithingatĩte:

Thooma Mika 5:2 kenda wiritana nĩkũ Mesiya aarĩ aciarwe. b

Gũciarwa kwa Jesũ-rĩ, nĩ kwojũrĩrie ũroria bũu?—Mathayo 2:1.

Thooma Zaburi 34:20 na Zekaria 12:10 nĩkenda wona mantũ nkũrũki jarĩa jaroretue bwegie gĩkuũ kĩa Mesiya.

Rĩ, mororia jau nĩjoojũrĩre?—Johana 19:33-37.
Ũrĩthũgaania nokũmbĩke gũkethĩrwa kũrĩ ũntũ Jesũ athithĩrie nĩkenda mororia jau jojũra?
Nĩatĩa ũntũ bũbũ bũgũkũrikithĩria bwegie Jesũ?

6. Nĩtũgunĩkaga twairitana bwegie Jesũ

Bibiria nionanagia gĩtũmi gĩa kwiritana bwegie Jesũ na jarĩa Mũrungu akwenda athithia. Thooma Johana 14:6 na 17:3, rĩu bwarĩĩrie kĩũria gĩkĩ:

Nĩkĩ bũrĩ ũntũ bwa gĩtũmi kwiritana bwegie Jesũ?

Jesũ naarugũrĩre njĩra ya gũtũtethia kwaa acoore ba Mũrungu. Naaritanĩre ũmma bwegie Jehova, na gũkũrũkĩĩra kĩrĩwe, twomba kwona mwoyo jwa kenya na kenya.

ANTŨ BAMWE BAUGAGA: “Akũũjĩ ba Jehova batĩtĩkagia Jesũ.”