SMALKANKA 15
¿Jisas ba ya sa ki?
Patitara piua ba wina upla ailal Jisas sturka ba kakaira sa. Sakuna upla ailal Jisas nina ba kakaira kabia kra sin, wiria baman ai rayaka tânka ba brisa. Baku sin, upla ailal Jisas tânka ba dukiara diara sât sât luki banhwisa. ¿Rait pali Baibil dîa smalkisa Jisas dukiara?
1. ¿Jisas ba ya sa ki?
Jisas ba spirit karnakira kum sa bara heven ra iwisa. Jehova Gâd witin ra pas paskan diara wala nani kainara. Baha mita, “Kraist lika paskanka nani sut ba tawahkia sa” (Kolosi 1:15). Baibil wisa Jehova bui Jisas ra dairik pali paskan, baha mita Gâd “Luhpia kumi baman bri kan ba” mâkisa (Jan 3:16). Jisas ba ai aisika lama pali kat wark takan, ai aisika ra hilp munan diara wala nani sut ba paskaia (Sins Lâka 8:30 aisi kaikma). Jisas ba Jehova wal asla lâka liliakira kum brisa. Witin kasak lâka ba kat Jehova warkka daukisa, Jisas ba Gâd “bîla” sika, baha mita Gâd adarka bara smalkanka nani ba Jisas upla ra yabisa (Jan 1:14).
2. ¿Dîa muni Jisas ba tasba ra balan?
Piu luan ra 2,000 mani prais baku, Jehova sain pranakira kum daukan. Jisas heven ra kan, sakuna Jehova ai spirit holikira yus muni Jisas rayaka brih tiara aihwa plauya ba ra mangkan, baha tiarika nina ba Meri. Baku tnatka ra Jisas ba upla baku aisubi takan (Luk 1:34, 35 aisi kaikma). Jehova Jisas ra blikan naha tasba ra Kraist takaia dukiara, apia kaka, pramis munan Misaya ba, bara baku upla nani sut swaki sakaia. a Prapit nani dahra aisanka sut Misaya dukiara aisan ba aimakan, baku tnatka ra upla nu takaia sip kan Jisas ba “Misaya, Gâd rayakira ba Luhpia” (Matiu 16:16).
3. ¿Naiwa piua ra Jisas anira sa?
Jisas ba naha tasba ra pruan taim, Gâd bui witin ra raiti wina bukan bara insal baku kli heven ra wan. Bahara, “Gâd mita kau prana tara ba witin ra” yaban (Pilipai 2:9). Naiwa piua ra, Jisas ba tâ briaia karnika tara kum brisa, Jehova baman kau karnika tara brisa witin wal.
KAU LAN TAKS
Kaisa kau laki kaikaia Jisas tânka ba, baku sin lan takbia dîa muni diara tara sa witin ra kakaira takaia.
4. Diara sut karnika tara bri Gâdka ba Jisas apia sa
Baibil wisa Jisas ba spirit karnakira kum sa heven ra, sakuna witin Jehova bîla walisa, kan Jehova Jisas aisika bara ai Gâdka sa. ¿Dîa muni yawan baku wisa? LILKA ba kaikma, bara baku wan tânka bribia nahki tnatka ra Jisas ba sât wala sa Gâd kau karnika tara bri ba wal.
Naha tikska nani na, hilp wan munisa wan tânka briaia Jisas bara Jehova nahki tnatka ra asla wark takisa. Tikska bani aisi kaikma, bara naha dukiara aisi banhma.
Luk 1:30-32 aisi kaikma.
-
Insal win ba kat, ¿Jisas bara Jehova “Gâd Laih Purara iwi ba” wal dîa sa ki?
Matiu 3:16, 17 aisi kaikma.
-
Jisas ra tahbi daukisi lî wina takan taim, ¿heven wina bîla baikra ba dîa win?
-
¿Heven wina ya mita aisan lukisma?
Jan 14:28 aisi kaikma.
-
¿Ya kau almuk sa bara ya kau tâ briaia karnika brisa sa ki: aisa kum, apia kaka ai luhpia ba?
-
Jisas ba Jehova ra “Aisa” mâki win taim, ¿dîa tânka marikisa?
Jan 12:49 aisi kaikma.
-
Naha tikska ba ra, ¿Jisas ba lukisa ki witin ba ai aisika wal sim sât sa ki? ¿Man dîa lukisma?
5. Jisas marikan witin Misaya kan ba
Baibil ra prapit nani dahra aisanka ailal bâra sa, baha sut upla ra hilp munan Misaya ba sakaia, kan Gâd mita witin ra wahbi sakan upla nani sut ra swaki sakaia dukiara. LILKA ba kaikma, bara taim kunhku ra lan takma nahki prapit nani dahra aisanka kum kum ba Jisas piua ra aimakan tasba ra balan taim.
Prapit nani dahra aisanka Baibil ra taki ba aisi kaikma, bara naha dukiara aisi banhma:
Miqueas 5:2 aisi kaikma, bara lan takma anira Misaya ba aisubi takaia kan. b
-
¿Baha prapit dahra aisanka ba Jisas aisubi takan taim aimakan ki? (Matiu 2:1).
Lawana Nani 34:20 bara Sakaraya 12:10 aisi kaikma, bara tânka kum kum brima nahki Jisas pruan piua ra prapit nani dahra aisanka ba aimakan.
-
¿Prapit nani dahra aisanka na aimakan ki? (Jan 19:33-37).
-
¿Man lukisma baha sut takan ba Jisas silp daukan diara rait baku upla kaikbia dukiara?
-
¿Jisas dukiara man dîa lukisma?
6. Jisas ra kakaira takaia ba yamni wan munisa
Baibil ba wan wisa diara tânka tara sa Jisas wina lan takaia, bara ani warkka tara Gâd yaban ba sin. Jan 14:6 bara 17:3 aisi kaikma, bara naha dukiara aisi banhma:
-
¿Dîa muni diara tara sa ki Jisas ra kakaira takaia?
Jisas ba yabal kum kwâkan yawan Gâd pânika takaia dukiara. Witin ba Jehova kasak tânka ba smalkan. Bara Jisas bâk wan rayaka ba ban kaia ra briaia sip sa.
UPLA KUM KUM NAKU LUKISA: “Jehova witniska nani ba Jisas ra kasak lukras”.
-
¿Bara man baha dukiara dîa wima?
DÎA LAN TAKRAM
Jisas ba spirit karnakira kum sa. Gâd luhpia sa, bara witin Misaya ba.
Wan kupia krawaia
-
¿Dîa muni Baibil wisa Jisas ba “paskanka nani sut ba tawahkia” sa?
-
Jisas ba tasba ra kau balras kainara, ¿heven ra dîa dauki kan?
-
¿Yawan nahki nu sa Jisas ba Misaya?
KAU PLIKI KAIKS
Tânka wala nani sin pliki kaiks, baha ba wan marikisa Jisas ba Misaya.
“¿Prapit nani dahra aisanka ba nahki marikisa Jisas ba Misaya kan ba?” (jw.org ra kaiks)
Kaiks Baibil dîa wisa, ¿upla nani ai luhpia bri ba baku Gâd ba Jisas aisika takan?
“¿Dîa muni Jisas ra Gâd Luhpia ba mâkisa?” (jw.org ra kaiks)
Tânka pliki kaiks, dîa muni Gâd kumi ra yumhpa smalkanka ba Baibil wina apia sa.
Aisi kaiks nahki mairin kum ai rayaka ba chens takan Jisas dukiara Baibil smalki ba stadi takan piua ra.
a Smalkanka 26 bara 27 ba mariki kabia dîa muni upla nani sut ba nit sa swaki sakan kaia, bara nahki Jisas swaki wan sakisa.
b Kaikma ulbanka tâka 2 ra, nahki prapit dahra aisanka kum marikisa ani piua pali ra Misaya ba tasba ra bal takaia kan.
Baha sin laik kaikma
JEHOVA WITNISKA NANI DUKIARA UPLA NANI DÎA MAKABI WALI BA
¿Jehova witniska nani Baibil klaska yabi ba nahki sa ki?
Jehova witniska nani Baibil klaska yabi ba ra, man ani Baibil bîla lakanka want sma ba yus munaia sip sma. Baku sin, pamalikam apia kaka pâmnika nani paiwaia sip sma.
