OSHILESHWA 15
Jesus oye lye?
Jesus oye gumwe gwomaantu mboka ya tseyika nawa mondjokonona. Ihe nonando aantu oyendji oye shi edhina lye, kaye shi oshindji kombinga ye, noyendji oye na omataloko ogendji ga yoolokathana kutya oye lye. Ombiimbeli otayi ti ngiini kombinga ye?
1. Jesus oye lye?
Jesus omuntu gwopambepo omunankondo ngoka ha kala megulu. Oye a shitwa tango kuJehova Kalunga manga inaa shita iinima yilwe ayihe. Omolwetompelo ndyoka, oha ithanwa “omutango gwiishitwa ayihe.” (Aakolossa 1:15) Ombiimbeli otayi ti kutya Jesus oye “Omwana awike” gwaKalunga, oshoka Oye mwene e mu shita. (Johannes 3:16) Jesus okwa li a longo pamwe naHe, Jehova, te mu kwathele mokushita iinima yilwe ayihe. (Lesha Omayeletumbulo 8:30.) Natango Jesus oku na ekwatathano lyopothingo naJehova. Oha longo nuudhiginini e li omupopikalelipo gwaKalunga, ano e li “Ohapu,” ta gandja omatumwalaka nomalombwelo Ge. — Johannes 1:14.
2. Omolwashike Jesus i ile kombanda yevi?
Omimvo 2 000 nasha dha ka pita, Jehova okwa li a longo oshikumithalonga, sho a longitha ombepo ye ondjapuki mokulundululila omwenyo gwaJesus moshivalelo shomukadhona Maria, okuza megulu. Kungawo, Jesus okwa li a valwa e li omuntu gwopanyama. (Lesha Lukas 1:34, 35.) Jesus okwi ile kombanda yevi a ninge Mesiasa nenge Kristus ngoka a li u uvanekwa noku hupithe aantu. a Omahunganeko agehe ngoka ga popya kombinga yaMesiasa oga li ge mu gwanithilwa, noga li ga kwathele aantu ya dhimbulule kutya Jesus oye “Kristus, Omuna gwaKalunga omunamwenyo.” — Mateus 16:16.
3. Jesus oku li peni ngashingeyi?
Konima sho Jesus a si e li omuntu gwopanyama, Kalunga okwe mu yumudha e li omuntu gwopambepo, e ta shuna megulu. Moka “Kalunga okwe mu yele pombandambanda.” (Aafilippi 2:9) Ngashingeyi Jesus oku na ondondo onene yokupangela, oye a landula Jehova.
ILONGA OSHINDJI
Ilonga oshindji kutya Jesus oye lye naanaa, nomolwashike sha simanenena okwiilonga kombinga ye.
4. Jesus ke shi Kalunga Omunankondoadhihe
Ombiimbeli otayi ti kutya nonando Jesus oshishitwa shopambepo oshinankondo shi li megulu, oha vulika kuHe, Jehova Kalunga. Omolwashike tatu tile ngawo? Dhana OKAVIDIO haka, wu tale shoka Ombiimbeli tayi tu longo nkene Jesus a yooloka ko kuKalunga Omunankondoadhihe.
Omanyolo taga landula otage tu kwathele tu mone eyooloko ndyoka li li pokati kaJehova naJesus. Lesha enyolo kehe, e tamu kundathana omapulo taga landula.
Lesha Lukas 1:30-32.
-
Omuyengeli okwa ti ngiini kombinga yeyooloko ndyoka li li pokati kaJesus naJehova, “gwokombandambanda”?
Lesha Mateus 3:16, 17.
-
Sho Jesus a ninginithwa, megulu omwa zi ewi tali ti ngiini?
-
Sho to tala, ewi ndyoka olya li lyalye?
Lesha Johannes 14:28.
-
Pokati kahe omuvali nomwanamati, olye omukuluntu noku na oonkondopangelo dhi vule dhamukwawo?
-
Jesus okwa li a hala okutya shike, sho i ithana Jehova, He?
Lesha Johannes 12:49.
-
Mbela Jesus oha dhiladhila kutya ye naHe omuntu gumwe? Ngoye oto ti ngiini?
5. Jesus okwe shi ulike kutya oye Mesiasa
MOmbiimbeli omu na omahunganeko ogendji ngoka ga kwathela aantu ya ndhindhilike mo Mesiasa, ano omuntu ngoka a hogololwa kuKalunga a hupithe aantu. Dhana OKAVIDIO haka, wi ilonge paufupi kombinga yomahunganeko gamwe ngoka Jesus a gwanitha po sho i ile kombanda yevi.
Lesha omahunganeko ngaka gOmbiimbeli, e tamu kundathana omapulo taga landula:
Lesha Mika 5:2, wu uve mpoka Mesiasa a li ta ka valelwa. b
-
Mbela okuvalwa kwaJesus okwa gwanitha po ehunganeko ndika? — Mateus 2:1.
Lesha Episalomi 34:20; Sakaria 12:10, wu mone uuyelele waashoka sha li sha hunganekwa kombinga yeso lyaMesiasa.
-
Omahunganeko ngoka oga gwanithwa ngaa? — Johannes 19:33-37.
-
Sho to tala, Jesus okwa li ngaa ta vulu okuningitha omauvaneko ngono ga gwanithwe?
-
Mbela shoka otashi ku ulukile shike kombinga yaJesus?
6. Ohatu mono mo uuwanawa mokwiilonga kombinga yaJesus
Ombiimbeli otayi ti kutya osha simana noonkondo okwiilonga kombinga yaJesus, naashoka Kalunga a hala a ninge. Lesha Johannes 14:6 nosho wo 17:3, e tamu kundathana epulo tali landula:
-
Omolwashike sha simanenena okwiilonga kombinga yaJesus?
Jesus okwe tu palela ondjila, opo tu vule okupanga uukuume naKalunga. Okwa longa aantu oshili kombinga yaJehova, nokupitila muye otatu vulu okumona omwenyo gwaaluhe
AANTU YAMWE OHAYA TI: “Oonzapo dhaJehova inadhi itaala muJesus.”
-
Oto ke ya yamukula ngiini?
OWI ILONGO SHIKE?
Jesus omuntu gwopambepo omunankondo. Omuna gwaKalunga noku li Mesiasa.
Omapulo geendululo
-
Omolwashike Jesus ti ithanwa “omutango gwiishitwa ayihe”?
-
Manga Jesus inee ya kombanda yevi, okwa li ha ningi shike?
-
Otu shi shi ngiini kutya Jesus oye Mesiasa?
UUYELELE WA GWEDHWA PO
Ilonga oshindji kombinga yonkandangala ndjoka Jesus ta dhana e li Mesiasa.
Lesha Ombiimbeli wu uve ngele otayi ti ngaa kutya Kalunga okwa ningi he yaJesus, ngaashi oohe yopantu haya vala aanona.
“Omolwashike Jesus hi ithanwa Omuna gwaKalunga?” (Oshitopolwa shi li kepandja lyetu lyokointaneta)
Tala kutya omolwashike Uukwatatu kaawu shi elongo lyopaMbiimbeli.
Lesha wu uve nkene onkalamwenyo yomukiintu gumwe ya lunduluka, konima sho i ilongo shoka Ombiimbeli tayi ti kombinga yaJesus.
“Omukiintu Omujuda ta yelitha kutya omolwashike a talulula eitaalo lye” (Penduka mo! Mei 2013)
a Oshileshwa 26 no 27 otashi ka kundathana kutya omolwashike aantu ya li ya pumbwa okuhupithwa nongiini Jesus e tu hupitha.
b Tala Eyelitho 2 wu mone ehunganeko ndyoka lya popya kondandalunde kutya Jesus okwa li te ke ya uunake kombanda yevi.
Opu na ishewe uuyelele mbuka
OMAPULO NGOKA HAGA PULWA OLUNDJI KOMBINGA YOONZAPO DHAJEHOVA
Ekonakonombiimbeli ndyoka hali ningwa kOonzapo dhaJehova oshike?
Oto vulu okulongitha Ombiimbeli kehe mootundi dhopaMbiimbeli dhoshali, ndhoka hadhi ningwa kOonzapo dhaJehova. Oto vulu okuhiya aantu yaandjeni nenge ookuume koye.
