MUTU 15

Kansi Yesu ni Ŵani?

MVWISHILANI

Kansi Yesu ni Ŵani?

Yesu ni m’mozi mwa ŵanthu ochuka ngako m’mbili ya ŵanthu. Ŵanthu anyinji oiziŵa zina yake, koma oziŵa lini zinyinji zokhuza yove. Ndipo anyinji ali na maganizo osiyanasiyana okhuza Yesu. Kansi Baibo yutiuzhyanji ponena za Yesu?

1. Kansi Yesu ni Ŵani?

Yesu ni mngelo wamphamvu, wamene onkhala kululu. Yehova Mulungu eyambila kulenga yove akaliyolenga cinthu ciliconse. Ndiye cifukwa cake oitiwa kuti “woyamba kuvyalika wa cilengedwe conse.” (Akolose 1:15) Baibo yukamba kuti Yesu ni “mwana wovyalika yeka wa Mulungu,” cifukwa ni yove yeka elengewa mwacindunji na Yehova. (Yohane 3:16) Yesu eseŵenzela pamozi na Ausuwake, Yehova, polenga vinthu vonse. (Ŵelengani Miyambo 8:30.) Mpaka lomba, Yesu akali pa ushamwali wotang’a na Yehova. Otumikila mokhulupilika monga “Mau” kapena kuti wolaŵililako wa Mulungu, popeleka mauthenga na malangizo ku angelo na ŵanthu.—Yohane 1:14.

2. Kansi Yesu ewela kuzocitanji pacalo?

Vyaka pafupifupi 2,000 vapita, Yehova ecita cozizwisa. Eseŵenzesha mzimu wake pokukisha moyo wa Yesu kucoka kululu nouika m’mala mwa Mariya, wamene panthawi iyo enze akali ndola. Izi zecitisha kuti Yesu avyalike monga munthu. (Ŵelengani Luka 1:34, 35.) Yesu ewela pacalo monga Mesiya wolonjezewa kapena kuti Khristu, na kupulumusa ŵanthu. a Maulosi onse onena za Mesiya ekwanilishiwa mwa Yesu. Izi zeyavya ŵanthu kuti amuzindikile kuti ni “Khristu, Mwana wa Mulungu wamoyo.”—Mateyu 16:16.

3. Kansi Yesu ali kuni pali lomba?

Pavuli pakuti Yesu wafwa monga munthu, eukishiwa monga mngelo wamphamvu ndipo ewelela kululu. Peciwelela kululu, “Mulungu emukweza nomuika pamalo apalulu.” (Afilipi 2:9) Lomba, Yesu ali na udindo ukulu ngako. Ni Yehova tyala wamene ali na mphamvu kupambana Yesu.

PHUNZILANI ZINYINJI

Ziŵani zinyinji zokhuza Yesu. Ndipo onani cifukwa cake kuphunzila za yove ni kofunika ngako.

4. Pali kusiyana pakati pa Yesu na Mulungu Wamphamvuzonse

Baibo yuphunzisa kuti, olo kuti Yesu ni mngelo wamphamvu kululu, ogonjela Ausuwake na Mulungu wake, Yehova. Ndaŵa yanji zili tetyo? Onelelani VIDYO kuti muone zayukamba Baibo zokhuza kusiyana kulipo pakati pa Yesu na Mulungu Wamphamvuzonse.

VIDYO: Kansi Yesu Khristu ni Mulungu? (3:22)

Malemba okonkhapo otiyavya kumvwisha kusiyana kulipo pakati pa Yehova na Yesu. Ŵelengani lemba iliyonse nokambilana makonsho ali pansi pake.

Ŵelengani Luka 1:30-32.

Kansi mngelo efotokoza kuti pali kusiyana kotyani pakati pa Yesu na Yehova Mulungu, wamene ni “wapalulu ngako”?

Ŵelengani Mateyu 3:16, 17.

Yesu penzobatizika, kansi kululu kwemvwika mau otyani?
Muganiza kuti ni ŵani elaŵila mau aŵa?

Ŵelengani Yohane 14:28.

Kansi ni ŵani onkhala na ulamulilo ukulu pakati pa awisi na mwana?
Yesu enzoita Yehova kuti Atata. Kansi izi zutiphunzisanji?

Ŵelengani Yohane 12:49.

Kansi Yesu oganiza kuti olingana na Ausuwake? Mweo muganiza tyani?

5. Umboni woonesha kuti Yesu ni Mesiya

M’Baibo muli maulosi anyinji amene eyavya ŵanthu kuzindikila Mesiya—wamene esankhiwa na Mulungu kuti apulumuse ŵanthu. Onelelani VIDYO kuti muone ayakine mwa maulosi yecikwanilisha Yesu peenze pacalo.

VIDYO: Yesu Ekwanilisha Ulosi (3:03)

Ŵelengani maulosi aŵa nokambilana makonsho ali pansi pake:

Ŵelengani Mika 5:2 kuti muone kweenzofunika kuvyalikila Mesiya. b

Kansi n’cendi kuti kuvyalika kwa Yesu kwekwanilisha ulosi uyu?—Mateyu 2:1.

Ŵelengani Salimo 34:20 na Zekariya 12:10 kuti muone zeyelosela Baibo zokhuza imfwa ya Mesiya.

Kansi maulosi aŵa ekwanilishiwa cendi?—Yohane 19:33-37.
Muganiza kuti Yesu ndiye ecitisha kuti maulosi aŵa akwanilishiwe?
Kansi izi zakusimikizhyilani cinji ponena za Yesu?

6. Mapindu yatupeza ngati tuphunzila za Yesu

Baibo yukamba kuti tufunika kuphunzila za Yesu na udindo wake. Ŵelengani Yohane 14:6 na 17:3, nokambilana konsho iyi:

Ndaŵa yanji tufunika kuphunzila za Yesu?

Yesu esegula njila yakuti tinkhale pa ushamwali na Mulungu. Ephunzisa cendi cokhuza Yehova, ndipo kupitila mwa yove, tingankhale na moyo kosasila

ŴANTHU AYAKINE OKAMBA KUTI: “A Mboni za Yehova okhulupilila lini Yesu.”