ƐZUKOALƐDEƐ 15
Gyisɛse A Le Nwane?
Gyisɛse le menli mɔɔ ɛlie duma kpalɛ la anu ko. Menli dɔɔnwo ze Gyisɛse duma noko bɛnze ɔ nwo edwɛkɛ dɔɔnwo yɛɛ menli dɔɔnwo lɛ kɛzi Gyisɛse de la anwo adwenle ngakyile. Duzu a Baebolo ne ka ye wɔ ɔ nwo a?
1. Gyisɛse a le nwane?
Gyisɛse le sunsum nu abɔdeɛ mɔɔ lɛ tumi mɔɔ wɔ anwuma a. Gyihova Nyamenle bɔle ye kolaa na yeabɔ debie gyɛne biala. Ɛhye ati a bɛfɛlɛ ye “abɔdeɛ muala anu belamunli ralɛ a.” (Kɔlɔsaema 1:15) Baebolo ne ka kɛ Gyisɛse le Nyamenle ‘Ara kokye’ ɔluakɛ ɔ ngome ala a Gyihova angomekye bɔle ye a. (Dwɔn 3:16) Gyisɛse nee ɔ Ze Gyihova bɔle nu yɛle gyima, na ɔboale Gyihova ɔmaanle ɔbɔle ninyɛne kɔsɔɔti mɔɔ ɛha la. (Kenga Mrɛlɛbulɛ 8:30.) Gyisɛse nee Gyihova agɔnwolɛvalɛ ne tɛde kyengye. Ɔfa nɔhalɛlilɛ ɔyɛ gyima kɛ Nyamenle kpɔmavolɛ, “Edwɛkɛ ne,” na ɔfa Gyihova nrɛlaleɛ nee ye adehilelɛ ɔmaa.—Dwɔn 1:14.
2. Duzu ati a Gyisɛse rale azɛlɛ ye azo a?
Kɛyɛ ɛvolɛ 2,000 mɔɔ ɛze ɛhɔ la, Gyihova luale ye sunsum nwuanzanwuanza ne azo yele Gyisɛse ngoane vile anwuma wɔ nwanwane adenle zo rawulale bɛlɛra bie mɔɔ ɛnze nrenyia mɔɔ bɛfɛlɛ ye Mɛle la awodeɛ nu. Adenle ɛhye a bɛluale zo bɛwole Gyisɛse kɛ dasanli a. (Kenga Luku 1:34, 35.) Gyisɛse rale azɛlɛ ye azo kɛ Mɛzaya anzɛɛ Kelaese ne mɔɔ bɛbɔ ɔ nwo ɛwɔkɛ la amaa yealie alesama. a Baebolo ngapezo kɔsɔɔti mɔɔ fale Mɛzaya ne anwo la luale ɔ nwo zo rale nu, na ɔmaanle menli nwunle Gyisɛse kɛ yemɔ a le “Kelaese ne, tease Nyamenle ne Ara ne a.”—Mateyu 16:16.
3. Kɛkala Gyisɛse wɔ ni?
Mɔɔ Gyisɛse wule la, bɛdwazole ye kɛ sunsum nu abɔdeɛ na ɔziale ɔhɔle anwuma. Wɔ ɛkɛ ne, “Nyamenle kpogyale ye zo na ɔmaanle ye dibilɛ kpole kpalɛ.” (Felepaema 2:9) Kɛkala Gyisɛse lɛ tumi kpole—ɛye Gyihova a ɔdaye a ɔwɔ ɛkɛ a.
SUKOA DƆƆNWO
Sukoa kɛzi Gyisɛse de nee deɛmɔti ɔhyia kɛ ɛsukoa ɔ nwo ninyɛne dɔɔnwo la anwo debie.
4. Gyisɛse ɛnle Nyamenle Tumivolɛ Bedevinli
Baebolo ne kilehile kɛ Gyisɛse le sunsum nu abɔdeɛ mɔɔ lɛ tumi wɔ anwuma ɛdeɛ, noko ɔbɛlɛ ɔ nwo aze ɔmaa ye Nyamenle nee ɔ Ze Gyihova. Duzu ati a yɛkola yɛka ye zɔ a? Ye VIDIO ne na nea kɛzi Baebolo ne kilehile ngakyile mɔɔ wɔ Gyisɛse nee Nyamenle tumivolɛ bedevinli ne avinli la.
Ngɛlɛlera ɛhye mɔ boa yɛ maa yɛnwu ngakyile mɔɔ wɔ Gyihova nee Gyisɛse avinli la. Kenga tɛkese ko biala na akee bɛzuzu kpuya ɛhye mɔ anwo.
Kenga Luku 1:30-32.
-
Kɛzi edwɛkɛ mɔɔ anwumabɔvolɛ ne hanle la kile kɛ ngakyile wɔ Gyisɛse nee Gyihova Nyamenle, “Anwuma Anwumanli ne” avinli ɛ?
Kenga Mateyu 3:16, 17.
-
Mekɛ mɔɔ bɛzɔnenle Gyisɛse la, duzu a ɛnelɛ ne mɔɔ vi anwuma la hanle a?
-
Ɛnea a nwane ane ɔ?
Kenga Dwɔn 14:28.
-
Boni a le kpanyinli na ɔlɛ tumi kpole a? Selɛ anzɛɛ ralɛ?
-
Mekɛ mɔɔ Gyisɛse hanle kɛ Gyihova le ɔ Ze la ɛnee duzu a ɔkpondɛ yeahile a?
Kenga Dwɔn 12:49.
-
Asoo ɛnee Gyisɛse ɛlɛkile kɛ ɔdaye ko ne ala a le Selɛ ne ɔ? Kɛzi ɛnwu ye ɛ?
5. Gyisɛse maanle ɔlale ali kɛ ɔdaye a ɔle Mɛzaya ne a
Ngapezo dɔɔnwo wɔ Baebolo ne anu mɔɔ bamaa menli anwu Mɛzaya ne—ahenle mɔɔ Nyamenle ɛkpa ye kɛ ɔralie alesama la. Ye VIDIO ne na nea ngapezo bie mɔ mɔɔ luale Gyisɛse anwo zo rale nu wɔ mekɛ mɔɔ ɔwɔ azɛlɛ ye azo la anu ekyi.
Kenga Baebolo ngapezo ɛhye mɔ, na akee bɛzuzu kpuya ɛhye mɔ anwo:
Kenga Maeka 5:2 na nea ɛleka mɔɔ ɔhilele kɛ bɛbawo Mɛzaya ne la. b
-
Asoo Gyisɛse awolɛ ne maanle ngapezo ɛhye rale nu?—Mateyu 2:1.
Kenga Edwɛne 34:20 yɛɛ Zɛkalaya 12:10 na nea ngapezo dɔɔnwo mɔɔ fale Mɛzaya ne ewule ne anwo la.
-
Asoo ngapezo ɛhye mɔ rale nu?—Dwɔn 19:33-37.
-
Ɛnea a Gyisɛse a hyehyɛle maanle ngapezo ɛhye mɔ rale nu ɔ?
-
Duzu a ɛhye maa ɛnwu ye wɔ Gyisɛse anwo a?
6. Yɛsukoa Gyisɛse anwo debie a ɔboa yɛ
Baebolo ne maa yɛnwu kɛ ɔhyia kɛ yɛsukoa Gyisɛse nee ye gyinlabelɛ ne anwo debie. Kenga Dwɔn 14:6 nee 17:3, na akee bɛzuzu kpuya ɛhye anwo:
-
Duzu ati a ɔhyia kɛ yɛsukoa Gyisɛse anwo debie a?
Gyisɛse ɛbuke adenle mɔɔ bamaa awie ayɛ Nyamenle agɔnwo la. Ɔhilehilele Gyihova anwo nɔhalɛ ne, na ɔlua ɔ nwo zo yɛbahola yɛanyia dahuu ngoane
BIE MƆ KA KƐ: “Gyihova Alasevolɛ ɛnlie Gyisɛse ɛnli.”
-
Kɛzi ɛbaye ɔ nloa ɛ?
EDWƐKƐ TITILI
Gyisɛse le sunsum nu abɔdeɛ mɔɔ lɛ tumi. Ɔle Nyamenle Ara yɛɛ yemɔ a ɔle Mɛzaya ne a.
Ndinu
-
Duzu ati a bɛfɛlɛ Gyisɛse “abɔdeɛ muala anu belamunli ralɛ a”?
-
Duzu a Gyisɛse yɛle kolaa na yeara azɛlɛ ye azo a?
-
Kɛzi yɛkola yɛnwu kɛ Gyisɛse a le Mɛzaya ne ɛ?
KPONDƐ DƆƆNWO
Sukoa mɔɔ maa yɛnwu kɛ Gyisɛse a le Mɛzaya ne la anwo ninyɛne dɔɔnwo.
“Asoo Mɛzaya Ne Anwo Ngapezo Maa Ɔda Ali Kɛ Gyisɛse A Le Mɛzaya Ne Ɔ?” (Edwɛkɛ mɔɔ wɔ jw.org azo)
Nea saa Baebolo ne kilehile kɛ Nyamenle wole Gyisɛse kɛ mɔɔ alesama wo ngakula la a.
“Duzu Ati A Bɛfɛlɛ Gyisɛse Kɛ Nyamenle Ara Ɛ?” (Edwɛkɛ mɔɔ wɔ jw.org azo)
Sukoa deɛmɔti Nsa-Ko Nyamenle ne ɛnle Baebolo ngilehilelɛ la.
Kenga kɛzi raalɛ bie ɛbɛlabɔlɛ hakyile wɔ mekɛ mɔɔ ɔnleɛnleanle mɔɔ Baebolo ne ka ye wɔ Gyisɛse anwo la anu ɔwiele la.
“Dwuunli Raalɛ Bie Hilehilele Deɛmɔti Ɔziale Ɔzuzule Ye Diedi Ne Anwo La Anu” (Awake!, May 2013)
a Ɛzukoalɛdeɛ 26 nee 27 baha deɛmɔti ɔhyia kɛ bɛdie alesama nee kɛzi Gyisɛse ɛlie yɛ la anwo edwɛkɛ.
b Nea Awieleɛdwɛkɛ 2 amaa wɔanwu ngapezo mɔɔ hilele mekɛ fɔɔnwo mɔɔ Gyisɛse bala ɔ nwo ali wɔ azɛlɛ ye azo la.
Bie A Eza Ɛ Nye Balie
KPUYA MƆƆ MENLI TA BIZA
Baebolo Ɛzukoalɛ Nwo Ngyehyɛleɛ Boni A Gyihova Alasevolɛ Yɛ A?
Wɔ Baebolo ɛzukoalɛ nwo ngyehyɛleɛ mɔɔ Gyihova Alasevolɛ ɛyɛ mɔɔ ɛndua ɛhwee la anu, ɛbahola wɔava Baebolo ngilebɛbo mɔɔ ɛ nye die nwo wɔali gyima. Saa ɛkulo kɛ ɛto ɛ sa ɛfɛlɛ wɔ abusua ne yɛɛ ɛ gɔnwo mɔ a, ɛbahola wɔayɛ zɔ.
