LESON 15
Wat Nao Truth Abaotem Jesus?
Jesus hem wanfala lo olketa famous pipol lo history. Staka pipol savve lo nem blo hem, bat olketa no savve lo staka samting abaotem hem. Staka pipol tu garem olketa difren idea abaotem Jesus. Wat nao Bible talem abaotem hem?
1. Wat nao truth abaotem Jesus?
Jesus hem wanfala spirit wea garem bigfala paoa and hem stap lo heven. Jehovah God wakem hem firstaem bifor hem wakem eni nara samting. From datwan, Bible kolem hem “firstborn long evri samting wea God wakem.” (Colossae 1:15) Bible sei Jesus hem “spesol son” blo God bikos Jehovah seleva nao creatim hem. (John 3:16) Jesus waka tugeta witim Dadi blo hem, Jehovah, and helpem Hem for creatim evri nara samting. (Readim Proverbs 8:30, NW.) Jesus barava fren gud witim Jehovah. Hem wanfala faithful spokesman blo God. Bible kolem hem “Word” bikos hem man for talemaot message and instruction blo God.—John 1:14.
2. Why nao Jesus kam lo earth?
Winim 2,000 year go finis, Jehovah duim wanfala mirakol. Hem iusim holy spirit for tekem laef blo Jesus from heven, and putim insaed bele blo wanfala virgin gele, wea nem blo hem Mary. From datwan, Jesus born olsem wanfala man lo earth. (Readim Luke 1:34, 35.) Jehovah sendem kam Jesus lo earth for kamap Messiah, wea nara title blo hem Christ, and for hem sevem iumi olketa man. a Evri profesi lo Bible abaotem Messiah hem kamap tru lo Jesus. Datwan helpem pipol for savve Jesus nao “datfala Christ, wea hem Son bilong datfala God wea laef.”—Matthew 16:16.
3. Jesus lo wea distaem?
Bihaen Jesus dae, God mekem hem laef bak and kamap wanfala spirit, then hem go bak lo heven. Lo there, “God givim hem position wea hae winim position bilong hem bifor.” (Philippi 2:9) Distaem Jesus garem bigfala position, and only Jehovah nomoa garem bigfala paoa winim Jesus.
DIG GO MOA
Lanem samfala samting moa abaotem Jesus and why hem important tumas for lane abaotem hem.
4. Jesus hem no Olmaeti God
Bible sei nomata Jesus hem wanfala spirit wea garem bigfala paoa wea stap lo heven, hem obeyim Jehovah wea hem God blo hem and Dadi blo hem tu. Why nao iumi sei olsem? Pleim VIDEO for lukim hao Bible storyim position blo Jesus no semsem witim olmaeti God.
Olketa scripture lo daon helpem iumi for savve Jehovah and Jesus no semsem. Readim each scripture, then discussim tugeta olketa kwestin wea stap andanit.
Readim Luke 1:30-32.
-
Wat nao angel talem wea showim Jesus and Jehovah God, datfala “Barava Haefala God” no semsem?
Readim Matthew 3:16, 17.
-
Taem Jesus baptaes, wat nao datfala voice from skae hem talem?
-
Iu tingse datwan hem voice blo hu?
Readim John 14:28.
-
Hu nao stap longtaem finis and garem bigfala paoa? Dadi or son?
-
Jesus sei Jehovah hem Dadi blo hem, wat nao iumi lanem from datwan?
Readim John 12:49.
-
Lo tingting blo Jesus, hem and Dadi blo hem tufala semsem? Hao nao tingting blo iu?
5. Wat nao pruvim Jesus hem Messiah?
Bible garem staka profesi wea helpem pipol for luksavve lo datfala Messiah wea God chusim for sevem iumi olketa man. Pleim VIDEO for lanem samfala profesi wea kamap tru lo Jesus taem hem stap lo earth.
Readim abaotem olketa Bible profesi lo daon, then discussim tugeta olketa kwestin wea stap andanit:
Readim Micah 5:2 (NW) for savve lo ples wea profesi sei Messiah bae born lo hem. b
-
Hao, disfala profesi hem kamap tru taem Jesus hem born?—Matthew 2:1.
Readim Psalm 34:20 (NW) and Zechariah 12:10 (NW) for lukim olketa samting wea profesi sei bae happen lo Messiah taem hem dae.
-
Hao, olketa profesi hia kamap tru?—John 19:33-37.
-
Iu tingse Jesus arrangem firstaem olketa samting hia wea happen?
-
Wat nao datwan showim abaotem Jesus?
6. Iumi kasem gud samting taem iumi lane abaotem Jesus
Bible sei hem important tumas for lane abaotem Jesus and waka wea hem duim. Readim John 14:6 and 17:3, then discussim tugeta disfala kwestin:
-
Why nao hem important for lane abaotem Jesus?
Jesus openem wei for iumi fren witim God. Hem teachim truth abaotem Jehovah, and bikos lo hem iumi savve kasem laef olowe
SAMFALA SAVVE TALEM: “Olketa Jehovah’s Witness no biliv lo Jesus.”
-
Wat nao bae iu talem?
MAIN POINT
Jesus hem wanfala spirit wea garem bigfala paoa. Hem Son blo God and hem datfala Messiah.
Review
-
Why nao Bible kolem Jesus “firstborn lo evri samting wea God wakem”?
-
Wat nao Jesus duim bifor hem kam lo earth?
-
Wat nao mekem iumi savve Jesus hem datfala Messiah?
FAENDAOT MOA
Lanem samfala samting moa wea mekem iumi savve Jesus nao hem Messiah.
“Hao, Olketa Profesi Abaotem Messiah Pruvim Jesus Nao Datfala Messiah?” (Article lo jw.org)
Waswe, Bible sei God kamap dadi blo Jesus lo sem wei wea wanfala man garem pikinini lo wanfala woman?
“Why Nao Bible Kolem Jesus Son blo God?” (Article lo jw.org)
Read abaotem why Bible no teachim trinity.
Read abaotem wanfala woman wea changem laef blo hem, bihaen hem lanem samting wea Bible talem abaotem Jesus.
“Jew Woman wea Storyim Why Hem Tingting Gud Moa Abaotem Religion blo Hem” (Awake!, May 2013)
Iu Laek Lukim Nara Samting?
OLKETA KWESTIN WEA STAKA PIPOL ASKEM
Wat Nao Bible Study Course blo Olketa Jehovah’s Witness?
Disfala Bible study course blo Olketa Jehovah’s Witness hem free nomoa, and iu savve iusim eni Bible transleison wea iu laekem. Iu savve invaetem olketa lo famili or eni fren blo iu for joinim disfala course.
