15 CAJ YACHACUY
¿Pitaj Jesús?
Jesustaga jutilanpa pï maypis reguipäcun, ichanga waquincunaga shumaj musyanchu rasunpa pï cashganta y öraga paypita jucnopa yarpapäcun. Pero ¿imatataj Biblia wilacun Jesuspita?
1. ¿Pitaj Jesús?
Jesusga juc poderniyoj angelmi cielucho caycan. Imaycatapis manaraj camarmi Jehovaga puntata payta camash. Chaymi payga caycan “lapan camashgancunapaj punta yurij” (Colosenses 1:15). Jehovaga quiquinmi Jesusta camash, chaymi Bibliapis nin “japallan cuyay wamran” cashganta (Juan 3:16). Imaycatapis camananpäga, Jesusmi Papänin Jehovata yanapargan (leiriy Proverbios 8:30). Jehovawan Jesusga cananyajmi cushi cushila y cuyanacur carcaycan. Payga Jehovapita “Willacogmi” cargan, chaymi Taytanpa mandamientuncunata runacunata yachachergan (Juan 1:14, Ambo-Pasco Biblia).
2. ¿Imapäraj cay Pachaman Jesús shamurgan?
Unay watachonami, Jehovaga churin Jesuspa cawayninta Mariapa pachanman churargan, chayno juc runano cay Pachacho yurinanpaj (leiriy Lucas 1:34, 35). Paytami Dios acrashga cay Pachaman shamuycur salvamänanchipaj. a Más unaypitana Diosninchega profetancunawan wilacamurgan salvamajninchi shamunanpaj, chaymi Jesustaga runacuna reguergan “cawaj Tayta Diospa Wamran Cristu” nir (Mateo 16:16).
3. ¿Maychotaj Jesús canan caycan?
Cay Pachacho Jesús wanuptin Taytan Jehová cawarachimurgan juc angelno cielucho yapay cawananpaj. Chaycho churashga “llapanpitapis mas munayniyoj cananpaj” (Filipenses 2:9). Cananga autoridäyojmi caycan cielucho, ichanga Taytalanmi paypa jananpa más poderniyoj caycan.
SHUMAJ YACHACURCUNAPAJ
Canan masraj yachacushun Jesús pï cashganta y imanirtaj payta reguinapaj calpachacushwan.
4. Jesusga manami Lapanta Puedej Dioschu
Autoridäyoj ángel cielucho Jesús caycarpis, Bibliaga ninmi Jehovata cäsucushganta, payga Diosnin y Taytanmi. ¿Imanirtaj chayta ninchi? VIDEUTA ricapäcuy Jehovapita y Jesuspita Biblia ima nishganta shumaj tantiapäcunayquipaj.
Gatejnin textucuna yachachimäshun Jehovapa churin Jesús cashganta. Cay textucunata leipäcuy y chaycunapita parlapacäriy:
Leipäcuy Lucas 1:30-32.
-
Ángel nishganno, ¿Jehovapa imantaj Jesús cargan?
Leipäcuy Mateo 3:16, 17.
-
Jesús bautizacushgan junajcho, ¿imataj cielupita mayacargan?
-
¿Piraj cielupita parlamurgan?
Leipäcuy Juan 14:28.
-
¿Wasicho pitaj más autoridäyoj canman, tayta caj o wamra caj?
-
¿Imanirtaj “Taytä” nir Jesusga Jehovata gayargan?
Leipäcuy Juan 12:49.
-
‘Taytä mandamash’ Jesús niptenga, ¿pipätaj parlaycargan?, ¿quiquinpaj? ¿Ima ninquitaj gam?
5. Jesusmi salvamänanchipaj acrashga cargan
Bibliacho profeciacunaga mayna wilacoj salvamänanchipaj pï shamunanpaj, Dios acrashgan pï cashgantapis. VIDEUTA ricapäcuy musyanapaj ima profeciacunataj cumplicaycämurgan Jesús cay Pachacho cashgan wichan.
Cay profeciacunata leipäcuy y chaycunapita parlapacäriy:
Leipäcuy Miqueas 5:2 textuta musyanayquipaj Mesías maycho yurinanpaj. b
-
¿Chauraga maychotaj Jesús yurergan Biblia nishgannola? (Mateo 2:1).
Leipäcuy Salmo 34:20 y Zacarías 12:10 textucunata, chaycho caycan Jesús imano wanunanpaj wilacoj profeciacuna.
-
¿Chay unay profeciacuna cumplicurganchuraj? (Juan 19:33-37).
-
¿Chay profeciacuna cumplicänanta munarlachuraj Jesusga imatapis adrede rurash?
-
Shumaj tantiapashgana carga, ¿ima ninquitaj canan Jesuspita?
6. Jesuspita yachacushganchega alipämi canga
Bibliaga wilacunmi Jesuspita yachacushganchi alipaj cananpaj, ¿payga manachu salvamänanchipaj shamushga? Leipäcuy Juan 14:6 y 17:3 y caypita parlapacäriy:
-
¿Imanirtaj Jesuspita yachacunapaj masraj calpachacushwan?
Jesusmi caminuta quichajno caycan Diosta reguinapaj. Jehovapita rasunpa cajta yachachicush. Wanushganraycurmi mana wanuypa cawaytapis chasquishun.
WAQUINCUNA NIPÄCUN: “Jehovapa testiguncunaga manami Jesusman creinchu”.
-
¿Chaynolachu gampis yarpanqui?
ICHIC YACHACUY
Jesusga juc poderniyoj angelmi; Diospa Churinmi y salvamänanchipaj acrashga cajmi.
Yarpänapaj
-
¿Imanirtaj Jesuspita ninchi ‘lapan camashga cajcunapa punta yurij’ cashganta?
-
¿Imacunataraj Jesús ruraycargan cay Pachaman manaraj shamur?
-
¿Imanirtaj ninchi Jesusga Dios acrashgan Mesías cashganta?
MASLATA YACHACUNAYQUIPAJ
Dios acrashgan Mesías Jesús cashganta musyanayquipaj, caycho masla yachacuy.
“¿Jesús Mesías cananpaj Biblia wilacamushganga cumplicashgachuraj?” (jw.org paginapita yachachicuy)
Mamayoj taytayoj captinrämi wamracuna yurimun, ¿chaynochuraj Jesuspäpis cieluchoga taytancuna cargan? Biblia ima nishganta yachacuy.
“¿Imanirtaj Jesustaga Diospa Churin cashganta ninchi?” (jw.org paginapita yachachicuy)
Juclaylacho quimsa dioscuna cashgantaga manami Biblia yachachicunchu.
Leinayquipaj caycan imanotaj juc warmita yanapargan Jesuspita Bibliacho shumaj yachacushgan.
“Judía warmi wilacamun imanirtaj jucnopa creir galaycurgan” (¡Ricchayna!, mayo 2013)
a 26 y 27 caj yachacuycunacho maslata yachacushun imanir y imano Jesús salvaycalämanchi.
b Ricäriy ishcay caj notata musyanayquipaj cay Pachaman Mesías imay shamunanpa cajta.
