YAĆHACHICUY 15
¿Mayanmi Jesús?
Llapan yupay nunacuna Jesuspi limalpis, manam sumächu paypi yaćhapäcun, chaymi paypi jucta-jucta limayalcan. Pero Bibliaca, ¿ima ninmi paypi?
1. ¿Mayanmi Jesús?
Jesús yaćhan cielućhumi poderniyü espiritum. Manalapis imactapis lulalmi Jehová Jesusta licalichila. Chaymi Bibliaca nin: “Paymi lluy camaśhancunapïpis […] puntacta calaña” (Colosenses 1:15). Bibliaca nintacmi Jesús Diospa ‘japallan chulin’, chayta nin Jehovami mana mayanpapis yanapaśha licalichila Jesusta (Juan 3:16). Jesus Taytanwan trabajala, lluy imacunactapis licalichinanpä (liguicuy Proverbios 8:30). Canancamam paycuna cuscallan cäculcan. Jesusta śhutichantacmi “Palabra” nishanwan, cay ninanmi, Dios imactapis nïta munaśhancunactam, Jesús willaycuyan juccunaman (Juan 1:14).
2. ¿Imapämi Jesús śhamula cay allpaman?
Pasacun 2,000 watañam, Jehová poderninwan milagructa lulaśhan: María śhutiyü doncella wamlam patayü licalila. Chaynüpam Jesús nacila nunanü cay allpaćhu (liguicuy Lucas 1:34, 35). Pay allpaman śhamula Cristo, o Mesías cananpämi, ñatac nunacunata salvananpämi. a Lluy Bibliapi profeciacuna Jesúspi limaśhancuna cumplila payćhumi. Caycunawanmi nunacunaca yaćhanan cala Jesús ‘Diospa Chulin’, Cristo caśhanta (Mateo 16:16).
3. ¿Canan mayćhumi Jesús cayan?
Jesús wañucuptin taytanmi cawsachila espirituña cielućhu cananpä. Chayćhumi “mas altunninmanlä Tayta Dios ćhulaycula” (Filipenses 2:9). Canan Jesús poderniyü gobernantim; Taytanpa autoridäninta ćhasquiśhanwanmi.
MASTA YAĆHAYCUŚHUN
Yaćhaśhun sumätam mayan Jesús caśhanta ñatac imapïmi alli puydin lisinanchic.
4. Jesús manam Lluy-poderniyü Dioschu
Masqui Jesús poderniyü angel calpis, Jehová Diosta cäsucunmi. Bibliami chayta nimanchic. Licaśhun VIDEUCTA entindinayquipä Jehová Dioswan Jesús mana igual caśhanta.
Atïnin textucunami yanapamäśhun entindinanchicpä Jehovawan Jesús igual caśhanta o mana. Liguiśhun llapan textucunata ñatac limaśhun caypi:
Liguiśhun Lucas 1:30-32.
-
Angelca Mariacta nishannü, ¿mayanpa chulinmi cala Jesús?
Liguiśhun Mateo 3:16, 17.
-
Jesús bautizaculuptin, ¿imactam Dios nimula cielupi?
-
Chayurá, ¿Jesús Dioschun canman?
Liguiśhun Juan 14:28.
-
Juc familiaćhu, ¿mayanmi mandan taytanchun o chulinchun?
-
¿Ima nïtam munala Jesús Jehovata ‘Taytay’ nishanwan?
Liguiśhun Juan 12:49.
-
¿Jesús nilachun, Taytanwan pay juc nunalla caśhanta? Am, ¿ima ninquim?
5. Jesusmi Mesiasca cala
Bibliaćhu cayan achca profeciacunam nunacunata yanapananpä Mesiascäta lisinanpä, paytam aclala nunacunata salvananpä. Licaśhun VIDEUCTA, chayćhumi talipäcun’a profeciacunacta Jesusćhu cumpliśhanta cay allpaćhu cayaptinla.
Liguiśhun cay profeciacunata Bibliapi ñatac limaśhun caypi:
Liguiśhun Miqueas 5:2 yaćhananchicpä mayćhu Mesiasca naciśhanta. b
-
¿Cumplilächun cay profeciaca Jesús naciluptin? (Mateo 2:1).
Liguiśhun Salmo 34:20 ñatac Zacarías 12:10 yaćhananchicpä profeciacunacta Mesiasca wañucuśhampi.
-
¿Cumplilächun cay profeciacunaca? (Juan 19:33-37).
-
¿Imactapis lulalachućh Jesús profeciacunaca cumplinanpä payćhu?
-
Amta, ¿imactam yaćhachiśhunqui caycuna Jesuspi?
6. Jesuspi yaćhaśhanchic yanapamanchicmi
Bibliaca yaćhachimanchic imapïmi puydin Jesuspi yaćhananchic ñatac imapämi Dios caćhamula. Liguiśhun Juan 14:6 ñatac 17:3, ñatac limaśhun caypi:
-
¿Imapïmi alli puydin Jesusta lisinanchic?
Jesús quićhala caminucta Diosman aśhuycunanchicpä, pay Jehovapi rasuncäta yaćhachila ñatac paypïmi cawsachwan wiñay-wiñaypä.
WAQUINCUNA NIPÄCUN: “Jehovapa testiguncuna manam creinchu Jesucristuman”.
-
Am, ¿ima ninquimanmi?
IMACTAM YAĆHALUNCHIC
Jesús juc poderniyü espiritum, Diospa Chulinmi ñatac Mesiascämi.
Yalpaśhun
-
¿Imapïmi Jesusta ninchic Diospa ‘punta chulin’?
-
¿Imacunactam lulala Jesús manalapis cay allpata śhamul?
-
¿Imanuypam yaćhanchic Jesús Mesías caśhanta?
MASTA YAĆHANAYQUIPÄ
Imanuypam yaćhanchic Jesús Mesías caśhanta, liguiy.
“¿Prueban las profecías de la Biblia que Jesús fue el Mesías?” (Artículo de jw.org)
Imapïmi Bibliaca nin Diosninchic Jesuspa Taytan caśhanta. Chayta yaćhanayquipä liguiy.
“¿Por qué se le llama a Jesús el Hijo de Dios?” (Artículo de jw.org)
Bibliaca ninchun Dioswan Jesuswan chuya espirituwan jucllaćhu caśhanta, liguiy.
Imanuypam yanapala juc walmicta Bibliaćhu Jesuspi yaćhaluptin. Chayta yaćhanayquipä liguiy.
“Una judía explica por qué se replanteó sus creencias” (¡Despertad!, mayo de 2013)
a Imapïmi nunacunaca necitan salvacuyta ñatac imanuypam Jesús salvamanchic caypi yaćhaśhun 26 ñatac 27 yaćhachicuycunaćhu.
