ROSO 15
Yesuusi Ayeti?
Alamete aana Yesuusi daafira macciishshinokkihu dino yaa dandiinanni. Ikkollana, batinyu manni suꞌmasi agurranna isi daafira garire diafino; qoleno duuchu mannira Yesuusi ayimma daafira babbaxxitino hedo noonsa. Isi daafira Qullaawu Maxaafi mayyaannoyya?
1. Yesuusi ayeti?
Yesuusi gordoho heeꞌrannoho wolqaataamo sokkaasinchooti. Maganu Yihowa wolere baalankare kalaqara albaanni Yesuusa kalaqino. Hakko daafira, Yesuusa “kalaqamu baalunkura umiidiho [woy bayiraho]” yinoonnisi. (Qolasiyaasi Sokka 1:15) Yihowa xaaddote kalaqinohu Yesuusa calla ikkino daafira, Qullaawu Maxaafi Yesuusa Maganoho ‘mitto Beettosiiti’ yaanno. (Yohaannisi 3:16) Yesuusi Annisi Yihowa ledo mitteenni baxillunni loosino; hakko garinni isi Yihowa wolere baalankare kalaqi woyite looso kaaꞌlino. (Lawishsha 8:30 nabbawi.) Xaano Yesuusira Yihowa ledo danchu jaaloomi noosi. Isi Maganu sokkanna biddishsha sokkaasinetenna mannaho iillishanni, Maganoho ‘Qaale’ woy afoo ikke ammaname soqqamanno.—Yohaannisi 1:14.
2. Yesuusi uullara dayinohu mayiraati?
Mitu 2,000 diri albaanni, Yihowa qullaawa ayyaanasi horoonsiꞌre maalaletenni Yesuusi heeshsho gordunni Maariyaami yinanni seemo godowira sayisino. Konni garinni, Yesuusi manna ikke ilamino. (Luqaasi 1:34, 35 nabbawi.) Yesuusi uullara dayinohu Buuraminoha woy Kiristoosi ikke mannu ooso gatisaraati. a Qullaawu Maxaafi giddo Buuraminohu daafira balanxe kulloonni masaalo baalanti Yesuusi aana woꞌmitino; hakko daafira mannu Yesuusi “Heeshshote Magani Beetto Kiristoosa” ikkinota bade afa dandiino.—Maatewoosi 16:16.
3. Yesuusi xa hiikko no?
Yesuusi reyihu gedensaanni, reyotenni kae sokkaasincho ikke gordo higino. Hakko “Maganu woꞌmunkura aliidi darga [worinosi].” (Filiphisiyusi Sokka 2:9) Xa Yesuusi lowo geeshsha wolqaataamo sokkaasinchooti; iso roortino wolqa noosihu Yihowa callaati.
LEDDE XIINXALLI
Yesuusi addinta ayetironna isi daafira rosa lowo geeshsha hasiissannota ikkitinohu mayiraatiro ledde rosi.
4. Yesuusi Woꞌmanka Dandaanno Magano diꞌꞌikkino
Qullaawu Maxaafi, Yesuusi gordoho nooha wolqaataamo sokkaasincho ikkirono, Annisiranna Maganisira Yihowara hajajamannota kulanno. Hatto yineemmohu mayiraati? Qullaawu Maxaafi, Yesuusi woꞌmanka dandaanno Maganiwiinni baxxannohu hiittoonniitiro kulanno gara huwatate, VIIDIYO laꞌe.
Aante noo qummeeshshuwa Yihowanna Yesuusi mereero noo badooshshe huwanteemmo gede kaaꞌlitannonke. Mitto mittonka qummeeshsha nabbabbine, aante noo xaꞌmuwa hasaabbe.
Luqaasi 1:30-32 nabbabbe.
-
Sokkaasinchu yiinori, Yesuusinna “Woꞌmunkura Aliidi Magani” Yihowa addi addire ikkitinota leellishannohu hiittoonniiti?
Maatewoosi 3:16, 17 nabbabbe.
-
Yesuusi cuuami woyite, gordunni daggino huuro mayitino?
-
Hatti huuro ayeta labbannohe?
Yohaannisi 14:28 nabbabbe.
-
Annunna beettu giddo dirono silxaaneno roorannohu hiikkoyeti?
-
Yesuusi Yihowa Annaꞌyaati yaasi maa leellishshanno?
Yohaannisi 12:49 nabbabbe.
-
Yesuusi ‘Ani Anniꞌya ledo taaloho’ yee hedanno? Atera ma lawannohe?
5. Yesuusi Buuramino Moote ikkinota leellishshanno taje
Qullaawu Maxaafi giddo, Maganu manna gatisate doorinohu Buuramino Moote (Mesihichu) daafira kultannoti batinye masaalo no. Tini baalanti masaalo mannu Buuramino Moote ayetiro bade afanno gede kaaꞌlitino. Yesuusi uullara dayi woyite isi aana woꞌmitinoti mite masaalo hiikkuriitiro afate, VIIDIYO laꞌe.
Aante noota Qullaawu Maxaafi masaalo nabbabbe; hakkiinni woroonni noo xaꞌmuwa hasaabbe:
Buuramino Moote hiikko ilamannoro afate, Mikiyaasi 5:2 nabbabbe. b
-
Yesuusi ilami woyite tini masaalo woꞌmitino?—Maatewoosi 2:1.
Qullaawu Maxaafi Buuraminohu reyo daafira mayyee masaalinoro afate, Faarso 34:20 nna Zakkaariyaasi 12:10 nabbabbe.
-
Tini masaalo woꞌmitino?—Yohaannisi 19:33-37.
-
Tini masaalo Yesuusi aana woꞌmitanno gede assiꞌrinohu iso umosi diꞌꞌikkino yineemmohu mayiraati?
-
Tini Yesuusi maa ikkinota ammanatto gede assitannohe?
6. Yesuusi daafira rosanke kaaꞌlitannonke
Qullaawu Maxaafi, Yesuusi daafiranna Maganu isira uyinosi qeechi daafira rosa lowo geeshsha hasiissannota kulanno. Yohaannisi 14:6 nna 17:3 nabbabbe; hakkiinni aante noo xaꞌmo hasaabbe:
-
Yesuusi daafira rosa lowo geeshsha hasiissannota ikkitinohu mayiraati?
Yesuusi Maganu jaalla ikkineemmo gede doogo faninonke. Isi Yihowa daafira halaale rosiisino; qoleno hegere heeshsho afiꞌneemmohu isi widoonniiti
MITU MANNI TOGO YAANNO: “Yihowa Farciꞌraasine Yesuusa diammantanno.”
-
Ati mayite qolatto?
XAPHISHSHA
Yesuusi wolqaataamo sokkaasinchooti. Isi Maganu Beettootinna Buuramino Mooteeti.
Kageeshsha Rosoottore
-
Yesuusa “kalaqamu baalunkura umiidiho” woy bayiraho yinoonnihu mayiraati?
-
Yesuusi uullara daara albaanni maa assino?
-
Yesuusi Buuramino Moote ikkinota leellishannori maati?
EGENNO LEXXI
Yesuusi Buuramino Moote ikkinota leellishshanno taje ledde rosi.
Maganu Yesuusira Anna ikkinohu hiittoonniitiro Qullaawu Maxaafinni rosi.
“Yesuusa Maganu Beettooti Yinoonnihu Mayiraati?” (Webisayitenkera fultino borro)
Sillaase Qullaawu Maxaafi roso ikkinokkita leellishshanno taje huwati.
Mitte mancho Qullaawu Maxaafi Yesuusi daafira rosiisannore xiinxallituhu gedensaanni heeshshose soorrantino gara nabbawi.
a Mannu oosora gato hasiissinonsahu mayiraatironna Yesuusi gatisannonkehu hiittoonniitiro Roso 26 nna 27te ronseemmo.
b Yesuusi Buuramino Moote ikkanno yannare kultanno masaalo huwatate, Guwuursha 2 nabbawi.
Kurino Lai
DUUCHU MANNI XAꞌMANNO XAꞌMO
Yihowa Farciꞌraasine Qullaawa Maxaafa Xiinxallissannohu Hiittoonniiti?
Yihowa Farciꞌraasine ledo Qullaawa Maxaafa woxe baaxxittokkinni xiinxallatto woyite, baxoottota Qullaawu Maxaafi tiro horoonsiꞌra dandaatto. Xiinxallokkira maatekki gudisse woy jaallakki koyisa dandaatto.
