LESONA 15
O Ai Iesu?
O Iesu o se tasi o tagata e sili ona lauiloa i le talafaasolopito. O le toʻatele o tagata e latou te iloa lona suafa, ae latou te lē iloa lelei o ia. E eseese uma o latou manatu po o ai moni lava Iesu. O le ā ua faailoa mai e le Tusi Paia e faatatau iā te ia?
1. O ai Iesu?
O Iesu o se agelu malosi e afio i le lagi. Na foafoaina o ia e Ieova le Atua a o leʻi faia isi mea uma, ma ua taʻua ai o ia “o le ulumatua o foafoaga uma.” (Kolose 1:15) O loo taʻua i le Tusi Paia o le “Atalii e toʻatasi” o le Atua, auā e na o ia na foafoaina tuusaʻo e Ieova. (Ioane 3:16) Na galulue faatasi Iesu ma lona Tamā o Ieova, ma fesoasoani iā te Ia i le foafoaina o isi mea uma. (Faitau le Faataoto 8:30.) Na olioli pea Iesu i se faiā vavalalata ma Ieova. Na auauna faamaoni o ia o se fofoga fetalai a le Atua, po o “le Upu,” e faaoo atu Ana feʻau ma faatonuga.—Ioane 1:14.
2. Aiseā na afio mai ai Iesu i le lalolagi?
I le pe ā ma le 2,000 tausaga ua mavae, na faaaogā e Ieova lona agaga paia e suia faavavega ai le soifua o Iesu mai le lagi, ma tuu i le manava o se taupou e igoa iā Maria. O le auala lenā na avea ai Iesu o se tagata. (Faitau le Luka 1:34, 35.) Na afio mai Iesu i le lalolagi o le Mesia folafolaina po o le Keriso, ina ia faasaoina tagata. a Na faataunuuina iā te ia valoaga uma a le Tusi Paia e faatatau i le Mesia, ma na iloa ai e tagata o Iesu “o le Keriso, o le Alo o le Atua soifua.”—Mataio 16:16.
3. O fea o iai Iesu i le taimi lenei?
Ina ua maliu Iesu o se tagata, na toe faatūina aʻe o ia o se agaga ma toe afio i le lagi. O i inā na “faaeaina ai o ia e le Atua i se tulaga e sili ona maualuga.” (Filipi 2:9) O lea la, ua iai nei Iesu i se tulaga pule maualuga, e lona lua atu iā Ieova.
SAʻILIʻILI ATILI
Iloilo atili po o ai moni Iesu, ma pe aiseā e tāua ai le iloa lelei o ia.
4. O Iesu, e lē o le Atua e Ona le Malosi Uma Lava
Ua aʻoaʻo mai i le Tusi Paia, e ui lava o Iesu o se agelu malosi i le lagi, ae gauaʻi o ia i lona Atua, po o lona Tamā o Ieova. Aiseā e tatou te ioe ai i lenā manatu? Faaali le VITIŌ ma mātau po o le ā ua aʻoaʻo mai e le Tusi Paia, e faatatau i le eseesega o Iesu ma le Atua e ona le malosi uma lava.
E fesoasoani mau nei e tatou te malamalama ai i le faiā a Ieova ma Iesu. Faitau mau taʻitasi ma talanoa i fesili o loo iai.
Faitau le Luka 1:30-32.
-
Na faapefea ona faailoa mai i le faamatalaga a le agelu, e eseese Iesu ma Ieova le Atua, o “le Silisili Ese”?
Faitau le Mataio 3:16, 17.
-
I le papatisoga o Iesu, o le ā na taʻu mai e le siʻufofoga mai le lagi?
-
E te iloa o ai e ona lenā siʻufofoga?
Faitau le Ioane 14:28.
-
O ai e matua ma sili atu lana pule? O le tamā po o le atalii?
-
Na taʻua e Iesu Ieova o lona Tamā. O le ā e tatou te aʻoaʻoina mai ai?
Faitau le Ioane 12:49.
-
Pe na manatu Iesu e tutusa i laʻua ma lona Tamā? O le ā sou manatu?
5. Faamaoniga na iloa ai o Iesu o le Mesia
O loo i le Tusi Paia le tele o valoaga na fesoasoani i tagata e iloa ai po o ai le Mesia, o lē na filifilia e le Atua e faaolaina tagata. Faaali le VITIŌ mo se aotelega puupuu o nisi o valoaga na faataunuuina e Iesu, ina ua afio mai i le lalolagi.
Faitau nisi nei o valoaga o le Tusi Paia, ona talanoa lea i fesili o loo iai:
Faitau le Mika 5:2, ma mātau po o fea na valoia e fanau ai le Mesia. b
-
Pe na taunuu lenei valoaga i le taimi na fanau ai Iesu?—Mataio 2:1.
Faitau le Salamo 34:20 ma le Sakaria 12:10, ma iloilo faamatalaga na valoia e faatatau i le maliu o le Mesia.
-
Pe na taunuu nei valoaga?—Ioane 19:33-37.
-
Pe e te manatu na faapogaia e Iesu le faataunuuga o nisi o nei valoaga?
-
O le ā ua faamaonia e nei valoaga e faatatau iā Iesu?
6. E tatou te maua aogā pe a aʻoaʻo atili e faatatau iā Iesu
Ua faamatilatila mai i le Tusi Paia le tāua o le aʻoaʻo atili e faatatau iā Iesu ma lana matafaioi. Faitau le Ioane 14:6 ma le 17:3, ona talanoa lea i le fesili lenei:
-
Aiseā e tāua ai le aʻoaʻo atili e faatatau iā Iesu?
Na tatala e Iesu le ala mo i tatou e avea ai ma uō a le Atua. Na ia aʻoaʻo mai le upu moni e faatatau iā Ieova, ma e ala iā te ia, ua tatou maua ai le ola e faavavau
UA FAAPEA MAI NISI: “E lē talitonu Molimau a Ieova iā Iesu.”
-
O le ā lau tali?
AOTELEGA
O Iesu o se agelu malosi. O ia o le Alo o le Atua, ma o le Mesia.
Fesili Autalu
-
Aiseā ua taʻua ai Iesu “o le ulumatua o foafoaga uma”?
-
O le ā na faia e Iesu a o leʻi afio mai i le lalolagi?
-
E faapefea ona tatou iloa o Iesu o le Mesia?
MANATU FAAOPOOOPO
Ia aʻoaʻo atili e faatatau i le matafaioi a Iesu o le Mesia.
“Pe e Faamaonia i Valoaga e Faatatau i le Mesia, o Iesu o le Mesia?” (Mataupu i le jw.org)
Ia iloilo po o aʻoaʻo mai e le Tusi Paia, na fanaua e le Atua Iesu e pei ona fanaua e tagata o a latou fanau.
“Aiseā ua Taʻua ai Iesu o le Alo o le Atua?” (Mataupu i le jw.org)
Iloilo pe aiseā e lē o se aʻoaʻoga ai a le Tusi Paia le Tolutasi.
Faitau i le auala na suia ai le olaga o se fafine, ina ua uma ona ia suʻesuʻeina aʻoaʻoga a le Tusi Paia e faatatau iā Iesu.
“Le Māfuaaga na Toe Iloilo ai e se Fafine Iutaia Ona Talitonuga” (Mataupu o le Ala Mai!)
a O le a talanoaina i le Lesona 26 ma le 27, le māfuaaga e manaʻomia ai ona faasaoina tagata, ma le auala ua faasaoina ai i tatou e Iesu.
b Tagaʻi i le Faaopoopoga 2, i se valoaga e faatatau i le taimi tonu na aliaʻe mai ai le Mesia i le lalolagi.
E te Ono Fiafia Foʻi
FESILI E MASANI ONA LĀGĀ
O le ā le Talanoaga Faale-Tusi Paia o Loo Ofoina e Molimau a Ieova?
Ua ofo atu e Molimau a Ieova se suʻesuʻega faale-Tusi Paia e lē totogia, e mafai ona e faaaogāina ai so o se faaliliuga o le Tusi Paia. E mafai foʻi ona valaaulia lou aiga atoa po o au uō e auai ai.
