DILONGIESHA 15
Yesu nnanyi?
Yesu ngumune a ku bantu bende nkumo kubanga kala. Bantu bebungi abauku eshina dia Yesu, anka tabauku bibungi pabimutale, na be na binangu bilekenelekene pabitale Yesu. Kadi Bible namu amba kinyi pabimutale?
1. Yesu nnanyi binyibinyi?
Yesu nyi muikeilu e bukome mushalele muiyilu. Babadi bamupangie kui Yehowa Efile Mukulu kumpala kua kupanga bintu bioso. Nyi buakinyi abamuitamina bu “mwana mbedi a ku bipangwa bioso.” (Bena-Kolose 1:15, Kilombeno kipya 2014) Bible ayitamina dingi Yesu bu ‘mwana a eeleka’ a Efile Mukulu, muanda nka penda Yesu nyi ababadi bapangie kui Yehowa aye nabene. (Yowano 3:16) Yesu badi mufube pamune na Nshaye, Yehowa, badi amukuasha bua kupanga bintu bioso. (Badika Nkindji 8:30.) Yesu kuete kutungunuka na kuikala mu kipuano na Yehowa. Badi afubila Efile Mukulu na lulamato loso bu muakuidi na bu “Eyi” bua kutusha mukandu Waye na malango aaye.—Yowano 1:14.
2. Buakinyi Yesu bafikile pa nsenga?
Takudi bipua bifikye ku 2 000, Yehowa badi muele muwa wa Yesu munda mua mukashi kamame Madiya mu kilengieleshi ku bukuashi bua kikudi kiselele. Nyi buakinyi badi mutandikue bu muntu. (Badika Luka 1:34, 35.) Yehowa badi mutume Yesu pa nsenga bu Mesiya ababadi balee, sunga bu Kidishitu bua kupasha bantu. a Matemuki oso a mu Bible pabitale Mesiya abadi alombene muadi, bino bibakuashile bantu buabadia kutundula Yesu bu ‘Kidishitu, Mwana a Efile Mukulu e na muwa.’—Mateo 16:16.
3. Yesu e kunyi binobino?
Ku nfudilo kua muwa wa Yesu bu muntu, badi musangudibue na mbidi ya mu kikudi, na aye nkualuka muiyilu. Muamua, “Efile Mukulu bamukamiishe panundu pa boso.” (Bena-Fidipe 2:9) Binobino, Yesu e na matalua akata muiyilu, nka penda Yehowa nyi e kunundu kuaye.
TUKIMBUULE BOSO
Tutale bua kuuka bibungi pabitale kikale Yesu binyibinyi na buakinyi kulonga pabimutale kui na muulo.
4. Yesu ta Efile Mukulu sha bukome boso nya
Bible alongiesha’shi, sunga biekala’shi Yesu nkipangua kia mu kikudi ki na bukome, akokielaa Nshaye Efile Mukulu Yehowa. Buakinyi atuamba biabia? Tala VIDEO bua kumona abilongiesha Bible pabitale mbalo i nayo Yesu mu kuilekena na Efile Mukulu sha bukome boso.
Bino bifundue abilondo, abitukuasha bua kupusha kalolo kipuano ki pankatshi pa Yehowa na Yesu. Badika kifundue kioso, akupu nuisambile ino nkonko ailondo:
Badika Luka 1:30-32.
-
Muikeyilu alesha naminyi kipuano ki pa nkatshi pa Yesu na Yehowa Efile Mukulu ‘Sha kuiyilu kula’?
Badika Mateo 3:16, 17.
-
Pa lubatshisho lua Yesu, eyi dibatukile muiyilu dibadi adiamba kinyi?
-
Omono’shi diadia eyi dibadi dia nnanyi?
Badika Yowano 14:28.
-
Nnanyi mukile bukata na sha matalua oso? Yaaya su muana?
-
Yesu paitamina Yehowa bu Nshaye, abitulongiesha kinyi?
Badika Yowano 12:49.
-
Yesu anangushena’shi aye na Nshaye muntu umune? Obe namu onangushena naminyi?
5. Nkinyi akishinkamisha’shi Yesu nyi Mesiya?
Mu Bible mui matemuki e bungi aakuasha bantu bua kutundula Mesiya, yawa abadi basangule kui Efile Mukulu bua kupasha bantu. Tala VIDEO bua kuka bibungi pabitale angi matemuki abadi alombashe Yesu pabafikile pano pa nsenga.
Badika ano matemuki a mu Bible, akupu nuisambile ino nkonko ailondo:
Badika Mika 5:2 bua kuka mbalo ibadi itandikilue Mesiya. b
-
Kutandikua kua Yesu kubadi kulombashe buno butemuki su?—Mateo 2:1.
Badika Misambo 34:20 na Sekadya 12:10 bua kuka bibadi bitemukie Bible pabitale lufu lua Mesiya.
-
Kunyi kubadi kulombene ano matemuki?—Yowano 19:33-37.
-
Opuandikisha’shi Yesu nyi badi mukite bia’shi ano matemuki alombane?
-
Bino abikushinkamisha kinyi pabitale Yesu?
6. Kulonga pabitale Yesu akuitukuasha
Bible alesha’shi bi na muulo bua kulonga pabitale Yesu na mudimo waye. Badika Yowano 14:6 na 17:3, akupu nuisambile luno lukonko alulondo:
-
Buakinyi bi na muulo kulonga pabitale Yesu?
Yesu muitufunguile eshinda bua kuikala ba kuku b’Efile Mukulu. Badi mulongieshe bia binyibinyi pabitale Yehowa, na ku bukuashi bua Yesu atukapete muwa wa ikalaika
BANGI ABAMBA’SHI: “Ba Temwe ba Yehowa tabakuminaa mui Yesu.”
-
Obe namu omba naminyi?
MU KIKOSO
Yesu nyi muikeilu e bukome mushalele muiyilu. Nyi Mesiya Muana a Efile Mukulu.
Kuambuula
-
Buakinyi abetaminaa Yesu bu “Mwana a mbedi a ku bipangwa byoso”?
-
Yesu badi akitshi kinyi kumpala kua kufika pa nsenga?
-
Atuku naminyi’shi Yesu nyi Mesiya?
TALUULA DINGI
Longa bibungi pabitale mudimo wa Yesu wa bu Mesiya.
Tala su Bible alongiesha’shi Efile Mukulu muikale Nshaye na Yesu, mu mushindo umune autandaa bantu bana.
“Buakinyi abaitaminaa Yesu bu Muan’Efile?” (Muisambo wi mu internete)
Tala buakinyi Bible talongiesha pabitale busatu buiselele.
Tala bibadi bishintulukie nshalelo a ungi muana mukashi p’aye kutundula abiamba Bible pabitale Yesu.
“Muana mukashi muina Yuda apatuula buakinyi badi mutaluule lukumino luaye” (Pasukayi!, 5/2013)
a Mu dilongiesha dia 26 na 27 atukatala buakinyi bantu be na lukalo lua kupashibua na mushindo wabaketupasha kui Yesu.
b Tala Kikumbashilo 2 bua kuka butemuki bubadi abulesha nsaa ibadi na kia kufika Yesu pa nsenga.
Tala dingi
NKONKO YABAKAMBAA KWELA
Kulonga kwa Bible akukitshikaa naminyi?
Tala myaluulo ya nkonko itale programe etu a kulonga kwa Bible.
