SIFUNDVO 15
Ungubani Jesu?
Jesu ungulomunye webantfu labadvume kakhulu emlandvweni. Bantfu labanyenti bayalati ligama laJesu, kodvwa kute lokunyenti labakwatiko ngaye, futsi banemibono leyehlukahlukene ngekutsi ungubani. Litsini liBhayibheli ngaye?
1. Ungubani Jesu?
Jesu ungumuntfu longumoya, lohlala ezulwini futsi lonemandla. Wadalwa nguNkulunkulu Jehova, ngaphambi kwato tonkhe tintfo. Ngaleso sizatfu, ubitwa ngekutsi “litibulo layo yonkhe indalo.” (KubaseKholose 1:15) LiBhayibheli libita Jesu ngekutsi ‘uyiNdvodzana [yaNkulunkulu] lekuphela kwayo,’ ngobe nguye kuphela lowadalwa nguJehova ngalokucondzile. (Johane 3:16) Jesu wasebenta naBabe wakhe, Jehova, wamsita ekudaleni tonkhe letinye tintfo. (Fundza Taga 8:30.) Jesu uyachubeka ajabulela buhlobo lobusedvute naJehova. Ngekwetsembeka, usebenta njengemkhulumeli waNkulunkulu, ‘unguLivi,’ lowendlulisela imilayeto neticondziso taNkulunkulu.—Johane 1:14.
2. Kungani Jesu eta emhlabeni?
Eminyakeni lengaba ngu-2 000 leyendlulile, ngalokusimangaliso, Jehova wasebentisa umoya wakhe longcwele kuze endlulisele kuphila kwaJesu, kusuka ezulwini, kuya esibeletfweni sentfombi ntfo lenguMariya. Ngaleyondlela Jesu wakhona kutalwa emhlabeni angumuntfu. (Fundza Lukha 1:34, 35.) Jesu weta emhlabeni kuze abe nguMesiya lowetsenjisiwe, nobe Khristu, lotawusindzisa bantfu. a Tonkhe tiphrofetho teliBhayibheli letimayelana naMesiya, tagcwaliseka kuye, lokwasita bantfu bati kutsi Jesu “unguKhristu, iNdvodzana yaNkulunkulu lophilako.”—Matewu 16:16.
3. Ukuphi Jesu nyalo?
Ngemuva kwekufa kwakhe, Jesu wavuselwa ezulwini njengengilosi. Lapho, “Nkulunkulu wamphakamisela esikhundleni lesisetulu.” (KubaseFiliphi 2:9) Nyalo, Jesu uyingilosi lenemandla kakhulu. NguJehova kuphela lonemandla kwendlula yena.
CHUBEKA UFUNISISA
Tfola lokunyenti ngekutsi Jesu ungubani, nekutsi kubaluleke ngani kufundza ngaye.
4. Jesu akasuye Nkulunkulu Somandla
LiBhayibheli lifundzisa kutsi ngisho nobe Jesu ayingilosi lenemandla, uyatitfoba kuNkulunkulu longuBabe wakhe, Jehova. Kungani sisho njalo? Dlala le-VIDEO kuze ubone kutsi liBhayibheli lifundzisa kutsi Jesu wehluke njani kuNkulunkulu longuSomandla.
Lemibhalo lelandzelako isisita sibone buhlobo lobukhona emkhatsini waJehova naJesu. Fundza umbhalo ngamunye, bese nicoca ngalemibuto lelandzelako.
Fundza Lukha 1:30-32.
-
Ingilosi yabuchaza njani budlelwane lobusemkhatsini waJesu naJehova Nkulunkulu, ‘Losetikwako Konkhe’?
Fundza Matewu 3:16, 17.
-
Yini leyashiwo livi lebelivela ezulwini ngesikhatsi Jesu abhajatiswa?
-
Ucabanga kutsi bekulivi labani?
Fundza Johane 14:28.
-
Ngubani lomdzala naloneligunya? Ngubabe nobe yindvodzana?
-
Jesu watsi Jehova unguBabe wakhe. Kusifundzisani loko?
Fundza Johane 12:49.
-
Jesu ucabanga kutsi ungumuntfu munye yini naBabe wakhe? Wena ucabangani?
5. Jesu wakhombisa kutsi unguMesiya
Kunetiphrofetho letinyenti eBhayibhelini letimayelana naMesiya, loyo lowakhetfwa nguNkulunkulu kutsi asindzise bantfu. Letiphrofetho tasita bantfu babona kutsi Jesu bekanguMesiya. Dlala le-VIDEO kuze ufundze ngaletinye tiphrofetho letagcwaliseka kuJesu ngesikhatsi alapha emhlabeni.
Fundza letiphrofetho teliBhayibheli, bese nicoca ngalemibuto lelandzelako:
Fundza Mikha 5:2 kuze utfole kutsi Mesiya abetawutalelwa kuphi. b
-
Lesiphrofetho sagcwaliseka yini nakutalwa Jesu?—Matewu 2:1.
Fundza Tihlabelelo 34:20 na-Zakhariya 12:10 kuze ubone loko lokwashiwo liBhayibheli mayelana nekufa kwaMesiya.
-
Tagcwaliseka yini letiphrofetho?—Johane 19:33-37.
-
Ucabanga kutsi nguJesu yini lowabangela kutsi letiphrofetho tigcwaliseke?
-
Loku kukutjelani ngaJesu?
6. Kusisita ngani kufundza ngaJesu?
LiBhayibheli litsi kubalulekile kufundza ngaJesu nangaloko Nkulunkulu lafuna akwente. Fundza Johane 14:6 na-17:3, bese nicoca ngalombuto:
-
Kubaluleke ngani kufundza ngaJesu?
Jesu wasivulela indlela yekutsi sibe bangani baNkulunkulu. Wafundzisa liciniso ngaJehova, futsi ngaye, singatfola kuphila lokuphakadze
LABANYE BANTFU BATSI: “BoFakazi BaJehova abakholelwa kuJesu.”
-
Ungabaphendvula utsini?
LOKO LESICOCE NGAKO
Jesu ungumuntfu longumoya futsi unemandla. UyiNdvodzana yaNkulunkulu futsi unguMesiya.
Yini Loyifundzile?
-
Kungani Jesu abitwa ngekutsi ‘ulitibulo layo yonkhe indalo’?
-
Jesu bekentani ngaphambi kwekutsi ete emhlabeni?
-
Sati njani kutsi Jesu unguMesiya?
LOKUNYE LONGAKUHLOLA
Fundza lokunyenti ngalokusenta siciniseke kutsi Jesu unguMesiya.
Tfola kutsi liBhayibheli liyafundzisa yini kutsi Nkulunkulu waba nguBabe waJesu ngendlela bantfu labatfola ngayo bantfwana.
“Yini Leyenta Jesu Abitwe Ngekutsi YiNdvodzana YaNkulunkulu?” (Sihloko lesiku-internet)
Fundza kutsi kungani imfundziso yaMtsatfu aMunye ingekho eBhayibhelini.
“Ingabe UJesu UnguNkulunkulu?” (Sicongosekulindza sa-April 1, 2009, lesitfolakala ngesiZulu)
Fundza kutsi kuphila kwalomunye sisi kwashintja njani ngemuva kwekuhlola loko lokushiwo liBhayibheli mayelana naJesu.
a Tifundvo 26 na-27 titawucoca ngekutsi kungani bantfu badzinga kusindziswa, nekutsi Jesu usisindzisa njani.
Lokunye Longatsandza Kukuhlola
IMIBUTO BANTFU LABAVAMISE KUYIBUTA
Siyini Sifundvo SeliBhayibheli Lesichutjwa BoFakazi BaJehova?
Ungasebentisa nobe ngabe nguliphi lihumusho leliBhayibheli nawutadisha naBoFakazi BaJehova. Ukhululekile kumema umndeni wakho wonkhe nobe bangani bakho kutsi babe khona nawufundza.
