LESOGNE 15
Ia o Jesosy Zao?
Agnisa ty ndaty tena malaza ty Jesosy. Faie ndra tie maro aza ty mahafantatse i agnara’ey, le maro avao ka ty tsy mahay ty miomba aze. Sambe managne ty heve’e miomba aze o ndatio. Ino ty rehafe ty Baiboly miomba i Jesosy?
1. Ia o Jesosy zao?
Anjely mahery mitoboke an-dagnitse agne ty Jesosy. I reke ty namboare i Jehovah Andrianagnahare taloha ze kila raha. Izay ty mahavy aze atao tihoe “voaloha’e amy ze kila raha namboaregne.” (Kolosianina 1:15) Atao ty Baiboly tihoe ‘ana-dahin’Andrianagnahare bakotokagne’ ka reke satria i reke ty namboare i Jehovah mivantagne. (Jaona 3:16) Niara-niasa tamy i Jehovah Rae’e ty Jesosy, le nagnampe Aze tamy ty famorognagne ze kila raha. (Vakio ty Ohabolana 8:30.) Mbe mifandrambe marine amy i Jehovah avao ty Jesosy hatrake amy izao. Tsy mivalike amy i Jehovah reke sady minday ty saontsi’e. Izay ty anoagne aze tihoe “ty Saontsy” satria magnambara ty hafatse naho ty toromareke boake amy i Jehovah reke.—Jaona 1:14.
2. Nagnino ty Jesosy ro nizotso an-tane etoy?
Nanao fahagagagne ty Jehovah fa ho 2000 taogne mahery lasa zay. Nampiasa ty fagnahi’e masigne reke mba hamindragne ty fiay i Jesosy boake an-dagnitse agne ho an-tro ty somondrara raike mbe tsy nahavany lahy atao tihoe Maria ao. Izay ty nahavy i Jesosy hanjare ndaty. (Vakio ty Lioka 1:34, 35.) Nizotso an-tane etoy ty Jesosy mba hanjare Mesia ndra Kristy nampitamaegne hagnavotse o ndatio. a Tanterake tamy i Jesosy iaby ze faminania ty Baiboly miomba i Mesia. Izay ty nagnampe o ndatio hahafantatse fa i Jesosy ro ‘Kristy, Ana i Andrianagnahare velogney.’—Matio 16:16.
3. Aia ty Jesosy amy izao?
Naho fa nimate ty Jesosy, le nivelomen’Andrianagnahare ho anjely reke vaho izay niheregne an-dagnitse agne. “Naonjon’Andrianagnahare reke le nimea’e toeragne ambone” naho fa niheregne agne. (Filipianina 2:9) Managne fahefagne ambone ty Jesosy tie amy izao. Faie ndra tie eo zay, le i Jehovah raike avao ro managne fahefagne ambone i Jesosy.
ANDAO HANDINEKE TY PITSOPITSO’E
Hodinehentikagne ato tie ia maregne ty Jesosy sady nagnino ro tena ilaegne ty mahafantatse aze.
4. Tsy Andrianagnahare Fara’e Mahery ty Jesosy
Ampianare ty Baiboly fa ndra tie anjely mahery an-dagnitse agne ty Jesosy, le mbe mankatò i Jehovah Andrianagnahare’e sady Baba’e avao. Nagnino tikagne ro mirehake izay? Alefaso i VIDEO oy fa ampianare ty Baiboly tie tsy mitovy amy i Andrianagnahare fara’e maherỳ ty Jesosy.
Magnampe antikagne hahazo ty tsy mampitovy i Jehovah naho i Jesosy ty andinin-teny retoa. Vakio isake andine’e, le iharò midineke i fagnonteneagney:
Vakio ty Lioka 1:30-32.
-
Nagnino ty reha o anjely iohoe ro mampiseho fa tsy mitovy ty Jesosy naho i Jehovah, i Andrianagnahare “Fara’e Amboney”?
Vakio ty Matio 3:16, 17.
-
Ino ty nisaontsie i feo boake an-dagnitse agney, tamy i Jesosy natao badisay?
-
Fiaragnana ia io arake ty heve’o?
Vakio ty Jaona 14:28.
-
Ia ty bey sady managne fahefagne ambone? Ty rae sa ty anake?
-
Natao i Jesosy tihoe Baba’e ty Jehovah. Ino ty tea’e ho rehafegne amy izay?
Vakio ty Jaona 12:49.
-
Nieretseretse vao ty Jesosy tie ndaty raike avao iareo aman-dRae’e? Akore ty heve’o?
5. Voaporofo tie i Jesosy o Mesiao
Maro ty faminaniagne amy Baiboly ao magnampe o ndatio hahafantatse tie ia o Mesiao, i finilin’Andrianagnahare hagnavotse o ndatioy. Alefaso i VIDEO oy fa mirehake ty faminaniagne ila’e nitanterake tamy i Jesosy tamy i reke tan-tane etoỳ.
Vakio ty faminania ty Baiboly retoa, sady iharò midineke i fagnonteneagne ambane’eoy:
Vakio ty Mika 5:2 hahatreava’o tie aia ty toeragne hiterahagne i Mesia. b
-
Nitanterake tamy i Jesosy vao o faminaniagne io?—Matio 2:1.
Vakio ty Salamo 34:20 naho ty Zakaria 12:10 hahatreava’o ty pitsopitso’e amy ty faminaniagne miomba ty hahafate i Mesia.
-
Nitanterake vao o faminaniagne rehoe? —Jaona 19:33-37.
-
Natao i Jesosy vao ty hahavy o raha rehoe ho tanterake ama’e? Akore ty heve’o?
-
Ia ty Jesosy naho fa dinehegne o porofo rehoe?
6. Mandrambe soa tikagne naho fa mianatse ty miomba i Jesosy
Rehafe ty Baiboly fa tena ilaegne ty mianatse ty miomba i Jesosy naho ty raha hatao’e. Vakio ty Jaona 14:6 naho ty 17:3, sady iharò midineke ty fagnonteneagne toy:
-
Nagnino ro tena ilaegne ty mianatse ty miomba i Jesosy?
I Jesosy ro lalagne satria magnampe antikagne hanjare naman’Andrianagnahare. Atao tihoe hamarenagne ka reke satria nampianatse ty maregne miomba i Jehovah. Atao tihoe fiaignagne ka reke satria amy ty alala’e ro mahavy antikagne hahazo havelogne nainai’e
MISY TY MIREHAKE FA: “Tsy mino i Jesosy o Vavolombelo i Jehovah-o.”
-
Akore ty havale’o izay?
FAMINTIGNAGNE
Anjely mahery ty Jesosy. Anan’Andrianagnahare reke sady Mesia.
Fameregnagne
-
Nagnino ty Jesosy ro atao tihoe “voaloha’e amy ze kila raha namboaregne”?
-
Ino ty natao i Jesosy taloha ty nizotsoa’e an-tane etoy?
-
Nagnino tikagne ro mirehake fa i Jesosy ro Mesia?
FAGNAZAVAGNE FAGNAMPE’E
Ino ka ty porofo fa i Jesosy ro Mesia?
Mampianatse vao ty Baiboly tie nanambaly ty Andrianagnahare le niterake i Jesosy manahake o ndatio?
“Nagnino ty Jesosy ro Atao Tihoe Anan’Andrianagnahare?” (Lahatsoratse amy jw.org ao)
Dineho ato fa tsy mampianatse miomba ty Andrianagnahare Telo Miharo Raike ty Baiboly.
“Andrianagnahare vao ty Jesosy?” (Fitalakesan-davitse 1 Avrily 2009)
Nagnova ty fiaigna ty ampela raike toy ty fahafantara’e ty raha rehafe ty Baiboly miomba i Jesosy.
“Nagneregne Nandineke ty Raha Ninoa’e i Ampela Jiosỳ” (Mifohaza! Mey 2013)
a Hodinehegne amy ty Lesogne 26 naho 27 ao tie, nagnino o ndatio ro mila avotagne sady akore ty nagnavota i Jesosy aze.
b Henteo ty Fagnazavagne 2 fa misy faminaniagne mirehake miomba ty fotoagne hiavia i Jesosy an-tane etoy.
Va'e ho Tea'o Ka
FAGNONTENEAGNE FAPETRA O NDATIO
Inogne ty Atao Tihoe Fianaragne Baiboly?
Afake mampiasa ze Baiboly tea’o rehe naho fa mianatse Baiboly amy ty Vavolombelo i Jehovah. Maimaimpoagne i fianaragney sady afake taone’o hiarake hianatse ama’o ka ty keleia’o ndra ty ragne’o.
