AISISIAET NA 15
Ingai bo Yesu?
Erai Yesu ediope kotunga luejenara noi. Konye itunga luipu mam ejenete nuikamunitos Yesu kilema ekiror bon, ido ice ejaatar kaiyuununeta nuegelegela nuikamunitos nges. Anyoika bo nuinera Ebaibuli kanuikamunitos Yesu?
1. Ingai bo Yesu?
Erai Yesu emalaika loejai toma akuj ido ejaatar kapedor naepol noi. Edeke Yawe abu kosub nges eroko esubuna iboro luce kere. Kanuangun, enyaritai Yesu “ekiyai loka isuban kere.” (Ikolosain 1:15) Enyarit bobo Ebaibuli nges “Okoku loteluna” loka Edeke naarai Yesu bon nges abu Yawe elopet kosub kakekanin. (Yokana 3:16) Abu Yesu kiswama nepepe ka Yawe Papake, aingarakinit nges aisub iboro ice kere. (Kosiom Awaragasia 8:30.) Inyikokinit Yesu aidicanara noi nepepe ka Yawe. Ijaanakini Yesu kamunoonut kwape ekeraban loka Edeke, kanuangun enyaritai nges “Akirot,” eebo, itwasamai Edeke ngesi aitejenunia Akekirot ka aicoretake.—Yokana 1:14.
2. Kanuinyo abunio Yesu toma akwap?
Nepetai ikar 2,000 kau, abu Yawe kopone loeumokina kitwasam ekemoyo lokalaunan aijulunia kotoma akuj aijar naka Yesu toma akoik naka abekot natumunan naanyaritai Mariam. Kopone kangol nges aurunere Yesu kwape etunganan. (Kosiom Luka 1:34, 35.) Ebunit Yesu toma akwap kanu araun Mesia arai bo Kristo loesumunitai, keda kanu alakun itunga. a Adwareta kere nuka Ebaibuli nuikamunitos Mesia apotu kitodolikinos kaneejai ngesi ido apotu kingarakisi itunga ajenun Yesu kwape “Kristo, Okoku loka Edeke lokajaran.”—Matayo 16:16.
3. Ai bo ejai Yesu kwape kwana?
Ketwana Yesu, aponi kitajarunai ngesi kwape emalaika kosodi ngesi abongor toma akuj. Kangina, “nges etopolooria noi Edeke nges.” (Ipilipin 2:9) Erai Yesu kwape kwana emalaika loejaatar keda apedor naepol noi. Yawe bon ngesi ejaatar keda apedor naedeparit naka Yesu.
KISISIAU NUIPU
Kisisiau nuipu nuitejenunitos ingai bo cut Yesu ido kanuinyo eraar ibore yenepol noi oni aisisia nuikamunitos nges.
4. Mam Yesu erai Edeke Lokapedor Kere
Isisianakini Ebaibuli ebe karaida erai Yesu emalaika loejaatar kapedor naepol, erimaarit ngesi Yawe Ekedeke ido Papake. Kanuinyo ibalar oni kwangin? Koboliak EBIDIO kanu aanyun nuisisianakini Ebaibuli nuikamunitos adoketait naka Yesu kitiiriani keda naka Edeke lokapedor kere.
Ingarakinete oni ikokoron luetupakinete amisiikin atiaketait naejai kiding Yawe keda Yesu. Kosiom kangolikokoro, kosodete aimor aingiseta nuetupakinete.
Kosiom Luka 1:30-32.
-
Epone ani abu emalaika kitetemunia atiaketait naejai kiding Yesu ka Edeke Yawe, “Loejai Kuju Kakuj”?
Kosiom Matayo 3:16, 17.
-
Naadaunia Yesu aibatisaun, anyoika bo nuabu eporoto loabuni kokuju kolim?
-
Iwomit ijo arai eporoto ngol lokangai?
Kosiom Yokana 14:28.
-
Ingai bo epol ido ejaatar kapedor naikeara? Papa arai bo okoku?
-
Enyarit Yesu Yawe Papake. Inyo isisiauni oni kotoma akiro kangun?
Kosiom Yokana 12:49.
-
Eomit kereka Yesu ebe ngesi keda Papake eraasi itunganan idiope? Do bo jo, iwomit biai?
5. Nuitogogongitos ebe erai Yesu Mesia
Ejaasi adwareta nuipu Obaibuli nuingarakinete itunga ajenun Mesia—loeseunit Edeke alakun itunga. Koboliak EBIDIO kanu aisisiaun kaurianut ace kotoma adwareta nuabu Yesu kitodolik naabunio toma akwap.
Kosiom adwareta nu nuka Ebaibuli, kosodete aimor aingiseta nuetupakinete:
Kosiom Mika 5:2 kanu ajenun neabeit aurikin Mesia. b
-
Abu kereka aurio naka Yesu kitodolik adwaretait na?—Matayo 2:1.
Kosiom Isabulin 34:20 keda Sekaria 12:10 koany nuetetemitai kaidules nuikamunitos atwanare naka Mesia.
-
Apotu kereka adwareta nu kitodolikinos?—Yokana 19:33-37.
-
Iwomit kereka ijo ebe Yesu elopet abu kisipedo adwareta ngun aitodolikin koponeke?
-
Anyoika bo nuisisianakinete adwareta ngun ijo kanuikamunitos Yesu?
6. Imedauni oni kotoma aisisia nuikamunitos Yesu
Elimokinit Ebaibuli oni ajokis naka aisisia nuikamunitos Yesu keda epelu loeinakinit Edeke nges. Kosiom Yokana 14:6 keda 17:3, kosodete aimor aingiset nata:
-
Kanuinyo eraar ibore yenepol oni aisisia nuikamunitos Yesu?
Abu Yesu kongaik oni erot loisipedori oni adukun epaperone keda Edeke. Isisianakinit ngesi abeit naikamunit Yawe, ido kanukeng ipedori oni adumun aijar naka ikar kere
EBAKASI ICETUNGA EBE: “Mam Ajenak Luka Yawe iyuunitos Yesu.”
-
Ibongokini bo jo biai?
NUIDAU AISISIAUN
Erai Yesu emalaika lokapedor. Erai ngesi Mesia ido Okoku Loka Edeke.
Ainyogoor
-
Kanuinyo enyaritere Yesu “ekiyai loka isuban kere”?
-
Inyoin bo iswamat Yesu eringa ebuno toma akwap?
-
Epone ani ijenunia oni ebe erai Yesu Mesia?
ISISIAU BOBO NUTA
Isisiau nuipu nuikamunitos epone loijenunia oni ebe erai Yesu Mesia.
“Itogogongitos Kereka Adwareta Nuikamunitos Mesia Ebe Arai Yesu Mesia?” (Aisisiaet naka olago)
Kisisau arai ebala Ebaibuli ebe eurit Edeke Yesu kwape euriata itunga idwe.
“Kanuinyo Enyaritere Yesu Okoku Loka Edeke?” (Aisisiaet naka olago)
Koany kanuinyo mam Etiriniti eraar aisisianakin naelomunit kotoma Obaibuli.
“Erai Kereka Yesu Edeke?” (Watchtower, Elap Loiwongonet 1, 2009)
Kosiom epone loejulakinor aijar naka aberu akaulo naangicunia ngesi abeit nainerit Ebaibuli kanuikamunitos Yesu.
Ayudayat Itetemi Kanuinyo Ajalakinia Ngesi Ediinike” (Awake!, Elap Loikanyet 2013)
a Aisisiaet na 26 keda 27 epote aitetem kanuinyo ipudatar itunga aitajario keda epone loitajaria Yesu oni.
b Koany Nuengesete 2 kanu aisisiaun nuikamunitos adwaretait naitodunit apak cut naabeitor Mesia atakanun kotoma akwap.
