SAMBIRU 15
Kumbi Yesu Ndiyani?
Yesu ndi munthu yumoza mwa ŵanthu akuziŵika ukongwa mu mbiri yosi ya ŵanthu. Ŵanthu anandi aziŵa waka zina laki, kweni aziŵa vinandi cha vakukwaskana ndi iyu, ndipuso anandi ŵe ndi maŵanaŵanu ngakupambanapambana pa nkhani yakuti Yesu ndiyani. Kumbi Bayibolu likambanji vakukwaskana ndi iyu?
1. Kumbi Yesu ndiyani?
Yesu ndi mungelu yo waja kuchanya. Yehova wangwamba kulenga Yesu wechendalengi chinthu chinyaki chechosi. Ndichu chifukwa chaki Yesu wadanika kuti “wakwamba kuwaku pa chilengedu chosi.” (Akolose 1:15) Bayibolu likamba kuti Yesu ndi ‘mwana wapade’ waku Chiuta. Ve viyo chifukwa chakuti iyu pe ndiyu wakulengeka ndi Chiuta kwambula kugwiriskiya ntchitu munthu munyaki. (Yohane 3:16) Yesu wagwiriyanga ntchitu limoza ndi Awisi a Yehova ndipu wanguŵawovya pa ntchitu yakulenga vinthu vinyaki vosi. (Ŵerengani Nthanthi 8:30.) Yesu weche kulutirizga kuja pa ubwezi wakukho ndi Yehova. Iyu wakondwa kuteŵete nge wakulongoro mumalu mwaku Chiuta pamwenga kuti “Mazu” ndipu wapereka uthenga ndipuso ulongozgi wakutuliya kwaku Chiuta.—Yohane 1:14.
2. Ntchifukwa wuli Yesu wanguza pacharu?
Pafufupi vyaka 2,000 vo vajumpha, Yehova wangusamisa umoyu waku Yesu mwakuziziswa kutuwa kuchanya kuza panu pacharu chapasi. Iyu wangugwiriskiya ntchitu mzimu waki wakupaturika kuti waŵiki umoyu waku Yesu mumoyu mwaku Mariya yo wenga wechendagonanepu ndi munthulumi. Venivi vinguchitiska kuti Yesu wabaliki nge munthu pacharu. (Ŵerengani Luka 1:34, 35.) Mwaviyo, Yesu wanguzija Mesiya wakulayizgika pamwenga kuti Khristu kuti wataski ŵanthu. a Mauchimi ngosi nga mu Bayibolu ngakukwaskana ndi Mesiya ngangufiskika paku iyu ndipu venivi vinguwovya kuti ŵanthu aziŵi liŵi kuti Yesu ndi “Khristu, Mwana waku Chiuta wamoyu.”—Mateyu 16:16.
3. Kumbi Yesu wepani sonu?
Yesu wati wafwa nge munthu pacharu, Yehova wangumuyuska nge mungelu ndipu wanguwere so kuchanya. Kuchanya kweniko, “Chiuta wakumukweza ndi kumuŵika pamalu ngapachanya ukongwa.” (Afilipi 2:9) Sonu Yesu ndi mungelu wanthazi ukongwa ndipu ngwachiŵi kwaku Yehova.
SAMBIRANI VINANDI
Sambirani vinandi vo vingakuwovyani kuti mumuziŵi umampha Yesu kweniso wonani chifukwa chikulu cho titenere kusambiriya vakukwaskana ndi iyu.
4. Yesu ndi Chiuta Wanthazizosi cha
Bayibolu likamba kuti chinanga kuti Yesu ndi mungelu wanthazi ukongwa kuchanya, kweni wepasi paku Yehova Chiuta, wo Mbawisi. Ntchifukwa wuli tikamba viyo? Woneriyani VIDIYO kuti muwoni vo Bayibolu likamba pa nkhani ya mo Yesu wapambaniyana ndi Chiuta.
Malemba ngo nge mumphata ngatitiwovya kuti tivwisi ubali wo ulipu pakati paku Yehova ndi Yesu. Ŵerengani lemba lelosi pakulija ndipu pavuli paki kambiskanani mafumbu.
Ŵerengani Luka 1:30-32.
-
Kumbi mungelu wangukonkhoska kuti pe ubali wuli pakati paku Yesu ndi Yehova Chiuta “Wapachanya Limu”?
Ŵerengani Mateyu 3:16, 17.
-
Kumbi kuchanya kungutuwa mazu ngakuti wuli pa nyengu yo Yesu wabatizikanga?
-
Nanga yimwi muwona kuti ndiyani wangukamba mazu ngenanga?
Ŵerengani Yohane 14:28.
-
Mwakukoliyana ndi lemba ili, kumbi ndiyani yo ndi mura kweniso yo we ndi mazaza ngosi, Ada pamwenga mwana?
-
Kumbi Yesu wang’anamuwanganji wachikamba Yehova kuti Ada?
Ŵerengani Yohane 12:49.
-
Kumbi Yesu wawona kuti iyu ndi Awisi ndi munthu yumoza? Nanga yimwi muwona wuli?
5. Yesu wangulongo kuti ndi Mesiya
Bayibolu le ndi mauchimi nganandi ngo nganguwovya ŵanthu kuti amuziŵi liŵi Mesiya yo Chiuta wakumusankha kuti wataski ŵanthu. Woneriyani VIDIYO kuti muwonepu vinthu vimanavi waka vakukwaskana ndi mauchimi ngo Yesu wangufiska pa nyengu yo wenga pacharu chapasi.
Ŵerengani mauchimi nga mu Bayibolu yanga ndipu pavuli paki kambiskanani mafumbu.
Ŵerengani Mika 5:2 kuti muziŵi malu ngo ngangukambikiya limu kuti ndiku Mesiya wazamuwiya. b
-
Kumbi uchimi wenuwu ungufiskika wuli paku Yesu?—Mateyu 2:1.
Ŵerengani Salimo 34:20 ndi Zekariya 12:10 kuti muwoni vo mauchimi ngangukambiya limu vakukwaskana ndi nyifwa yaku Mesiya.
-
Kumbi mauchimi ngenanga ngangufiskika nadi?—Yohane 19:33-37.
-
Kumbi muwona kuti Yesu wanguchita waka vinthu mwakuchenje kuti mauchimi ngenanga ngafiskiki paku iyu?
-
Sonu kumbi yimwi muwona kuti venivi vilongonji vakukwaskana ndi Yesu?
6. Kusambira vakukwaskana ndi Yesu kutitiwovya ukongwa
Bayibolu lilongo kuti kusambira vakukwaskana ndi Yesu kweniso udindu waki nkhwakukhumbika ukongwa. Ŵerengani Yohane 14:6 ndi 17:3, pavuli paki kambiskanani fumbu ili:
-
Ntchifukwa wuli tikhumbika kusambira vakukwaskana ndi Yesu?
Yesu wakutijuliya nthowa kuti tije mabwezi ngaku Chiuta. Iyu wasambizanga uneneska wakukwaskana ndi Yehova ndipu tingazisaniya umoyu wambula kumala kuziya mwaku iyu
ŴANTHU ANYAKI AKAMBA KUTI: “Akaboni aku Yehova atimugomezga cha Yesu.”
-
Yimwi mungamuka wuli?
KUMBI MWASAMBIRANJI?
Yesu ndi mungelu wanthazi. Iyu ndi Mwana waku Chiuta kweniso ndi Mesiya.
Kuweriyamu
-
Ntchifukwa wuli Yesu wadanika kuti “wakwamba kuwaku pa chilengedu chosi”?
-
Kumbi Yesu wachitanganji wechendazi pacharu chapasi?
-
Kumbi tiziŵa wuli kuti Yesu ndi Mesiya?
FUFUZANI
Sambirani vinandi vakukwaskana ndi udindu waku Yesu nge Mesiya.
“Kumbi Mauchimi Ngakukamba Zaku Mesiya Ngalongo Kuti Yesu Wenga Mesiya?” (Nkhani ya pa webusayiti)
Wonani asani Bayibolu likamba kuti Chiuta wangubala Yesu nge mo ŵanthu achitiya.
“Ntchifukwa Wuli Yesu Wadanika Kuti Mwana Waku Chiuta?” (Nkhani ya pa webusayiti)
Wonani chifukwa cho tingakambiya kuti chisambizu chakuti kwe achiuta atatu chituliya mu Bayibolu cha.
“Kumbi Yesu ndi Chiuta?” (Chigongwi cha Alinda, April 1, 2009)
Ŵerengani nkhani iyi kuti muwoni mo munthukazi munyaki wangusinthiya maŵanaŵanu wati wafufuza mu Bayibolu ndi kuwona vo likamba vakukwaskana ndi Yesu.
“Munthukazi Wachiyuda Wangufufuza so Mwakuphwere vo Wagomezganga” (Jani Masu!, May 2013)
a Mu Sambiru 26 ndi 27 muwonengi chifukwa cho tikhumbikiya kuwomboleka ndipuso mo Yesu watitiwombole.
b Wonani Fundu Yakukumaliya 2 kuti muziŵi nyengu chayiyu yo yingukambikiya limu kuti Yesu wazamuwoneke pacharu.
Mungayanja Kuŵerenga so Nkhani Izi
MAFUMBU NGO ŴANTHU AFUMBA KAŴIKAŴI
Kumbi Sambiru la Bayibolu lo Akaboni aku Yehova Achitiska Ntchinthu Wuli?
Kuziya mu pulogilamu yawezi ya kusambira Bayibolu ndi Akaboni aku Yehova, mungagwiriskiya ntchitu Bayibolu lelosi. Mungadaniyaku banja linu losi pamwenga mabwezi nginu pa sambiru.
