FUNDO 15
Djesu ndiyani?
Djesu ndi umwe we munhu ano mbiri akamborarama panyika pano. Anhu ajinji aazii zvakawanda nge zvake, asi anondoziya zina rake basi, uye anoreketa zvakasiyana-siyana nge ndaa yekuti Djesu ndiani kamare. Bhaibheri rinobhuyei nge zvake?
1. Djesu ndiyani?
Djesu munhu we mwiya ano simba anogara kudenga. Ndiyena akatanga kusikwa na Djehovha Mwari, zviro zvimweni zvese zvisati zvasikwa. Ndiyo ndaa, iyena anodainzwa kuti, “dangwe re zvisikwa zvese.” (Akorosi 1:15) Bhaibheri rinoreketa nge zva Djesu hingana “Mwana akabarhwa ari ega” ngekuti ndiyena basi akasikwa na Djehovha kamare. (Juau 3:16) Djesu wakaseenza pamwepo na Baba ake, Djehovha, eciabetsera kusika zviro zvimweni zvese. (Erengai Zvierengo 8:30.) Djehovha na Djesu ano ushamwari wakabamba. Djesu anozwiwo “Soko,” ngekuti anoreketa masoko uye nhungamiriro eciimirira Mwari.—Juau 1:14.
2. Djesu akawirei pa nyika?
Makore 2000 akadarika, Djehovha akaita cishamiso eciseenzesa mwiya mucena wake kuti acinje upenyu wa Djesu kubva kudenga kwenda mu ndani me mhandwe imweni inozwi Mariya. Izvona zvakaita kuti Djesu abarhwe hinga munhu we nyama. (Erengai Ruka 1:34, 35.) Djesu akauya panyika kuti agare Mesiya kana kuti Kristu akapikirhwa, uye kuti aponese anhu. a Uphorofita wese we mu Bhaibheri unoreketa nge zva Mesiya wakadzadzika pana Djesu, uye zvakabetsera anhu kuti aziye kuti Djesu ainga ari “Kristu, Mwana wa Mwari mupenyu.”—Mateu 16:16.
3. Parizvino Djesu arikupi?
Djesu paakafa, akamutswa ano muiri we mwiya uye akahwirira kudenga. Ikona, “Mwari akamukwidziridza pacigaro ce pamusoro-soro.” (Afiripi 2:9) Parizvino, Djesu anocigaro cakakura maningi zvekuti Djehovha basi ndiyena anocigaro cakakura kupinda cake.
FUNDAI ZVAKAWANDA
Ziyai zvakawanda nge zva Djesu uye onai kuti ngei kufunda nge zvake kecikosha.
4. Djesu andiyepi Mwari we Masimba Ese
Bhaibheri rinofundisa kuti kunyazi Djesu ano simba kupinda zvisikwa zvimweni zviri kudenga, iyena anodzikanda pasi pa Mwari wake uye Baba ake, Djehovha. Ngei tecibhuya kudaro? Ridzai VHIDHIYO kuti tione zvinorekethwa nge Bhaibheri nge zve musiyano uripo pakati pa Djesu na Mwari we masimba ese.
Tsamba dzinoteera dzicatibetsera kuona kuti Djehovha na Djesu anhu akasiyana. Erengai tsamba imwe na imwe, pedzepo cedzai nge zve mibvunzo dzinoteera.
Erengai Ruka 1:30-32.
-
Masoko e ngirozi anopangidza kudini kuti Djesu na Djehovha Mwari, “we Kumusoro-soro”?
Erengai Mateu 3:16, 17.
-
Pa rubhabhatidzo ra Djesu, izwi rakabva kudenga rakatii?
-
Munorangarira kuti rainga riri izwi rani?
Erengai Juau 14:28.
-
Ndiyani mukuru uye ano simba rakakura pakati pa baba uye mwana?
-
Djesu aida kureyei paakabhuya kuti Djehovha ndi Baba ake?
Erengai Juau 12:49.
-
Djesu anorangarira kuti iyena na Baba ake akaezana here? Imwimwi munorangarirawo kudini?
5. Djesu akapangidza kuti ndiyena Mesiya
Bhaibheri rino uphorofita wakawanda wakabetsera anhu kuti aziye Mesiya—munhu wakasanangurhwa na Mwari kuti aponese anhu. Ridzai VHIDHIYO inopangidza nge zve uphorofita unganani wakadzadziswa na Djesu paakauya pa nyika.
Erengai uphorofita uri mu tsamba dzinoteera, pedzepo cedzai nge zve mibvunzo dzinoteera:
Erengai Mika 5:2 kuti muone kaizobarirhwa Mesiya. b
-
Uphorofita uu wakadzadzika kudini Djesu paakabarhwa?—Mateu 2:1.
Erengai Pisarema 34:20 uye Zakariya 12:10 kuti muone uphorofita unoreketa nge zve mafire aizoita Mesiya.
-
Uphorofita uu wakadzadzika here?—Juau 19:33-37.
-
Munorangarira kuti Djesu akaita zvekuronga here kuti uphorofita uu udzadzike?
-
Izvi zvinopangidzei nge zva Djesu?
6. Isusu tinobetsereka nge kufunda nge zva Djesu
Bhaibheri rinobhuya kuti zvinokosha maningi kufunda nge zva Djesu uye nge zve basa rake. Erengai Juau 14:6 uye 17:3, pedzepo cedzai nge zve mubvunzo unoteera:
-
Ngei zvecikosha kufunda nge zva Djesu?
Djesu akafungura gwanza kuti tigare shamwari ya Mwari. Iyena akafundisa cokwadi nge zva Djehovha uye tingaona upenyu usikaperi peciseenzeswa iyena
ANHU AMWENI ANOTI: “Apupuri a Djehovha aatendi muna Djesu.”
-
Maizoadaira kudini?
MUCIGWAGWA
Djesu ndi munhu we mwiya ano simba. Ndiyena Mwana wa Mwari uye Mesiya.
Mibvunzo yekuhwirinzira
-
Ngei Djesu ecizwi “dangwe rezvisikwa zvese”?
-
Djesu aiitei kudenga, asati auya pa nyika?
-
Tinoziya kudini kuti Djesu ndiyena Mesiya?
ZIYAI ZVAKAWANDA
Fundai zvakawanda nge zve basa ra Djesu hingana Mesiya.
“Uphorofiti we Bhaibheri Unopangidza kuti Djesu Ainga ari Mesiya Here?” (Fundo ye mu saite)
Erengai mu Bhaibheri muone kuti irona rinofundisa kuti Mwari akabara Djesu hingana maberekerhwe anoizwa ana e anhu here.
Onai kuti ngei Utatu isiripi fundo inobva mu Bhaibheri.
Erengai kuti upenyu we mwanakadzi umweni wakacinja kudini mumasure mekukwarakwatisa zvinoreketwa no Bhaibheri nge zva Djesu.
“Mu Djudhiya Ecipanganidza kuti Ngei Wakaongorora Kutenda Kake” (Mukai!, ya Mayo 2013)
b Onai Nyasai Kuzwisisa 2 kuti muone uphorofita wakareketa nge zve nguwa yaizouya Mesiya pa nyika.
