YOOSOMA 15
Yesu Kristu ti Pani?
Yesu onnisuweliwa vanceene ni apinaatamu. Hata asuwelaka nsina nawe, awo khanimusuwela oratteene ni arina miyuupuwelo soovirikana. Biibiliya onihimya exeeni voohimya sa Yesu?
1. Yesu ti pani?
Yesu nlaikha noowerya ninkhala wiirimu. Ohinatthi opattuxa itthu sikina, Yehova ampattunxe Yesu. Tivonto Biibiliya onihimya awe wira Yesu “topacenrye opattuxiwa mwa itthu sotheene”. (aKolosi 1:15) Nave Biibiliya onnimuhimya Yesu okhala ‘Mwaana mmoseene’ a a Muluku. (Nwehe enoota.) Mwaha woowi Yesu paahi topattuxiwe ni mwaneene ene Yehova. (Yohani 3:16) Yesu aavara vamosa ni Tiithi awe Yehova omukhaliheryaka opattuxa itthu sootheene sikhanle. (Musome Miruku 8:30.) Tthiri Yehova ni Yesu yaaniphentana vanceene, eyo enooniherya wira Yesu ookhalana waataana wooloka ni Yehova. Nave Yesu namitthaka oororomeleya a Yehova, eyo enooniherya wira onnivaha mihupi ni malakiheryo a Yehova. Tivonto Biibiliya onimuhimya awe Yesu okhala “Nsu”.—Yohani 1:14.
2. Xeeni Yesu ohalaka orwa valaponi?
Iyaakha 2000 sivinre, Yehova aahipaka mwiiriirya. Owo aahirumeela munepa awe woowaarya wira othaamihe okumi wa Yesu wiirimu oroihaka mmirimani mwa muthiyana iihaniwa Maria. Nto Yesu aahiyariwa khukhala pinaatamu. (Mmusome Luka 1:34, 35.) Yehova aahimuruma Yesu orwa valaponi wira okhale Mesiya aaleiheriwe wala Kristu, yoowo aarowa owoopola apinaatamu. b (Nwehe enoota) Yesu aahimaliherya iprofesia sootheene saamuhimya Mesiya, eyo yaahaakhaliherya atthu akina osuwela wira Yesu aari “Kristu, Mwaana a Muluku mukumi”.—Matheyo 16:16.
3. Yesu ori woowi?
Nuumala Yesu wiiviwa, owo oohihihimuxiwa khukhala nlaikha ni ootthikela wiirimu. Nto wiirimu “Muluku onvuwiha vanceene” Yesu. (aFilipi 2:9) Vano Yesu nlaikha noowerya. Yehova paahi torina owerya onvikana Yesu.
MWIIXUTTE ITTHU SIKINA
Nwehe itthu sikina sinrowa wookhaliheryani omusuwela oratteene Yesu ni efaita erina aya omusuwela Yesu.
4. Yesu khahiyo Muluku Oowerya Sootheene
Biibiliya onihimya wira Yesu nlaikha noowerya wiirimu. Hata vari siiso, onnimwiiwelela Muluku awe ni Tiithi awe, Yehova. Ninsuwela sai? Nwehe EVIIDIYU enrowa wookhaliheryani woona ele Biibiliya onihimya awe sa ovirikana okhanle voohimya sa Yesu ni Muluku oowerya sootheene.
Soolepa siri vathi-vo, sinninikhaliherya osuwela wira Yehova ni Yesu atthu oovirikana. Musome khula yoolepa nuumala-vo mwaakhule makoho.
Mmusome Luka 1:30-32.
-
Moolumo a nlaikha anooniherya sai wira Yesu ni Yehova yoowo ori “Muluku Muulupalexa” atthu oovirikana?
Mmusome Matheyo 3:16, 17.
-
Okathi Yesu aapatisiwa awe, nsu naakhumme wiirimu naahimmye exeeni?
-
Munoona wira nsu nne naari naawani?
Mmusome Yohani 14:28.
-
Vatthokoni tani orina okhulupale? Tiithi wala mwaana?
-
Yesu aahimuhimya Yehova okhala Tiithi awe, eyo enniixuttiha exeeni?
Mmusome Yohani 12:49.
-
Niireke Yesu onuupuwela wira onoolikana ni Tiithi awe? Nyuwo munoona wira Yesu onoolikana ni Tiithi awe?
5. Itthu sinooniherya wira Yesu aari Mesiya aaleiheriwe
Biibiliya ookhalana iprofesia sinceene saakhalihenrye atthu omusuwela Mesiya, niire so, ole Muluku omuthanlale awe wira owoopole apinaatamu. Nwehe EVIIDIYU wira moone iprofesia vakhaani Yesu aamalihenrye awe okathi aari awe valaponi.
Musome iprofesia sinittharelana, nuumala-vo mwaakhule makoho:
Mmusome Mikeya 5:1 wira nwehe opuro Mesiya aarowa awe oyariwa. c
-
Niireke eprofesia ela ehiiraneya?—Matheyo 2:1.
Musome Esalimo 34:21 ni Zakariya 12:10, wira nwehe itthu Biibiliya aahimmye awe khalai ene sa moota Mesiya aarowa awe wiiviwa.
-
Opuro xeeni iprofesia iya siiraneyale aya?—Yohani 19:33-37.
-
Atthu akina anihimya wira yookhala etthu Yesu aapanke awe wira iprofesia iya siiraneye. Nyuwo munoona wira eyo ekeekhai?
-
Eyo enooniherya exeeni voohimya sa Yesu?
6. Omusuwela Yesu onniniphwanyiha itthu sooreera
Biibiliya onihimya wira ti vooloka omusuwela Yesu ni ele Muluku omurumme awe wira opakeke. Mmusome Yohani 14:6 ni 17:3, nuumala-vo mwaakhule nikoho ninttharelana:
-
Xeeni vari aya vooloka omusuwela Yesu?
Yesu oohula ephiro wira nikhale apatthani a Muluku. Owo ohiixuttiha ekeekhai voohimya sa Yehova, nave Yesu onninikhaliherya wira niphwanye okumi woohimala
ATTHU AKINA ANIHIMYA WIRA: “Anamoona a Yehova khanimukupali Yesu”.
-
Nyuwo mwaarowa owaakhula sai?
IPONTO SUULUPALE
Yesu nlaikha noowerya. Owo Mwaana a Muluku ni Mesiya aaleiheriwe.
Wuuluula
-
Xeeni onihimmwa aya wira Yesu “topacenrye opattuxiwa mwa itthu sotheene”?
-
Yesu aapaka exeeni ohinatthi orwa valaponi?
-
Ninsuwela sai wira Yesu aari Mesiya?
NWEHE ITTHU SIKINA
Nwehe itthu sikina sinooniherya wira Yesu aari Mesiya.
“Niireke Iprofesia sa mBiibiliyani Sinnooniherya Wira Yesu Aari Mesiya?” (Mwaha ori va jw.org)
Niireke Muluku aamuyanre Yesu ntoko apinaatamu anaayara aya anamwane? Biibiliya oniixuttiha exeeni?
“Xeeni Yesu Onihimmwa Awe Okhala Mwaana a Muluku?” (Mwaha ori va jw.org)
Nwehe itthu sinooniherya wira yowiixuttiha ya amuluku araru khenikhuma mBiibiliyani.
Nwehe moota okumi wa muthiyana mmosa waaturukeyale aya nuumala otokosa ele Biibiliya onihimya awe voohimya sa Yesu.
“Etthu Yaamwiirinhe Muthiyana MuYuda Ovarerya Waamini Wawe” (Nvenye!, Maio 2013)
a Biibiliya khoniixuttiha wira Muluku aamuyanre Yesu ntoko apinaatamu anaayara aya anamwane.
b Yoosoma 26 ni 27 ninrowa oweha nthowa naya apinaatamu yaareerela aya woopoliwa ni moota Yesu owooponle awe.
