LESON 15
Azovy ma Jesosy Zen̈y?
Jesosy io an̈isany olo farany malaza amy tantara. Fa matetiky, an̈aranany fo ten̈a hainolo, fa iro tsy mahay raha maro momba izy, avio iro samy amy fahaizany izy. Ino raha volan̈iny Baiboly momba Jesosy?
1. Azovy ma Jesosy zen̈y?
Jesosy io anjely mahery mipetraka andan̈itry an̈y. Izy niasainy Jehovah voanalohany, talohany raha jiaby. Zen̈y mahavy izy kahian̈a “talan̈olo amy raha jiaby niasain̈y.” (Kolosianina 1:15) Baiboly koa mivolan̈a fa Jesosy io ‘Zanaka lahitokany’ Zan̈ahary, fotony Jehovah zaraiky fo niasa izy. (Jaona 3:16) Jesosy niaraka niasa mare tamy Jehovah Babany io, nan̈ampy izy niasa raha hafa jiaby. (Vakia Ohabolana 8:30.) Jesosy ravoravo mare, fotony mbala mifandray marikitry amy Jehovah fo. Izy pitondra hafatrany Zan̈ahary, sady tsy nivadiky taminany. “Ny Teny” ivolan̈ana izy amy Baiboly ao, fotony izy pitondra hafatrany Zan̈ahary ndreky toromarikinany.—Jaona 1:14.
2. Ino ma antony naviany Jesosy tambony tany teto?
Efa 2000 taon̈o zay loso, Jehovah nan̈ano fahagagan̈a, ke nampiasa fan̈ahy masin̈inany namindra fahin̈any Jesosy baka tandan̈itry tan̈y, tan̈aty kibony man̈angy virijiny, Maria an̈arany. Zen̈y nahavy Jesosy koa fa teraka, nanjary olo. (Vakia Lioka 1:34, 35.) Jehovah nan̈iraka Jesosy tambony tany teto, hataony Mesia na Kristy nampan̈antinain̈y, avio han̈avotro olombelon̈o. a Tanteraka tamy Jesosy aby faminanian̈a jiaby momba Mesia, ke zen̈y nahaizanolo fa izy “Kristy, Zanaka Zan̈ahary velon̈o.”—Matio 16:16.
3. Aia Jesosy izioty?
Tapitry fiain̈anany Jesosy tamy naha olombelon̈o izy, koa fa naty izy. Ke izy koa fa nivilomin̈y, izy nanjary anjely, avio izy nimpody andan̈itry. Izy an̈y ‘namiany Zan̈ahary toeran̈a an̈abo mare.’ (Filipianina 2:9) Ke nahazo fahifan̈a maventy Jesosy izioty. Izy fan̈arakaraka Jehovah.
ALEVA ONON̈O
Diniha azovy marin̈y ma Jesosy io, avio nan̈ino ten̈a ilain̈y mahay izy.
4. Jesosy tsy Zan̈ahary Farany Mahery
Baiboly mampianatra fa Jesosy ndray anjely mahery andan̈itry an̈y, izy tsy an̈abo mandilatra Jehovah Babany io. Nan̈ino ma atsika mivolan̈a zen̈y? Alifasa VIDEO io ahitanao raha ampianariny Baiboly momba raha tsy mampitovy Jehovah ndreky Jesosy.
Iro toko sy andininy aby ty man̈ampy atsika hahay azovy Jehovah, avio azovy Jesosy. Vakia tsiaraikiaraiky iro io, avio iaraha dinihin̈y fan̈ontanian̈a aby ty:
Vakia Lioka 1:30-32.
-
Izikoa volan̈any anjely io zahan̈a, inony Jesosy ma Jehovah “Farany An̈abo” io?
Vakia Matio 3:16, 17.
-
Tamy batisany Jesosy, ino raha nivolan̈iny feo baka tandan̈itry tan̈y?
-
Araka dinikinao, feonjovy izin̈y?
Vakia Jaona 14:28.
-
Azovy bebe taon̈o ndreky bebe fahifan̈a? Baba sa zanaka?
-
Jesosy nikaiky Jehovah io Babany. Ino raha ianarantsika baka amy zen̈y?
Vakia Jaona 12:49.
-
Jesosy ma mba efa navy nieritreritry fa izy ndreky Babany io olo araiky fo? Akory fahitanao zen̈y?
5. Ino ma mankamarin̈y fa Jesosy io Mesia ankitin̈y?
Amy Baiboly ao misy faminanian̈a maro nan̈ampy olo hahay Mesia, araiky nifidiny Zan̈ahary han̈avotro olombelon̈o io. Alifasa VIDEO io ahitan̈a iro faminanian̈a nitantirahiny Jesosy, taminizy navy tambony tany teto.
Vakia iro faminanian̈a amy Baiboly io, avio iaraha dinihin̈y fan̈ontanian̈a aby ty:
Vakia Mika 5:2 ahaizanao taia tany hitirahany Jesosy. b
-
Tanteraka ma faminanian̈a io tamy Jesosy teraka?—Matio 2:1.
Vakia Salamo 34:20 ndreky Zakaria 12:10 ahitanao faminanian̈a momba nifatesany Mesia.
-
Tanteraka ma faminanian̈a aby io?—Jaona 19:33-37.
-
Fahitanao izy, nisy raha ma nataony Jesosy baka ho tanteraka taminany faminanian̈a aby io?
-
Izikoa zen̈y zahan̈a, azovy Jesosy?
6. Hatsaran̈a azontsika baka amy fahaizan̈a Jesosy
Koran̈iny Baiboly mazava tsara fa ten̈a ilain̈y mianatra raha momba Jesosy ndreky mahay ino andraikitry nankininy Jehovah taminany. Vakia Jaona 14:6 ndreky 17:3, avio iaraha dinihin̈y fan̈ontanian̈a ty:
-
Nan̈ino ten̈a ilain̈y mianatra momba Jesosy?
Jesosy nan̈abian̈a lalan̈a, baka anao hanjary kamaradiny Zan̈ahary. Izy nampianatra fahamarin̈ana momba izy ndreky Jehovah, ke atsika afaka hahazo fiain̈ana tsisy farany, aminy alalany Jesosy.
MISY OLO MIVOLAN̈A: “Vavolombelon̈o Jehovah tsy mino Jesosy.”
-
Akory hamalianao zen̈y?
INO RAHA NIANARANAO TATO?
Jesosy io anjely mahery. Izy Mesia, Zanaka Zan̈ahary.
Fan̈ontanian̈a Fameren̈ana
-
Nan̈ino ma Jesosy kahian̈a “talan̈olo amy raha jiaby niasain̈y”?
-
Ino raha nataony Jesosy, talohany naviany tambony tany teto?
-
Akory hahaizantsika fa Jesosy ankitin̈y Mesia?
ZAHAVA
Ianara tsara ino mahavy atsika matoky fa Jesosy ankitin̈y Mesia.
“Faminanian̈a Momba Mesia ma Man̈aporofo fa Jesosy Ankitin̈y Mesia?” (Lahatsoratra aminy Internet)
Zahava ato asa Baiboly mampianatra fa Jehovah io nanambady ke niteraka Jesosy, karaha ataony babany tsaiky miteraka in̈y.
“Nan̈ino Jesosy Kahian̈a Zanaka Zan̈ahary?” (Lahatsoratra aminy Internet)
Diniha nan̈ino Zan̈ahary Tokana Olo Telo zen̈y tsy fampianaran̈a baka amy Baiboly.
“Jesosy ma Zan̈ahary?” (Tilikambo Fiambesan̈a 1 Avrily 2009)
Zahava akory nampiova fiain̈anany man̈angy araiky, izy koa fa nandiniky raha volan̈iny Baiboly momba Jesosy.
“Man̈angy Jiosy Araiky Nimpody Nandiniky Ndraiky Raha Ninoany” (Mifohaza! May 2013)
a Amy Leson 26 ndreky 27 atsika handiniky nan̈ino olo mila havotan̈a avio akory nataony Jesosy nan̈avotro atsika.
b Zahava amy Fan̈azavan̈a 2 faminanian̈a man̈ambara fotoan̈a marin̈y tsarabe nisehoany Jesosy tambony tany teto.
Mety ho Tianao Koa
RAHA MATETIKY AN̈ONTANIANOLO
Karakory ma Atao Mianatra Baiboly Zen̈y?
Tsy man̈efa mianatra Baiboly amy Vavolombelon̈o Jehovah. Mety tahominao miaraka mianatra aminao koa havanao ndreky kamaradinao. Lera anao mianatra, anao afaka mampiasa zay fandikanteniny Baiboly tianao.
