PWONY ME 16

Tic Ango ma Yecu Otimo i Kare ma En Tye i Lobo?

TUKI

Jo mapol gineno Yecu calo latin lakere, lanebi mo maryek, nyo laco ma tye ka to i kom yat. Ento tika watwero pwonyo lok mapol i kome ki i ngiyo jami ma en otimo i kare ma tye ka kwo i lobo? I pwony man, wabinyamo jami ma pigi tego ma Yecu otimo ki kit ma gitwero konyi kwede.

1. Tic ma pire tek loyo bot Yecu onongo obedo ngo?

Tic ma pire tek loyo bot Yecu onongo obedo ‘tito lok me kwena maber me Ker pa Lubanga.’ (Kwan Luka 4:43.) En otito kwena maber ni Lubanga biketo ker nyo gamente ma bicobo pekki pa dano ducu. a Pi mwaki adek ki nucu, Yecu otiyo matek me tito ki dano kwena me cuko cwiny man.—Matayo 9:35.

2. Pingo Yecu otimo tango?

Baibul tito pi “tic madito me twero, ki tango ki lanyut mapol ma Lubanga otiyo kacel [ki Yecu].” (Tic pa Lukwena 2:22) Ki teko pa Lubanga, Yecu obedo ki twero me juko nam ma onongo tye ka twagge ki yamo magwar, pito jo alip mapol, cango lutwo, ki bene cero jo ma guto. (Matayo 8:23-27; 14:15-21; Marako 6:56; Luka 7:11-17) Tango ma Yecu otimo onyuto ka maleng ni Lubanga aye oore. Tango magi bene onyuto ni Jehovah tye ki teko me cobo pekkiwa ducu.

3. Gin ango ma watwero pwonyo ki i kit ma Yecu okwo kwede?

Yecu obedo lawiny bot Jehovah i jami ducu. (Kwan Jon 8:29.) Kadi bed Yecu okato ki i aunauna, en otimo jami ducu ma Wonne openye ni otim nio wa i tone. En onyuto ka maleng ni twere pi dano me tic pi Lubanga, kadi bed gitye ka kato ki i kwo matek. Pi meno, Yecu ‘oweko botwa lanen maber me aluba, wek walub kore.’—1 Petero 2:21.

NONG NGEC MATUT

Nong ngec matut i kom kit ma Yecu onywako kwede kwena maber dok otimo kwede tango.

4. Yecu onywako kwena maber

Yecu onongo woto pi mairo miya mapol i yo ma opong ki apwa, kun nywako kwena maber-ri ki dano mapol kit ma etwero kwede. Kwan Luka 8:1, ci wunyam lapeny magi:

Tika Yecu onongo tito kwena bot jo ma gucokke ka winyo lokke keken?
Yecu otute nining me nongo dano?

Lubanga otito con ni Meciya binywako kwena maber. Kwan Icaya 61:1, 2, ci wunyam lapeny magi:

Yecu ocobo lok pa lanebi man nining?
Tika itamo ni mitte ni dano i kare-ni guwiny kwena maber-ri?

5. Yecu opwonyo lok ada ma pigi tego

Medo i kom tito kwena maber me Ker pa Lubanga, Yecu bene opwonyo lok ada ma tye me kony adada. Nen kong labol mogo manok ki i Pwonye me Wi Got. Kwan Matayo 6:14, 34, ki 7:12, ci wunyam lapeny magi:

Tam ango ma tye me kony ma Yecu omiyo i tyeng magi?
Tika itamo ni tam magi pud twero konyo dano wa i kare-ni?

6. Yecu otimo tango mapol

Jehovah omiyo ki Yecu teko me timo tango mapol. Me neno labol acel, kwan Marako 5:25-34 nyo tuk VIDIO. I ngeye, wunyam lapeny ma lubo-ni.

VIDIO: Kicango Dako ma Kome Lit (5:10)

Gin ango ma dako-ni onongo tye ki gen matek iye?
Ngo ma ogudo cwinyi madok i kom tango man?

Kwan Jon 5:36, ci wunyam lapeny man:

Tango ma Yecu otimo ‘obedo caden,’ nyo onyuto gin ango madok i kome?

Tika onongo ingeyo?

Pol pa jami ma wangeyo madok i kom kwo pa Yecu tye kicoyo i bukke angwen me Baibul ma kilwongogi ni Jiri—Matayo, Marako, Luka, ki Jon. Laco Jiri acel acel otito jami mapatpat madok i kom Yecu. Ka wakwano bukke angwen magi ducu, watwero neno kit ma kwone onongo tye kwede.

MATAYO

aye okwongo coyo Jirine. Tittiwa jami mapol madok i kom pwony pa Yecu, tutwalle gin ma Yecu opwonyo i kom Ker pa Lubanga.
MARAKO

ocoyo Jiri macek loyo. Tittiwa jami mamwonya adada ma otimme.
LUKA

tittiwa kit ma lega onongo pire tek kwede bot Yecu ki kit ma Yecu onongo tero kwede mon i yo me kica.
JON

tittiwa jami mapol ma Yecu oloko iye ki lureme macok kacel ki jo mukene. Man konyowa me niang kit dano ango ma Yecu onongo obedo.