NÍ KASEMI 16
Mɛni Níhi Nɛ Yesu Pee Benɛ E Ngɛ Zugba a Nɔ ɔ?
Nihi fuu le Yesu he sane. Se a kpɛti ni komɛ ngɛ nɛ nɔ́ nɛ ya nɔ ngɛ e bimwɔyo mi ɔ he sane pɛ nɛ a le, ni komɛ hu le lɛ kaa gbalɔ nɛ e ngɛ nile, nɛ ni komɛ hu ngɛ nɛ e gbenɔ ɔ he sane pɛ nɛ a le. Se ke wa kase e si himi ngɛ zugba a nɔ ɔ he ní ɔ, wa ma nyɛ maa le níhi fuu kɛ kɔ e he. Ngɛ ní kasemi nɛ ɔ mi ɔ, wa ma susu ní komɛ nɛ Yesu pee, kɛ bɔ nɛ o ma ná he se ha a he.
1. Mɛni ji ní tsumi titli nɛ Yesu tsu?
Ní tsumi titli nɛ Yesu tsu ji kaa e “jaje Mawu Matsɛ Yemi ɔ he sane kpakpa a” kɛ ha nihi. (Kane Luka 4:43.) Sane kpakpa nɛ e fiɛɛ ɔ ji kaa Mawu maa to matsɛ yemi ko sisi, nɛ e ma tsu adesahi a nyagbahi tsuo a he ní. a Yesu bɔ mɔde wawɛɛ nɛ e kɛ jeha etɛ fiɛɛ sɛ gbi nɛ woɔ nɔ he wami nɛ ɔ.—Mateo 9:35.
2. Mɛni yi mi tomi he je nɛ Yesu pee nyakpɛ níhi?
Baiblo ɔ tu “he wami ní tsumihi kɛ nyakpɛ níhi kɛ okadihi nɛ Mawu gu [Yesu] nɔ” kɛ pee ɔ he munyu. (Ní Tsumi 2:22) Mawu ha Yesu he wami nɛ e kɛ kudɔ adebɔ níhi, e kɛ ha nimli akpehi abɔ niye ní, nɛ e kɛ tle gbogboehi po si kɛ ba wami mi. (Mateo 8:23-27; 14:15-21; Maako 6:56; Luka 7:11-17) Nyakpɛ níhi nɛ Yesu pee ɔ ha nɛ e pee heii kaa Mawu nɛ tsɔ lɛ. Enɛ ɔmɛ tsuo tsɔɔ kaa Yehowa ngɛ he wami nɛ e kɛ ma tsu wa nyagba amɛ tsuo a he ní hwɔɔ se.
3. Mɛni wa ma nyɛ maa kase ngɛ bɔ nɛ Yesu hi si ha a mi?
Yesu bu Yehowa tue ngɛ nɔ́ fɛɛ nɔ́ mi. (Kane Yohane 8:29.) E ngɛ mi kaa nihi te si kɛ wo Yesu mohu lɛɛ, se e kɛ anɔkuale yemi pee níhi nɛ e Tsɛ ɔ ngɛ hlae kaa e pee ɔ hluu kɛ ya si e gbenɔ mi. Nɔ́ nɛ Yesu pee ɔ ha nɛ wa na kaa ke adesahi kɛ si fɔfɔɛhi nɛ a mi wa ngɛ kpee po ɔ, a ma nyɛ ma sɔmɔ Mawu. Yesu pee enɛ ɔ kɛ pee “nɔ hyɛmi nɔ́ ha [wɔ] konɛ [waa] nyɛɛ e nane mami he ɔmɛ a se haa.”—1 Petro 2:21.
MOO KASE BABAUU
Moo kase sane kpakpa a nɛ Yesu fiɛɛ kɛ ha nihi, kɛ nyakpɛ níhi nɛ e pee ɔ he ní.
4. Yesu fiɛɛ sane kpakpa a
Yesu nyɛɛ bunyuku blɔhi a nɔ si tomi lafahi abɔ nɛ e ya fiɛɛ sane kpakpa a kɛ ha nihi fuu. Nyɛɛ kane Luka 8:1 ɔ, nɛ nyɛ susu sane bimihi nɛ nyɛɛ se nɛ ɔmɛ a he:
-
Anɛ Yesu fiɛɛ kɛ ha nihi nɛ a ba bua a he nya konɛ a bu lɛ tue ɔ pɛ lo?
-
Mɛni mɔde nɛ Yesu bɔ konɛ e nine nɛ su nihi a nɔ?
Mawu ha nɛ a gba kɛ fɔ si kaa Mesia a maa fiɛɛ sane kpakpa. Nyɛɛ kane Yesaya 61:1, 2 ɔ, nɛ nyɛ susu sane bimihi nɛ nyɛɛ se nɛ ɔmɛ a he:
-
Mɛni Yesu pee nɛ lɔ ɔ ha nɛ gbami nɛ ɔ ba mi?
-
Anɛ o susu kaa mwɔnɛ ɔ, e sa kaa nihi nɛ a nu sane kpakpa nɛ ɔ lo?
5. Yesu tsɔɔ anɔkualehi nɛ a he ngɛ se nami
Ngɛ sane kpakpa nɛ kɔɔ Mawu Matsɛ Yemi ɔ he nɛ Yesu fiɛɛ ɔ se ɔ, e tsɔɔ níhi nɛ maa ye bua wɔ ngɛ wa si himi mi hulɔ. Moo hyɛ enɛ ɔ he nɔ hyɛmi ní komɛ nɛ e tu a he munyu ngɛ e Yoku ɔ Nɔ Fiɛɛmi nɛ nihi le wawɛɛ ɔ mi ɔ. Nyɛɛ kane Mateo 6:14, 34 kɛ 7:12 ɔ, nɛ nyɛ susu sane bimihi nɛ nyɛɛ se nɛ ɔmɛ a he:
-
Mɛni ga womihi nɛ́ a he ngɛ se nami nɛ Yesu kɛ ha ngɛ ngmami nɛ ɔmɛ a mi?
-
Anɛ o susu kaa ga womi nɛ ɔmɛ maa ye bua nihi mwɔnɛ ɔ lo?
6. Yesu pee nyakpɛ níhi
Yehowa ngɔ e mumi klɔuklɔu ɔ kɛ ye bua Yesu nɛ e pee nyakpɛ níhi babauu. Ke o suɔ nɛ o na enɛ ɔ he nɔ hyɛmi nɔ́ ɔ, nyɛɛ kane Maako 5:25-34 ɔ, aloo mo je VIDEO ɔ. Lɔ ɔ se ɔ, nyɛ susu sane bimihi nɛ nyɛɛ se nɛ ɔmɛ a he.
-
Mɛni hemi kɛ yemi nɛ yo ɔ ngɛ video ɔ mi ɔ ngɛ?
-
Mɛni nɛ o bua jɔ he ngɛ nyakpɛ nɔ́ nɛ ɔ he?
Nyɛɛ kane Yohane 5:36, nɛ nyɛ susu sane bimi nɛ ɔ he:
-
Mɛni “odase” nɛ nyakpɛ níhi nɛ Yesu pee ɔ yeɔ ngɛ e he?
Anɛ o le lo?
Níhi babauu nɛ wa le ngɛ Yesu he ɔ ngɛ Baiblo mi womihi nɛ a tsɛɛ ke Sane Kpakpa amɛ ɔ a mi. Womi nɛ ɔmɛ ji, Mateo Sane Kpakpa a, Maako Sane Kpakpa a, Luka Sane Kpakpa a, kɛ Yohane Sane Kpakpa a. Sane kpakpa ngmali nɛ ɔmɛ a ti nɔ fɛɛ nɔ de nɔ́ ko nɛ ngɛ slɔɔto kɛ kɔ Yesu he. Sane kpakpa eywiɛ nɛ ɔmɛ tsuo haa nɛ wa leɔ Yesu si himi he sane saminya.
-
MATEO
ngma e Sane Kpakpa a kekle. E sane kpakpa a tu Yesu tsɔɔmi ɔmɛ babauu a he munyu, titli ɔ, Mawu Matsɛ Yemi ɔ.
-
MAAKO
Sane Kpakpa a ji nɔ́ nɛ nya kɛ we kulaa. E tu níhi nɛ ya nɔ nɛ ngɛ bua jɔmi ɔmɛ a he munyu.
-
LUKA
Sane Kpakpa a hu ha nɛ wa na bɔ nɛ sɔlemi he hia Yesu ha, kɛ jehanɛ se hu ɔ, bɔ nɛ e je mi mi sami kpo kɛ tsɔɔ yihi ha.
-
YOHANE
hu tu níhi nɛ Yesu kɛ e huɛmɛ, kɛ ni kpahi sɛɛ a he ní ɔ he munyu. Nɛ enɛ ɔ yeɔ bua wɔ nɛ wa leɔ nɔ tutuutu nɛ Yesu ji.
NI KOMƐ DEƆ KE: “Nɔmlɔ kpakpa ko kɛkɛ ji Yesu, se pi lɛ ji Mesia a.”
-
Kɛ mo hu o susu kɛɛ?
NYA MWƆMI
Yesu fiɛɛ kɛ kɔ Mawu Matsɛ Yemi ɔ he, e pee nyakpɛ níhi, nɛ e bu Yehowa tue ngɛ si fɔfɔɛ fɛɛ ko mi.
Mi Nylɔmi
-
Benɛ Yesu ngɛ zugba a nɔ ɔ, mɛni ní tsumi titli nɛ e tsu?
-
Mɛni nɛ nyakpɛ níhi nɛ Yesu pee ɔ ha nɛ wa na?
-
Mɛni ji ní komɛ nɛ Yesu tsɔɔ nɛ ma nyɛ maa ye bua wɔ ngɛ si himi mi?
NÍ KPAHI NƐ MAA YE BUA MO
Mɛni nɛ Yesu pɔɔ he munyu tumi wawɛɛ?
“Nɔ́ He Je Nɛ Mawu Matsɛ Yemi ɔ He Hia Yesu” (Hwɔɔmi Mɔ ɔ mi munyu)
Moo kane nɔ́ he je nɛ wa ma nyɛ ma ná nɔ mi mami kaa Yesu pee nyakpɛ níhi niinɛ ɔ.
“Nɔ́ Nɛ O Ma Nyɛ Maa Kase Ngɛ Nyakpɛ Níhi Nɛ Yesu Pee Ɔmɛ A Mi” (Hwɔɔmi Mɔ, July 15, 2004)
Moo kane bɔ nɛ Yesu he nɛ e kɛ sãa afɔle kɛ yeɔ bua ni kpahi ɔ ta nyumu ko tsui he ha.
Moo kane ní titli komɛ nɛ Yesu pee ngɛ e fiɛɛmi ní tsumi ɔ mi nɛ a to nya setsɔsetsɔ he sane.
a Wa maa kase Mawu Matsɛ Yemi ɔ he ní fuu ngɛ Ní Kasemi 31-33 ɔ mi.
Eko ɔ, O Bua Maa Jɔ Enɛ ɔ Hu He
SANEHI NƐ NIHI PƆƆ BIMI
Mɛni Blɔ Nya Yehowa Odasefohi To Nɛ́ Nihi Kɛ Kaseɔ Baiblo ɔ?
Yehowa Odasefohi kɛ nihi kaseɔ Baiblo ɔ nɛ a he we nɔ́ ko. Ke a kɛ mo ngɛ Baiblo ɔ kasee ɔ, o ma nyɛ maa ngɔ Baiblo sisi tsɔɔmi fɛɛ ko kɛ tsu ní. O ma nyɛ maa fɔ o weku ɔ, aloo o huɛmɛ nine nɛ a ba piɛɛ o he kɛ kase ní ɔ.
