OZUMALƐDƖYƐ 16
Mɩnla Yɛ Gyisɛsɩ Ɩɣa Ɩyɛlɩ Wɔ Azɩlɛ yɩ zʋ a?
Mmenii sʋ̃maa nwʋ Gyisɛsɩ kɛɛ abɔdɔma be mɔɔ ɩáhʋla ɩyɛ hwɩɩ, enii baaba be, anzɛnyɩɩ benyia be mɔɔ ɩɣa iwuli kɛkɛ. Naasʋ̃ sa yɛkʋla yesuma nninyeni sʋ̃maa yɛfalɩ yɩ nwʋ wɔ kezimɔ ɩwɔlɩ yɩ ɛbɩla wɔ azɩlɛ yɩ zʋ nɩ nu. Wɔ ozumalɛdɩyɛ eyi nu nɩ, yekehila nninyeni mɔɔ nwʋmɔ ihyinyia paa mɔɔ Gyisɛsɩ ɩyɛlɩ nɩ be nɩɩ kezimɔ ɩkɔwʋwa wʋ.
1. Mɩnla egyima titili yɛ Gyisɛsɩ ɩyɛlɩ a?
Nɩ Gyisɛsɩ yɩ egyima titili yɛ lɛ kɛɛ ‘ɩkɛhã Nyamɩnlɩ yi Bulombunlililɛ nɩ nwʋ Odwokɔba.’ (Kɩnga Luuku 4:43.) Ɩhanlɩ odwokɔba mɔɔ mɛyɩ yɛ lɛ kɛɛ, Nyamɩnlɩ ɩkɛva Bulombunlililɛ anzɛnyɩɩ aɣanɩ be ɩkɛɣa mɔɔ ɩkɛyɩ adasamaa bɛ atɩɩtɩɩ munwatĩĩ wɔ ɛkɛnɩ. a Gyisɛsɩ iminyianlɩ yɩ nwʋ ɩvalɩ alʋbɔ asã nɩɩ ɔfʋã ɩhanlɩ odwokɔba eyi.—Matiyu 9:35.
2. Mɩnla ti mɔɔ Gyisɛsɩ ɩyɛlɩ nnwʋánlɩ nninyeni a?
Bayɩbʋlʋ ɩkã kɛɛ ‘Nyamɩnlɩ iluwalɩ Gyisɛsɩ zʋ ɩyɛlɩ egyima nɣezile nɣezile, ɩyɛlɩ nnwʋánlɩ nninyeni nɩɩ sɛnkyɩlɛdɩ.’ (Egyima 2:22) Gyisɛsɩ iluwalɩ Nyamɩnlɩ yi tumi zʋ ɩmanlɩ ahũmi yɛlɩ dinyii, ɩmanlɩ mmenii abʋmɩ sʋ̃maa alɩyɛ, ɩzalɩ mmenii adimakɛlɛ, na idunwonli mmenii po mɔɔ bowu nɩ. (Matiyu 8:23-27; 14:15-21; Maakɩ 6:56; Luuku 7:11-17) Nnwʋánlɩ nninyeni mɔɔ Gyisɛsɩ ɩyɛlɩ nɩ ɩmanlɩ ɩlalɩ ali kɛɛ Nyamɩnlɩ yɛ ɩzʋ̃manlɩ yɩ a. Akʋ̃ sʋ̃ ɩma yɛnwʋ kɛɛ Gyehova ɩwɔ tumi mɔɔ ɩkɛva ɩkɛyɩ yɛ amanɩyɛnwʋlɛ munwatĩĩ wɔ ɛkɛnɩ.
3. Mɩnla yɛ yɛkɔhʋla yekozuma wɔ kezimɔ Gyisɛsɩ ɩwɔlɩ yɩ ɛbɩla nɩ nu a?
Gyisɛsɩ idiyeli Gyehova wɔ bʋwabɩlɛ bela nu. (Kɩnga Dwɔɔnʋ 8:29.) Ɩávalɩ nwʋmɔ odwodwudiyialɛ mɔɔ iyiyialɩ nɩ, Gyisɛsɩ ɩzʋ̃ nɔhʋanlɛlilɛ nu idiyeli yɩ Zɩ kɔbʋmɩ kɛɛ iwuli. Ɩmanlɩ ɩlalɩ ali kɛɛ adasamaa yɛkɔhʋla yɛkɔzʋ̃mɩ Nyamɩnlɩ wɔ bʋwabɩlɛ mɔɔ ɩyɛ sɩ po nu. Meti Gyisɛsɩ ‘ɩyɛlɩ ndianwʋ ɩmanlɩ yɛ ama yɛava yɩ agyia.’—1 Pita 2:21.
SUMÁ SƲ̃MAA
Kila kezimɔ Gyisɛsɩ ɩhanlɩ odwokɔba yɩ na ɩyɛlɩ nnwʋánlɩ nninyeni.
4. Gyisɛsɩ ɩhanlɩ odwokɔba yɩ ihileli mmenii
Gyisɛsɩ idualɩ ndudulubo ɔhʋanɩ tɩndɩnlɩ ɩhɔ ɩhanlɩ odwokɔba yɩ ihileli mmenii sʋ̃maa. Kɩnga Luuku 8:1, na akʋ̃ bozunzú ndwokɔɣizialɛ eyimmɔ nwʋ:
-
Asʋ̃ mmenii mɔɔ beyiyialɩ numɔ kɛɛ bekediye Gyisɛsɩ nɩ nkʋ̃ la yɛ ɩhanlɩ odwokɔba yɩ ihileli bɛ a?
-
Mɩnla mmɔdɩnɩ yɛ Gyisɛsɩ ɩwɔlɩ ɩva ɩbɩbɛlɩ mmenii a?
Nyamɩnlɩ ɩhanlɩ idianlɩ ɛkɛnɩ kɛɛ Mɛzaya nɩ ɩkɛhã odwokɔba. Kɩnga Ayɩzaya 61:1, 2, na akʋ̃ bozunzú ndwokɔɣizialɛ eyimmɔ nwʋ:
-
Mɩnla ɔhʋanɩ zʋ yɛ nkɔmɩhyɛ eyi ɩɣalɩ numɔ wɔ Gyisɛsɩ zʋ a?
-
Asʋ̃ osunzu kɛɛ ihyinyia kɛɛ mmenii mɔɔ bɔwɔ ɛkɛnɩ nnɛ nɩ bɛtɩ odwokɔba eyi a?
5. Gyisɛsɩ ɩvalɩ fʋlɔdulɛ mɔɔ mfasʋ wɔ ɔzʋlɔ ɩmanlɩ
Nyamɩnlɩ Bulombunlililɛ nwʋ odwokɔ mɔɔ Gyisɛsɩ ɩhanlɩ nɩ ɩla ahanlɩ a, ɩvalɩ fʋlɔdulɛ mɔɔ yɛkɔhʋla yɛkɛva yɛkɔwɔ yɛ ɛbɩla ɩmanlɩ. Kila nwʋmɔ ndianwʋ ɛgyɩkɩ̃ɩ̃ be wɔ yi file zʋ ehilehilelɛ mɔɔ ile dima nɩ nu. Kɩnga Matiyu 6:14, 34 nɩɩ 7:12, na akʋ̃ bozunzú ndwokɔɣizialɛ eyimmɔ nwʋ:
-
Mɩnla ɛbɩlawɔlɛ nu fʋlɔdulɛ yɛ Gyisɛsɩ ɩvalɩ ɩmanlɩ wɔ nkyɩkyɛmi eyimmɔ nu a?
-
Ekila a, sɛ yɛfa fʋlɔdulɛ eyimmɔ yɛyɛ egyima wɔ nnɛ a ɩkɔwʋwa yɛ a?
6. Gyisɛsɩ ɩyɛlɩ nnwʋánlɩ nninyeni
Gyehova ɩmanlɩ Gyisɛsɩ tumi ma ɩyɛlɩ nnwʋánlɩ nninyeni sʋ̃maa. Sɛ ɛpɛ kɛɛ ɔnwʋ nwʋmɔ ndianwʋ ɔkʋ̃ a, kɩnga Maakɩ 5:25-34 anzɛnyɩɩ yɩ́ VIDIYO nɩ. Akʋ̃ bozunzú ndwokɔɣizialɛ mɔɔ ilili ɔzʋlɔ nɩ nwʋ.
-
Wɔ vidiyo yi nu nɩ, mɩnla anwʋlazʋ yɛ nɩ baalɛ mɔɔ yɩ nwʋ ɩba yɩ nɩ ɩwɔ a?
-
Mɩnla yɛ wʋ anyɩ ideli nwʋmɔ wɔ nnwʋánlɩ dɩyɛ eyi nwʋ a?
Kɩnga Dwɔɔnʋ 5:36, na akʋ̃ bozunzú odwokɔɣizialɛ eyi nwʋ:
-
Nnwʋánlɩ nninyeni mɔɔ Gyisɛsɩ ɩyɛlɩ nɩ “idi dasɩlɛ” kɛɛ mɛyɩ yɛ lɛ aninyia?
Ezi a?
Ndwokɔ mɔɔ yezi yɛfalɩ Gyisɛsɩ nwʋ nɩ, numɔ sʋ̃maa ɩzʋ̃ Bayɩbʋlʋ awuuku anla mɔɔ mɛyɩ yɛ lɛ Matiyu, Maakɩ, Luuku, nɩɩ Dwɔɔnʋ nu. Ɛhɛlɛlɛvʋlɔ bela ɩhɛlɛlɩ dɩyɛ sʋnʋnkʋ̃ be ɩvalɩ Gyisɛsɩ nwʋ. Sɛ yɛkɩnga awuuku anla yɩ munwatĩĩ a, ɩbʋwa ma yɛtɩ kezimɔ Gyisɛsɩ ɩwɔlɩ yɩ ɛbɩla nɩ tʋ bʋwɔ.
-
MATIYU
yɛ ilili bɔmʋnlɩ ɩhɛlɛlɩ yɩ dɩyɛ nɩ a. Ɩtwɩ̃ adwɩnɩ isiye Gyisɛsɩ yɩ ehilehilelɛ zʋ, titili mɔɔ Gyisɛsɩ ihilehileli ɩvalɩ Nyamɩnlɩ Bulombunlililɛ nwʋ nɩ.
-
MAAKƖ
yɛ yɩ ndwokɔ dɩyɛ nɩ ɩázʋnɩ kʋlaa wɔ awuuku anla yi nu a. Ɩkã nninyeni mɔɔ ɩyɛ anyɩnlɩlelɛ mɔɔ izizili nɩ nwʋ odwokɔ.
-
LUUKU
ɩkã kezimɔ nɩ mpayɩwɔlɛ nwʋ ihyinyia Gyisɛsɩ nɩɩ kezimɔ ɩ nɩɩ mmalɛ lili nwʋ odwokɔ.
-
DWƆƆNƲ
ɩkã nkɔmɔwɔlɛ mɔɔ Gyisɛsɩ nɩɩ yɩ ɔhɔnwʋmmɔ paa nɩɩ mmenii mvʋlɔ bɔwɔlɩ nɩ nwʋ odwokɔ, na ɩma yɛnwʋ Gyisɛsɩ yɩ subanɩ.
ABIYEMMƆ BƐKÃ KƐƐ: “Gyisɛsɩ yɛ lɛ Dɩyɛ Munwala Zʋ Tumivʋlɔ Nyamɩnlɩ yɩ.”
-
Kɛ ɔdwɩnɩ nwʋmɔ ese a?
YƖ DƆKƆWƆLƐ
Gyisɛsɩ ɩhanlɩ Nyamɩnlɩ Bulombunlililɛ nwʋ odwokɔ, ɩyɛlɩ nnwʋánlɩ nninyeni, na idiyeli Gyehova wɔ bʋwabɩlɛ bela nu.
Kɛ Okowuwa Ekeze a?
-
Mɩnla egyima titili yɛ Gyisɛsɩ ɩyɛlɩ wɔ azɩlɛ yɩ zʋ a?
-
Nnwʋánlɩ nninyeni mɔɔ Gyisɛsɩ ɩyɛlɩ nɩ, mɩnla yɛ ɩma yɛnwʋ yɩ a?
-
Ɛbɩlawɔlɛ nu fʋlɔdulɛ ɛhɩnla dɩyɛ yɛ Gyisɛsɩ ɩvalɩ ɩmanlɩ a?
PƖBƐ́ SƲ̃MAA
Mɩnla yɛ nɩ Gyisɛsɩ ɩta ɩkã nwʋmɔ odwokɔ a?
“Nyamɩnlɩ Bulombunlililɛ —Sianti Mɔɔ Nɩ Nwʋmɔ Ihyinyia Gyisɛsɩ” (Ɔwɩɛnɩlɛ Aɣanɩ, October 1, 2014)
Kila sianti mɔɔ yɛkɔhʋla yekele yekeli kɛɛ nnwʋánlɩ nninyeni mɔɔ Gyisɛsɩ ɩyɛlɩ nɩ izili ankasa.
Kezimɔ Gyisɛsɩ ɩ nɩɩ mmenii lili nɩ inyianlɩ benyia be zʋ tumi.
“Nɩ Mʋdwɩnɩ Mɩzamɩ Nkʋ̃tɩnyɩɩ Mʋ Nwʋ” (Ɔwɩɛnɩlɛ Aɣanɩ, October 1, 2014)
Kila nninyeni aditili mɔɔ izizili wɔ Gyisɛsɩ yɩ ɔzʋ̃mɩnlɛ egyima yi nu mɔɔ bɛhyɩhyɛ yɩ pɛpɛɛpɛ nɩ.
a Ozumalɛdɩyɛ 31-33 ikehilehile Nyamɩnlɩ Bulombunlililɛ yi nu ɩkɔhɔ aɣinzi.
