16 УРОК
Иисус јерде болордо нени эткен?
Иисус Христос керегинде айтса, кӧп саба улустыҥ санаазында ол јаҥы чыккан кичинек бала эмезе ойгор судурчы, эмезе шыралап божоп јаткан кижи јуралат. Је Иисустыҥ јердеги јӱрӱмин шиҥдеп кӧрзӧ, ол керегинде база нени билип аларга јараар? Бу уроктоҥ Иисус јерге кандый јаан учурлу иш эдерге келгенин ле мынаҥ слерге кандый туза болорын билип алараар.
1. Иисус кандый ишти баштапкы јерге тургускан?
Бу суракка Иисус мындый каруу берген: «Кудайдыҥ Каандыгы керегинде сӱӱнчилӱ јарды мен... јарлаар учурлу». (Лука 4:43 кычырыгар.) Бу сӱӱнчилӱ јар Кудайдыҥ Каандыгы эмезе башкарузы керегинде болгон. Кудайдыҥ Каандыгы улустыҥ уур-кӱчтериниҥ аайына чыгар a. Иисус бу ишти бӱдӱрерге, ӱч јарым јылдыҥ туркунына бойыныҥ кӱчин де, ӧйин де кысканбаган (Матфей 9:35).
2. Иисус кайкалдарды нениҥ учун эткен?
Агару Бичикте Кудай Иисус ажыра кӧп кайкамчылу керектер ле кайкалдар эткен деп айдылат (Апостолдордыҥ ижи 2:22). Иисус Кудайдыҥ болужыла јотконды токтоткон, муҥдар тоолу улусты азыраган, оору улусты јаскан ла божоп калган улусты тиргискен (Матфей 8:23—27; 14:15—21; Марк 6:56; Лука 7:11—17). Бу кайкалдардаҥ Иисусты Кудай ийген деп, јарт кӧрӱнип јат. Анайда ок Кудайда бистиҥ ончо кӱчтеристиҥ аайы-бажына чыгатан ийде-кӱч бар деп кӧрӱнет.
3. Иисустыҥ јӱрӱминеҥ бис неге ӱренедис?
Иисус Иеговага кандый ла айалгада сӧсуккур болгон. (Иоанн 8:29 кычырыгар.) Ол Адазыныҥ айтканын кандый да ченелтелер ле истежӱлер болуп турза тӱҥей ле бӱдӱрген. Оныҥ теминеҥ кижи кандый да кӱч айалгаларда Кудайга чындык артар аргалу деп кӧрӱнип јат. Иисус биске «оныҥ изиле чике барзын» деп, тем кӧргӱскен (1 Пётр 2:21).
ТЕРЕҤЖИДЕ КӦРӰГЕР
Иисус сӱӱнчилӱ јарды канайып јарлаганын ла кайкалдарды канайып эткенин билип алыгар.
4. Иисус сӱӱнчилӱ јарды јарлаган
Иисус сӱӱнчилӱ јарды кӧп улус уксын деп, канча километр тоозынду јолдор ӧткӧн. Лука 8:1 кычырып, сурактарды шӱӱжип ийигер:
-
Иисус јӱк ле оны угарга келип турган улуска јарлаган ба?
-
Иисус сӱӱнчилӱ јарды улуска јарлаарга нени эткен?
Мессия улуска сӱӱнчилӱ јар јарлаар деп, Кудай судурлап салган. Исайя 61:1, 2 кычырып, сурактарды шӱӱжип ийигер:
-
Иисуска бу судур канайып бӱткен?
-
Бӱгӱнги кӱнде улуска бу сӱӱнчилӱ јарды куучындаар керек пе, слер канайып сананадаар?
5. Иисус јаан учурлу принциптерге ӱреткен
Иисус јӱк ле Каандык керегинде сӱӱнчилӱ јар јарлаган эмес, је јӱрӱмниҥ кажы ла јанына керектӱ принциптерге ӱреткен. Оныҥ Кырдагы јарында айткан принциптердиҥ кезигин кӧрӱп ийектер. Матфей 6:14, 34 лӧ 7:12 кычырып, сурактарды шӱӱжип ийигер:
-
Иисустыҥ бу сӧстӧринде тузалу кандый јӧптӧр бар?
-
Бу јӧптӧр бистиҥ ӧйдӧ тузалу ба?
6. Иисус кайкалдар эткен
Иегова Иисуска кайкалдар эдер ийде-кӱч берген. Бир учуралды кӧрӱп ийектер. Марк 5:25—34 кычырыгар эмезе ВИДЕО кӧрӱгер. Оноҥ сурактарды шӱӱжип ийигер.
-
Тыҥ ооруп турган ӱй кижи неге алаҥзыбай бӱткен?
-
Бу учуралдаҥ слерге анчада ла не јарады?
Иоанн 5:36 кычырып, суракты шӱӱжип ийигер:
-
Иисустыҥ эткен кайкалдары нени кӧргӱзет?
Слер билереер бе?
Иисус керегинде эҥ ле кӧп Агару Бичиктиҥ тӧрт бичигинде бичилет. Бу бичиктер Сӱӱнчилӱ јар деп адалат. Олорды Матфей, Марк, Лука ла Иоанн бичиген. Кажы ла Сӱӱнчилӱ јарда Иисус керегинде башка-башка јетирӱлер бар. Бу јетирӱлерди бириктирип ийзе, Иисустыҥ јӱрӱми керегинде кӧп јилбилӱ неме билип аларга јараар.
-
МАТФЕЙ
Баштапкы Сӱӱнчилӱ јарды Матфей бичиген. Матфей бу бичикте Иисустыҥ ӱредӱлерин куучындаган, анчада ла Кудайдыҥ Каандыгы керегинде нени ӱреткенин бичиген.
-
МАРК
Марктыҥ сӱӱнчилӱ јары эҥ ле кыска. Бу бичикте башка-башка сӱреен јилбилӱ учуралдар бичилген.
-
ЛУКА
Лука Иисустыҥ мӱргӱӱл керегинде сӧстӧрин ле ол ӱй улуска канайып баштанганы керегинде бичиген.
-
ИОАНН
Иоанныҥ сӱӱнчилӱ јарынаҥ Иисус кандый кижи болгонын билип аладыс. Бу бичикте Иисустыҥ јуук најыларыла, анайда ок ӧскӧ дӧ улусла куучындашканы керегинде бичилген.
КЕЗИК УЛУС АЙДАТ: «Иисус кандый да Мессия эмес, ол тегин ле јакшы кижи болгон».
-
А слер нени сананадаар?
ТӦС ШӰӰЛТЕЗИ
Иисус Кудайдыҥ Каандыгы керегинде куучындаган ла кайкалдар эткен. Ол кандый ла айалгада Иеговага сӧсуккур болгон.
Нени билип алдыгар?
-
Иисус баштапкы јерге нени тургускан?
-
Иисустыҥ эткен кайкалдары нени кӧргӱзет?
-
Иисус јӱрӱмге керектӱ кандый принциптерге ӱреткен?
ШИҤДЕЙТЕН МАТЕРИАЛ
Иисус эҥ ле кӧп не керегинде куучындаган?
Иисустыҥ эткен кайкалдары чын ла болгон деп кӧргӱзип турган керелер кӧрӱгер.
«Иисус Христостыҥ кайкалдары. Олор нени керелейт?» («Каруулчы шибее», 2004 јыл, јаан изӱ ай 15)
Бир эр кижиниҥ јӱрӱми, Иисус улусты акту јӱрегинеҥ сӱӱп турганын билип аларда, канайып солынганын кычырып алыгар.
«Мен јӱк бойымды санангам» («Каруулчы шибее», 2014 јыл, ӱлӱрген ай 1)
Бу таблицада Иисустыҥ јӱрӱми хронология аайынча тургузылган.
«Иисустыҥ јердеги јӱрӱминиҥ учуралдары» («Јаҥы телекей» деп кӧчӱрме, Приложение А7)
a Кудайдыҥ Каандыгы керегинде кӧптӧдӧ 31—33 уроктордо айдылат.
Анайда ок слерге јараар болор
ЈААНТАЙЫН БЕРИЛИП ТУРГАН СУРАКТАР
Иегованыҥ Керечилериниҥ Агару Бичикти ӱренетен курсы канайып ӧдӧт?
Иегованыҥ Керечилеринде Агару Бичик неге ӱредип турганын билип аларга болужатан тузалу курс бар. Ӱредӱниҥ ӧйинде слер бойоордыҥ Агару Бичигерле тузаланар аргалу, анайда ок ӱредӱлерге бойоордыҥ билегерди ле најылараарды айдып алар аргалу.
