INU NKWEEN̄ 16
Keke Ke Jisọs Orọ me Mgbọ Ikupbe me Inyọn̄ Ijọn̄?
Owuwa ene ekimun̄ Jisọs kubọk gwun̄ emanbe ayaya, atalek ogwu nriran mè iyaka ire ogwu okikwukwu. Ire eji mekọt ikween̄ mkpọ ofolek kan̄ ire eji ikpọ ubọk ilukbe ugwem me inyọn̄ ijọn̄ ni? Me inu nkween̄ yi, eji mekween̄ usini me lek inu echi okukup ufiak ichit Jisọs orọbe mè mgbaan̄ ikaan̄be me lek kiji.
1. Keke ore okpan okpan ikwaan̄ kè Jisọs?
Okpan okpan ikwaan̄ kè Jisọs ire ilolook “ata etip ofolek mkpulu eyi Awaji.” (Fuk Luk 4:43.) Ikpa ata etip ibe ke Awaji mosa Ama Ubọọn̄ mè iyaka ire mkpulu kan̄ isa isan̄a otutuuk ufialek ebilene. a Jisọs itetet lek inye ikikpa ata etip yi me acha ita mè okpọkọ.—Matiyu 9:35.
2. Keke orọ Jisọs orọbe inu ukechieen̄?
Baibul ikpa ‘owuwa ikpele ikwaan̄ ukpook, mè inu ukechieen̄ echi Awaji orọbe inan̄a me ubọk kè Jisọs.’ (Ikwaan̄ 2:22) Sa me unye Awaji, Jisọs ikput unye efet, inyi obop obop ene inorie, igwa ebi orukan̄ mè ijomo ebi ekwakwaan̄. (Mat 8:23-27; 14:15-21; Mak 6:56; Luk 7:11-17) Inu ukechieen̄ echi Jisọs orọbe ijeen̄ ibe ke ire Awaji oria ọmọ inu. Ikijeen̄ si ibe ke Jioba ikaan̄ unye isasa isan̄a otutuuk ufialek kiji.
3. Keke ke eji ebekween̄ inan̄a me lek ubọk Jisọs olukbe ugwem?
Jisọs isiki ibot inyi Jioba me irek geelek. (Fuk Jọn 8:29.) Me ekakpọge chieen̄ me lek nrọ-nkeme, Jisọs ikup inye ikirọ nkeek Nte kan̄ mege ikwube. Ugwem kan̄ ikijeen̄ ibe ke ifet ibe ebilene etọbọ ibot enyi Awaji ikerere me irek oyọyọt. Eya orọ, Jisọs isa “akpat ukot kan̄” ijeen̄ eji ubọk ebesa iluk ugwem.—Pita Eyi Adasi 2:21.
KWEEN̄ GBAALEK
Kween̄ ubọk Jisọs osabe ikpa ata etip inyi ebi ene mè irọ ikwaan̄ ukechieen̄.
4. Jisọs ikpa ata etip
Jisọs ije ujọn̄ọ ije me oniin̄ okup mfuun̄ mfuun̄ inyi ọmọ ikọt ikpa ata etip inyi owuwa ene. Fuk Luk 8:1, mè igbaan̄ ikpa idodo chi:
-
Ire ebi ekititiin̄ me ere ge gaalek ikigban̄ ọmọ ke Jisọs olook ata etip inyi ni?
-
Kpasi efuuk ke Jisọs otap isasa iweek ebi ene?
Me Baibul, miben nriran ibe ke ogwu Mesaya mokpa ata etip. Fuk Asaya 61:1, 2, mè igbaan̄ ikpa idodo chi:
-
Kpa ubọk ke Jisọs osa irọ nriran yi iso?
-
Ire okeek ibe ke ebilene miweek ata etip me chereyi ni?
5. Jisọs ijeen̄ atikọ echi onyenye otu ewe
Ikare atikọ ofolek Ama Ubọọn̄ Awaji gaalek ke Jisọs ojeen̄, inyi si nteme ofolek ubọk iluk-ugwem. Kpọ-nu usini me lek nteme chi me Ijejeen̄ Ijeen̄be me inyọn̄ Ogoon̄. Fuk Matiyu 6:14, 34 mè 7:12, mè igbaan̄ ikpa idodo chi:
-
Kpasi ata nteme ke Jisọs onyi me ere chi eji efukbe?
-
Ire nteme chi mokọt itap ubọk inyi ebi ene me chereyi ni?
6. Jisọs irọ ikwaan̄ ukechieen̄
Jioba inyi Jisọs unye isasa irọ owuwa ikwaan̄ ukechieen̄. Inyi omun̄ ge me lek ikwaan̄ ukechieen̄ chi, fuk Mak 5:25-34 mè iyaka ire fit FIDIO yi. Mè igbaan̄ ikpa idodo chi ogọgọọk.
-
Me emen fidio yi, keke ke ogwu enenwaan̄ okifiak orukan̄ ya ochieek ijaan̄?
-
Keke ke oma ofolek inu ukechieen̄ yi?
Fuk Jọn 5:36, mè igbaan̄ ikpa idodo yi:
-
Keke ke ikwaan̄ ukechieen̄ Jisọs orọbe “okijeen̄” ofolek kan̄?
Ire oriọọn̄ ni?
Owuwa me lek inu echi eji eriọọn̄be ofolek Jisọs inan̄a me ikpa ini me Baibul echi ekigwen Ata Etip orere—Matiyu, Mak, Luk, mè Jọn. Ife chi mige usini esese mkpọ ofolek Jisọs. Ire, ire ogbaan̄ ifuk otutuuk ikpa ini chi, omogobo itet mbet lek ugwem Jisọs olukbe.
-
MATIYU
odasi ige eyi kan̄. Imalek ige mkpọ ofolek ijejeen̄ kè Jisọs, ògak ge, ijejeen̄ kan̄ ofolek Ama Ubọọn̄ Awaji.
-
MAK
oge eyi ogbigbidim ichit. Ikpa owuwa mkpọ okiriki ene ulọk
-
LUK
ikpa ubọk uriaak osabe ikup ufiak ire inyi Jisọs mè ubọk isabe irọ eru me lek ebibaan̄.
-
JỌN
ige owuwa usem Jisọs okaan̄be melek ebi unene kan̄ mè ebi ofifi ife, eyi okijeen̄ eji mbet ene Jisọs orebe.
USINI ENE EKIBE: “Jisọs ire ata ene, ire, ikare ogwu Mesaya.”
-
Keke ore nkeek kwun̄?
ME MGBIDIM
Jisọs ikpa ata etip ofolek Ama Ubọọn̄ Awaji, irọ ikwaan̄ ukechieen̄ mè isiki ibot inyi Jioba me irek geelek.
Idodo
-
Keke ore okpan okpan ikwaan̄ Jisọs orọbe me inyọn̄ ijọn̄ yi?
-
Keke ke ikwaan̄ ukechieen̄ Jisọs orọbe okijeen̄?
-
Kpasi ata nteme ke Jisọs onyi?
WEEK
Keke ke Jisọs omalek itumu mkpọ ofolek?
“God’s Kingdom —What It Means to Jesus” (The Watchtower, October 1, 2014)
Kpọ-nu inu orọrọ eji ebechieek ibe ke ikwaan̄ ukechieen̄ Jisọs ichubọk ibọkọ irek.
“The Miracles of Jesus —What Can You Learn?” (The Watchtower, July 15, 2004)
Fuk ubọk ogwu enerieen̄ ge osabe inwene ugwem kan̄ mgbọ ikween̄be ubọk Jisọs osabe ikikpọchieen̄ me lek ebi ene.
“My Life Was All About Me” (The Watchtower, October 1, 2014)
Kpọ ubọk eneen̄be okpan okpan inu echi Jisọs orọbe mè ike inu cha osabe ibọkọ irek
“Main Events of Jesus’ Earthly Life” (New World Translation of the Holy Scriptures, Appendix A7)
a Inu nkween̄ 31-33 mokpa inu ofolek Ama Ubọọn̄ Awaji igbaalek.
