QUIMELTUN 16

¿Chumpai Jesús Mapu meu?

AMULCÜNUNGEAL

Tati pu che raquiduamün mu Jesús meu, pequefingün quiñe pichiche reque cam quiñe quim huentru nielu Ngünechen meu cüpachi quimün. Ca femngechi caquelu che re raquiduamquei chumngechi ñi langümngen ta Jesús. Tüfachi quimeltun meu, quimafuimi falinque dungu ñi femün Jesús Mapu meu ca quimtucuafuimi chumngechi quelluafeimu tañi femün.

1. ¿Chem eluhui ñi femal Jesús Mapu meu?

Jesús com tañi nehuen meu eluhui “ñi amuldungual tati cümeque dungu Chau Dios ñi ngünenietual ta mapu” (papeltuaimi Lucas 4:43). Jesús quimelelfi tati pu che Chau Dios ñi elcünual quiñe Gobierno ñi apümcayafiel tati huesaque dungu Mapu meu. a Doi cüla tripantu meu, Jesús com tañi nehuen meu eluhui ñi quimelelafiel tati pu che tüfachi cümeque dungu (Mateo 9:35).

2. Jesús femlu afmatufalchi dungu, ¿chem pengeli?

Biblia feipi: “Jesús ti Nazaret che meu, Chau Ngünechen femi fütraque afmatun dungu tamün adquiñ meu” (Hechos 2:22). Jesús, Chau Ngünechen tañi nehuen meu, afmatufalchi dungu femi, catrütufi quiñe cürüftucu mahun, pichin iyael meu ilelfi ta fentren che, tremoltufi pu cutrancülelu ca huiñomongeltufi pu layelu cütu (Mateo 8:23-27; 14:15-21; Marcos 6:56; Lucas 7:11-17). Com tañi femel Jesús pengeli Chau Ngünechen tañi huercüeteu. Ca femngechi tañi femün meu pengeli Jehová ñi nien nehuen ñi apümcayafiel tati huesaque dungu ñi mülen fantepu meu.

3. ¿Chem quimeleiñmu Jesús tañi femün?

Caiñetungelu rume, Jesús com tañi mongen meu inanierpui com tañi feipieteu Jehová (papeltuaimi Juan 8:29). Femngechi pengelelfi tati pu che inanierpuafui Jehová tañi feipin, rupale rume huesaque dungu meu. Felei llemai, com iñchiñ inayentuafuiñ Jesús tañi femün (1 Pedro 2:21).

DOI QUIMAIMI

Inaduamaiñ chumi Jesús ñi quimelelafiel tati pu che tati cümeque dungu cüpalu Ngünechen meu ca quimürpuaiñ fillque afmatufal dungu ñi femün.

4. Jesús quimeltui tati cümeque dungu

Jesús namuntu fütra camapu puhui, re namuntuyahui ñi amuldungulelafiel tati pu che. Papeltuaiñ Lucas 8:1, ca ngüneduamaiñ tüfachi epu ramtun:

Jesús, ¿amuldungulelfi feichi che fülconlu quisu meu müten?
¿Chem femi Jesús tañi puhual doi fentren che meu?

Chau Ngünechen cuifi meu feipicünui tati Mesías ñi quimeltual cümeque dungu. Papeltuaiñ Isaías 61:1, 2, ca ngüneduamaiñ tüfachi epu ramtun:

Ñi feipin Isaías, ¿femtripapei mai Jesús tañi mongen meu? ¿Chem piafuimi cai?
Famülque meu tati pu che, ¿ca duamniepei mai ñi allcütual tüfachi cümeque dungu? ¿Chem pimi cai?

5. Jesús quimeltui falinque dungu

Jesús quimeltulelfi tati pu che tati cümeque dungu cüpalu Ngünechen meu. Huelu cafei falinque dungu quimeltulelfi tati pu che ñi inayal tañi mongen meu. Ngüneduamaiñ falinque dungu ñi quimeltuel Jesús quiñe huincul meu. Papeltuaiñ Mateo 6:14, 34 ca 7:12, fei ngüneduamaiñ tüfachi epu ramtun:

¿Chem cümeque ngülam huli Jesús tüfachi fillque troquiñ Biblia meu?
Ñi feipin Jesús, ¿quellupeafeyu mai tati pu che famülque meu?

6. Jesús femi afmatun dungu

Jesús llohui Ngünechen tañi nehuen femngechi tañi femal afmatufalchi dungu. Taiñ peal quiñe afmatufal dungu ñi femün Jesús papeltuaiñ Marcos 5:25-34 cam peaiñ ti VIDEO, fei ngüneduamaiñ tüfachi epu ramtun.

VIDEO: Quiñe cutran domo tremolngei (5:10)

Tati domo cutrancülelu, ¿chem dungu rüf quimniefui?
Tüfachi afmatufal dungu meu, ¿chem dungu doi afmatuleimu?

Papeltuaiñ Juan 5:36, ca ngüneduamaiñ tüfachi ramtun:

Jesús ñi afmatufalchi dungu meu, ¿chem dungu quimfalcünui?

¡Tüfei!

Epe com taiñ quimürpuel Jesús tañi mongen meu huirintucungei meli lifru Biblia meu. Tüfa ta Mateo, Marcos, Lucas ca Juan. Caque lifru meu fillque dungu feipingei Jesús meu. Feimu papeltufiliyiñ tüfachi meli lifru, doi quimürpuafuiñ Jesús tañi rupan ñi mongen meu.

MATEO

huirintucui tati hunen lifru ñi nütramcael Jesús meu. Tüfachi lifru meu feipingei chem ñi quimeltuel Jesús, doyelchi mai tañi feipin Chau Dios tañi Gobierno meu.
MARCOS

huirintucui ti doi pichin lifru nütramcalu Jesús tañi mongen meu. Huelu feipilei fentren afmatufalchi dungu ñi femün ta Jesús.
LUCAS

pengeleiñmu Jesús rume falintufi llellipuafiel ta Jehová, ca pengeli Jesús ñi cümelcafiel tati pu domo.
JUAN

pengeleiñmu fillque dungu Jesús ñi nütramcalelfiel tañi doi cümeque hueni ca caquelu pu che. Feimu tüfachi lifru quelluqueiñmu taiñ doi cüme quimafiel Jesús tañi chumngechi chengen.