DUNGU 16
¿Chumpai Jesús Mapu mu?
Pu che raquiduamquelu Jesús mu, pequebingün quiñe püchüche reque cam quiñe quim huentru nielu Chau Ngünechen mu cüpachi quimün. Ca bemngechi, caquelu che re raquiduamqui chumngechi ñi langümngen Jesús. Tübamu, quimabüimi balinque dungu ñi bemün Jesús Mapu mu ca quimtucuabüimi chumngechi quelluabeimu (incaabeimu) tañi bemün.
1. Jesús mülepalu Mapu mu, ¿chem doyümi tañi bemal?
Jesús cüpai “tañi amuldungual tati cümeque dungu Chau Dio ñi ngünenetol mapu” (papiltunge Lucas 4:43). Jesús quimelelbi tati pu che Chau Dio ñi elcünol quiñe Ngünenel ñi apümcaabel tati hueyaque dungu Mapu mu. a Doi cüla tripantu mu, Jesús com tañi nehuen mu quimelelbi tati pu che tübachi cümeque dungu (Mateo 9:35).
2. Jesús bemlu amatubalchi dungu, ¿chem pengeli?
Biblia eipi Jesús mu, Chau Ngünechen bemi bütraque amatun dungu pu che tañi adquiñ mu (Hechos 2:22). Jesús, Chau Ngünechen tañi nehuen mu, amatubalchi dungu bemi, catrütubi quiñe cürübtucu mau, püchün iyael mu elubi bentren che tañi ial, mongelbi pu cutrancülelu ca huiñomongeltubi pu layelu (Mateo 8:23-27; 14:15-21; Marcos 6:56; Lucas 7:11-17). Com tañi bemün mu Jesús pengeli Chau Ngünechen tañi huercüetu. Ca bemngechi tañi bemün mu pengeli Jehová ñi nien nehuen ñi apümcaabel tati hueyaque dungu ñi mülen bantepu mu.
3. ¿Chem quimeleleiñmu Jesús tañi bemün?
Caiñeltungelu ume, Jesús com tañi mongen mu inanepoi com tañi eipietu Jehová (papiltunge Juan 8:29). Bemngechi pengeli upale ume hueyaque dungu mu, pu che ca bemngechi inanepoabüi Jehová tañi eipin. Beli llemai, com iñchiñ inaabüiñ Jesús tañi bemün (1 Pedro 2:21).
DOI CÜME QUIMNGE
Peaiñ chumi Jesús ñi quimelelabel pu che tati cümeque dungu cüpalu Chau Ngünechen mu ca quimpoaiñ billque amatubalchi dungu ñi bemün.
4. Jesús quimeli tati cümeque dungu
Jesús namuntu bütra camapu pohui, re namuntuyahui ñi amuldungulelabel pu che. Papiltoiñ Lucas 8:1. Papiltungele hula ngütramcaabiiñ tübachi epu ramtun:
-
Jesús, ¿amuldungulelbi beichi che bülconlu quidu mu müten?
-
¿Chumi Jesús tañi pohual doi bentren che mu?
Chau Ngünechen cuibi mu eipicünoi tati Mesías ñi quimelal cümeque dungu. Papiltoiñ Isaías 61:1, 2. Papiltungele hula ngütramcaabiiñ tübachi epu ramtun:
-
Ñi eipin Isaías, ¿bemtripapi mai Jesús tañi mongen mu? ¿Chem piabüimi?
-
Bamülque mu pu che, ¿ca duamnepi mai ñi allcütol tübachi cümeque dungu? ¿Chem pimi?
5. Jesús quimeli balinque dungu
Jesús quimelelbi pu che tati cümeque dungu cüpalu Chau Ngünechen mu. Huelu cabei balinque dungu quimelelbi pu che ñi inaal tañi mongen mu. Quimaiñ balinque quimelün Jesús ñi hulün quiñe huincul mu. Papiltoiñ Mateo 6:14, 34 ca 7:12. Papiltungele hula ngütramcaabiiñ tübachi epu ramtun:
-
¿Chem cümeque ngülam huli Jesús tübachi billque huirin tripalu Biblia mu?
-
Ñi eipin Jesús, ¿quellupeabüi mai pu che bamülque mu?
6. Jesús bemi amatubalchi dungu
Jesús llohui Chau Ngünechen tañi nehuen bemngechi tañi bemal amatubalchi dungu. Taiñ peal quiñe amatubal dungu ñi bemün Jesús papiltoiñ Marcos 5:25-34 cam quintulbe tati VIDEO. Bemngele hula ngütramcaabiiñ tübachi epu ramtun:
-
Tati domüche cutrancülelu, ¿chem dungu rüb quimnebüi?
-
Tübachi amatubalchi dungu mu, ¿chem dungu doi amatuleimu?
Papiltoiñ Juan 5:36. Papiltungele hula ngütramcaabiiñ tübachi ramtun:
-
¿Chem pengeli Jesús tañi amatubalchi bemün?
¿Quimquebüimi?
Epe com taiñ quimpol Jesús tañi mongen mu huirintucungi meli libru Biblia mu: Mateo, Marcos, Lucas ca Juan. Tübachi meli libru mu billque dungu eipingi Jesús mu. Beimu papiltubiliiñ tübachi pu libru, doi quimpoabüiñ Jesús tañi upan ñi mongen mu.
-
MATEO
huirintucui tati hunen libru ngütramcalu Jesús mu. Tübachi libru mu eipingi Jesús tañi quimelün, doi mai tañi eipin Chau Dio tañi Ngünenel mu.
-
MARCOS
huirintucui tati doi püchün libru ngütramcalu Jesús tañi mongen mu. Huelu eipili bentren amatubalchi dungu ñi bemün Jesús.
-
LUCAS
pengeleiñmu Jesús müna balintubi ngillatobel Jehová, cabei tañi cümelcabel tati pu domüche.
-
JUAN
pengeleiñmu billque dungu Jesús ñi ngütramcabel tañi doi cümeque hueni ca caquelu pu che. Beimu tübachi libru quelluqueiñmu taiñ doi cüme quimabel Jesús tañi chumngechi chengen.
QUIÑEQUE CHE EIPIQUI: “Jesús quiñe cüme huentrungebüi müten, huelu Mesías ngelabüi”.
-
Eimi, ¿chem pimi?
CHEM PEIÑ TÜBAMU
Jesús quimelelbi pu che Chau Ngünechen ñi ngüneneabel Mapu. Cabei bemi amatubalchi dungu ca inanebi com tañi eipietu tañi Chau Jehová.
Chem quimeleleiñmu tüba
-
Jesús mülepalu Mapu mu, ¿chem doyümi tañi bemal?
-
Jesús ñi amatubalchi dungu mu, ¿chem dungu pengeli?
-
¿Chem balinque ngülam huli Jesús?
DOI QUIMABÜIMI
¿Chem dungu mu Jesús doi ngütramcai?
“Jesús, ¿chemu bente balintuquebi Chau Dio tañi Ngünenel?” (Ti Huerquen 1 octubre 2014)
¿Chemu maneluhuabüiñ Jesús tañi bemün amatubalchi dungu?
“Jesús ñi amatubalchi bemün, ¿chem quimeleleimu?” (Ti Huerquen 15 julio 2004)
Quiñe huentru müna cümelcaeyu quimlu Jesús tañi duamtuchequen. Pebinge tañi upan.
“Tañi mongen mu, iñche doi cüme checauquebün” (Ti Huerquen 1 octubre 2014)
Quimnge chumngechi amulepoi Jesús tañi bemün Mapu mu.
“La vida de Jesús en la tierra” (La Biblia. Traducción del Nuevo Mundo, Apéndice A7)
a Dungu 31 poulu 33 doi quimpoaimi chem dungu upaai Chau Ngünechen ngünenetule Mapu.
Peabüimi ka bemngechi dungu:
BILLKE RAMTUN
¿Chumngechi quimelquiiñ Biblia?
Quimeltungelmi quiñe Dunguquelu, papiltuabüimi chem traducción Biblia mu niimi ume. Mangelabüimi com tami pu che, tami pu hueni, ca iñi ume ayüabüimi.
