16 YATICHÄWI
¿Kunanaksa Jesusajj aka oraqenkkasajj luräna?
Jaqenakajja Jesusajj aleq wawakïkaspasa, wali yatiñan profetakïkaspasa, jan ukajj niya jiwirjam mä jaqekïkaspas ukhamwa amuyapjje. Ukampis Jesusajj aka oraqenkkäna ukhajj kunanaksa luräna uk jukʼamp yatjjatañajja, jupar jukʼamp sum uñtʼañatakiw yanaptʼistu. Aka yatichäwinjja, Jesusajj kunanaksa luräna ukanak mä qhawqha yatjjatañäni, kunjamsa ukanakajj yanaptʼistaspa ukanaksa yatjjatarakiñäniwa.
1. ¿Kun lurañas Jesusatakejj nayrankäna?
Jesusatakejja jaqenakar “Diosan Reinopat suma yatiyäwinak” yatiyañaw nayrankäna (Lucas 4:43 liytʼäta). Aka oraqen utjki uka jan walinakjja, Diosajj mä Reino toqewa jan ukajj mä gobierno toqew askichani sasaw yatiyäna. a Uka suma yatiyäwjja Jesusajj kimsa mara chikataniw predicäna (Mateo 9:35).
2. ¿Jesusan milagronakapajj kunsa uñachtʼayistu?
“Diosajj Jesús taypiw milagronaksa, musparkañanaksa” luräna sasaw Bibliajj qhanañchi (Hechos 2:22). Diosan chʼamapampejja Jesusajj mä jachʼa thaya tʼakurayäna, walja waranqa jaqenakaruw manqʼayäna, usutanakarus qollarakïnwa, yaqhepanakarojj jiwatatwa jaktayarakïna (Mateo 8:23-27; 14:15-21; Marcos 6:56; Lucas 7:11-17). Jesusajj lurkäna uka milagronakajja, Diosajj jupar khitanitapwa uñachtʼayäna. Ukatjja Jehová Diosajj jan walinak askichañatakejj wali chʼamanïtapwa uñachtʼayarakïna.
3. ¿Jesusajj kunjamtï jakaskäna ukajj kunsa yatichistu?
Jesusajj taqe kunanwa Jehová Diosarojj istʼäna (Juan 8:29 liytʼäta). Mayninakan jarkʼatpachasa Awkipajj kuntï siskäna uk jiwañkamaw phoqäna. Ukham lurasajja akwa Jesusajj uñachtʼayäna: jaqenakajj jan walinakan uñjaskasas Diosarojj serviskaksnawa. Jesusajj arkirinakaparojj “mä ejemplo” jaytawayi, ‘ukhamat jupanakajj wali amuyumpi kayup’ arkapjjañapataki (1 Pedro 2:21).
JUKʼAMP YATJJATAÑÄNI
Jesusajj kunjamsa jaqenakarojj suma yatiyäwinak yatiyäna, kunjamsa milagronak jupajj luräna ukanakwa jichhajj yatjjatañäni.
4. Jesusajj suma yatiyäwinakwa yatiyäna
Walja jaqenakar suma yatiyäwinak yatiyañatakejja, Jesusajj walja kilometronakwa laqʼa polvo thakinaknam saräna. Lucas 8:1 liytʼasajja aka toqetwa parltʼapjjäta:
-
¿Jupar istʼañatak sarapkäna uka jaqenakarukit Jesusajj suma yatiyäwinak predicäna?
-
¿Jaqenakar jikjjatañatakejj kunanaksa Jesusajj luräna?
Mesiasaw suma yatiyäwinak yatiyani sasaw Diosajj janïräkipan yatiyjjäna. Isaías 61:1, 2 liytʼasajja aka toqetwa parltʼapjjäta:
-
¿Kunjamsa Jesusajj uka profecía phoqäna?
-
Jichhürunakanjja ¿jaqenakan suma yatiyäwinak yatipjjañapajj wakisirakpachati?
5. Jesusajj wakiskir suma yatichäwinakwa yatichäna
Jesusajja janiw Diosan Reinopan suma yatiyäwinakapak yatiykänti, jan ukasti jakäwin yanaptʼkir yatichäwinakwa yaticharakïna. Olivos qollun arskäna ukanakat mä qhawqhanak yatjjatañäni. Mateo 6:14, 34; 7:12 liytʼasajja aka toqetwa parltʼapjjäta:
-
Uka versiculonakanjja, ¿Jesusajj kuna suma ewjjtʼanaksa arsüna?
-
¿Uka ewjjtʼanakajj jichhürunakan yanaptʼarakistaspati?
6. Jesusajj milagronakwa luräna
Jesusan walja milagronak lurañapatakejja, Jehová Diosaw chʼam churäna. Uka milagronakat may yatjjatañatakejj Marcos 5:25-34 liytʼapjjäta, jan ukajj VIDEO uñtapjjäta. Ukatjja aka toqetwa parltʼapjjäta:
-
¿Videon uñtktan uka warmejj kuna toqetsa jan pächaskäna?
-
Uka milagrotjja, ¿kunas jumarojj wal musparaytamjja?
Juan 5:36 liytʼasajja aka toqetwa parltʼapjjäta:
-
¿Jesusajj lurkäna uka milagronakajj kunsa “qhanañchi”, jan ukajj kunsa uñachtʼayi?
¿Yatiyätati?
Jesusajj aka oraqenkkäna ukhajj kunanaksa luräna ukanakat jilapartejja Mateo, Marcos, Lucas, Juan libronakan qellqatawa. Uka libronak qellqerinakajj janiw mä pachpatak parlapkiti. Ukhamatwa uka pusi libronak liytʼasajj Jesusan sarnaqäwip jukʼamp sum amuytanjja.
-
MATEO
Jesusan sarnaqäwipat qellqañ jupaw qalltäna. Libropanjja Jesusan yatichäwinakapaw qellqatajja, jukʼampisa kuntï Jesusajj Diosan Reinopat yatichkäna ukanakaw qellqatajja.
-
MARCOS
Mayninakat sipansa jupajj jukʼakwa qellqawayi. Ukampis libropajj wali musparkañanakatwa parli.
-
LUCAS
Jupajja orasiñajj kunja wakiskirisa, Jesusajj kunjamsa warminakarojj wali respetomp uñjäna uka toqenakatwa jukʼamp qhanañchi.
-
JUAN
Jesusajj kuna toqenakatsa amigonakapampisa yaqha jaqenakampis parläna uka toqenakatwa jupajj qhanañchi. Taqe ukanakaw Jesusajj kunjam jaqënsa uk uñachtʼayi.
YAQHEPANAKAJJ AKHAM SAPJJEWA: “Jesusajj aleq jaqekïnwa” sasa.
-
¿Kunsa jumajj uka toqet amuyta?
¿KUNSA YATEQAWAYTAN?
Jesusajj Diosan Reinopatwa yatiyäna, milagronaksa lurarakïnwa, Jehová Diosarus taqe kunanwa istʼäna.
Amtañataki
-
Jesusajj aka oraqenkkäna ukhajja, ¿kun lurañas jupatakejj nayrankäna?
-
Jesusajj milagronak lurkäna ukajj ¿kunsa uñachtʼayäna?
-
¿Jesusajj kuna wakiskir suma yatichäwinaksa yatichäna?
JUKʼAMP YATJJATAÑAMATAKI
¿Kuna toqetsa Jesusajj yatiyirïna?
“Diosan Reinopajj ¿kunatsa Jesusatakejj wakiskirejja?” (Yatiyañataki octubre 1, 2014)
Jesusajj kuna milagronaktï lurkäna ukanakajj cheqäskapunïnwa sasajj kunatsa sistan uk yatjjatam.
“Los milagros de Jesús: ¿qué puede aprender de ellos?” (La Atalaya, 15 de julio de 2004)
Jesusajj janiw jupa pachpatak llakisirïkänti, kunjamsa uk yatiñajj mä chacharojj vidap cambiañatak yanaptʼäna uk yatjjatam.
“Taqe kunat sipansa naya pachpatakikiw llakisirïta” (Yatiyañataki octubre 1, 2014)
Jesusan vidapan kunas nayraqat pasäna, ukjjarojj kunas pasäna, qhepat kunas pasarakïna uk mä listan uñjjattʼam.
“Jesusan aka oraqen sarnaqatapa” (Biblia Aymara. Machaq Mundon Jakirinakataki, apéndice A7)
a Diosan Reinopajj kunasa ukjja 31-33 yatichäwinakanwa sumpach yatjjataskañäni.
Akanakajj inas gustarakiristam
KUNANAKSA JUKʼAMP JISKTʼASIPJJE
¿Kunjamsa Jehová Diosan Testigonakapajj Bibliat yatichapjje?
Jehová Diosan Testigonakapajj gratisakiw Bibliat yatichapjje, kawknïr Bibliampis yateqañ munta ukajj jumatäjjewa. Jumamp chika yateqapjjañapatakejja, taqpach familiamaruw invittʼasma, amistadanakamarus invittʼarakismawa.
