PES 16
Kii Yésu a bi boñ ngéda a bé hana ’isi?
Ngandak bôt i nyi bé njee Yésu a bé. Inyu bahogi, a bé nkéñéé man, inyu bape a bé mpôdôl nu a gwé pék, tole mut nu a yé bebee ni wo. Ndi ibale di mbéñge lelaa Yésu a bi niñ hana ’isi, baa hala a nla hôla bés i tibil yi nye? Munu pes ini, di ga béñge ngim mam Yésu a bi boñ ni lelaa i nla hôla we.
1. Kii i bé bôlô bisu i Yésu?
Bôlô bisu i Yésu i bé le a ‘añal ñañ nlam u Ane Nyambe.’ (Añ Lukas 4:43.) Ñañ nlam a bé añal u bé le Djob a ga téé ngim ane, i i ga mélés mandutu momasôna bôt ba binam ba mboma. a Mu nwii maa ni pes a bi tégbaha i añal ñañ nlam, Yésu a bi sal ni ngui inyu añle bôt i nwin u hogbe u.—Matéô 9:35.
2. Inyuki Yésu a bé boñ mam ma hélha?
Bibel i ntoñol le ‘ni njel Yésu, Nyambe a bi boñ mimpémba mi mam lôñni mam ma hélha.’ (Minson mi baôma 2:22) Yéhôva a bi ti Yésu ngui, jon a bi la mômôs mbuk mbebi, a jés dikôô di bôt, a mélés makon, a tugul yak bawoga. (Matéô 8:23-27; 14:15-21; Markô 6:56; Lukas 7:11-17) Bihélha bi mam bi gwobisôna bi ñéba le ni toi, Nyambe nyen a bi ep Yésu ni le Yéhôva a gwé ngui i mélés mandutu més momasôna.
3. Kii niñ i Yésu i niiga bés?
Yésu a bi nôgôl Yéhôva ngéda yosôna. (Añ Yôhanes 8:29.) To i bisu bi ngolba, Yésu a bi waa bé boñ sômbôl Isañ, a bé yak bebee i wo inyu sômbôl i. Ndémbél yé i ñéba le bôt ba binam ba nla gwélél Djob to ibale ba mboma mandutu. Yésu a bi yigle “bés ndémbél le [di] odop yaga mu mabal mé.”—1 Pétrô 2:21.
KÔNDE TÉM
Béñge lelaa Yésu a bi añal ñañ nlam ni lelaa a bi boñ mam ma hélha.
4. Yésu a bi añal ñañ nlam
Yésu a bé ke ngandak liké i minloñ mimbe inyu añle bôt ñañ nlam. Añ Lukas 8:1, i mbus ni kwélél mambadga mana:
-
Baa Yésu a bé niiga ndik i bôt ba bé kodba inyu emble nye?
-
Bimbe biliya Yésu a bé boñ inyu yéñ bôt?
Nyambe a bi legel le Mésia a bé lama añal ñañ nlam. Añ Yésaya 61:1, 2, i mbus ni kwélél mambadga mana:
-
Lelaa Yésu a bi yônôs i mbañ ini?
-
Baa u nhoñol le yak i len ini, di gwé ngôñ i emble ñañ nlam?
5. Biniigana bi Yésu bi yé mahee
Yésu a bé añal ndik bé ñañ nlam u Nyambe, ndi a bé ti ki bôt maéba ma ma bé lama hôla bo mu niñ yap i hiki kel. Di béñge ndék dihéga mu Nkwel wé i ngii Hikôa. Añ Matéô 6:14, 34 ni 7:12, i mbus ni kwélél mambadga mana:
-
Munu minlôñ mi Bibel mini, mambe maéba malam Yésu a nti?
-
Baa u nhoñol le i maéba ma, ma ngi yii nseñ i len ini?
6. Yésu a bi boñ mam ma hélha
Yéhôva a bi ti Yésu ngui i boñ mam ma hélha. Di béñge hihéga hiada, añ Markô 5:25-34 tole tuk VIDÉÔ. I mbus ni kwélél mambadga mana.
-
Munu vidéô ini, imbe botñem i muda a bé kon a bééna?
-
Kii i nlémél we mu hélha jam Yésu a mboñ?
Añ Yôhanes 5:36, i mbus ni kwélél mbadga ini:
-
Lelaa mam ma hélha Yésu a bé boñ ma “mbôgôl nye mbôgi” tole ma ñunda njee a yé?
Baa u yik laa?
I ngandak mam di nyi inyu Yésu ma mpémél i bikaat bina ba nsébél le miñañ Minlam, hala wee Matéô, Markô, Lukas, ni Yôhanes. Hiki kaat mu i nyeelene bés ngim mam inyu Yésu le bini bikaat bipe bi ntoñol bé. Ngéda di ñañ i bikaat bina bi gwobisôna, ha nyen di mpam i tibil yi niñ i Yésu.
-
MATÉÔ
i yé kaat bisu mu bikaat bina bi. I nlôôha pôdôl biniigana bi Yésu. Téntén bi bi mbéñge Ane Djob.
-
MARKÔ
i yé kaat i i ñap bé mu bikaat bina bi. I ntoñol ñañ u Yésu i sem kwep i nya i tina ngôñ.
-
LUKAS
i nlôôha pôdôl masoohe ni lelaa Yésu a bé tôñ bôda.
-
YÔHANES
i mpôdôl minkwel Yésu a bééna ni mawanda mé ni bôt bape, hala a nhôla bés i yi umbe ntén mut a bé.
BÔT BAPE BA NKAL LE: “Yésu a bé ndik loñge mut, ndi a bé bé Mésia.”
-
We u nhoñol laa?
I SEM KWEP
Yésu a bi añal ñañ nlam u Ane Djob, a boñ mam ma hélha, a nôgôl ki Yéhôva ngéda yosôna.
Mambadga ma mbigda
-
Umbe nson u tôbôtôbô Yésu a bi gwel ngéda a bé hana ’isi?
-
I mam ma hélha Yésu a bi boñ, ma ñéba le kii?
-
Lelaa i mam Yésu a bi niiga ma nla hôla bés?
KÔNDE YÉÑ
Limbe jam Yésu a bi lôôha pôdôl?
“Le Royaume de Dieu:son importance pour Jésus” (La Tour de Garde, 1er octobre, 2014)
Di béñge inyuki di nla hémle le i mam ma hélha Yésu a bi boñ ma bi bôña toi.
“Les miracles de Jésus:Que vous enseignent-ils?” (La Tour de Garde, 15 juillet, 2004)
Di béñge lelaa libak le Yésu a bi ti niñ yé kiki sesema i bi héñha niñ i mut wada.
“Je ne vivais que pour moi” (La Tour de Garde, 1 octobre, 2014)
Béñge lelaa Yésu a bi gwel nson wé.
“Niñ i Yésu hana ’isi—Bibôdle bi nson u Yésu” (Bitilna Bipubi. Ngobol mbok yondo, apendis A7)
a Bipes 31-33 bi ga pôdôl ngandak mam ipe i i mbéñge Ane Djob.
Yak ini i nla lémél we
MAMBADGA BÔT BA MBÉNA BAT
Lelaa Mbôgi Yéhôva i ntégbaha bôt yigil i Bibel?
Mbôgi Yéhôva i nla hôla we i nigil Bibel ibabé i saa; yigil i ntagbe kiki nkwel ipôla bôt iba, u nla ki gwélél to imbe ngobol i Bibel. U kon bañ woñi i naña lihaa joñ jolisôna tole mawanda moñ.
