PELAJARAN 16

Aha do na Diulahon Jesus Tikki di Tano on?

PANGOLU

Marasing-asing do na dibayakkon godang halak tikki dibege nasida goar ni Jesus. Adong na mambayakkon ibana songon sada poso-poso. Adong muse na mambayakkon ibana songon sahalak nabi na burju, manang sahalak bawa na mate targattung di hau. Alai godang do sebenarna na boi taboto taringot Jesus tikki mangolu ibana di tano on. Di pelajaran on, lao taida ma akka aha do naung diulahon Jesus jala aha do pengaruh ni i tu hita.

1. Aha do tugas utama ni Jesus?

Paboahon “barita na uli taringot tu Harajaon ni Debata” do tugas utama ni Jesus. (Jaha Lukas 4:43.) Dipaboa ibana do na lao pajongjongon ni Debata do sada Harajaon manang pamarettaon na lao mambahen dang adong be sitaonon di tano on. a Saleleng tolu satonga taon, dang marnaloja Jesus paboahon barita na uli on.—Mateus 9:35.

2. Boasa dibahen Jesus tanda halongangan manang mukjizat?

Bibel mandok godang do “tanda halongangan na binahen ni Debata marhite-hite [Jesus]”. (Ulaon ni Apostel 2:22) Dilehon Debata do tu Jesus huaso lao mengendalihon cuaca, mangalehon mangan marribu halak, pamaluppon na marsahit, dohot mambahen mangolu muse halak naung mate. (Mateus 8:23-27; 14:15-21; Markus 6:56; Lukas 7:11-17) Sudena on patuduhon Debata do na manuru Jesus tu tano on. Jala on gabe bukti na boi do Jahowa mambahen dang adong be sitaonon ni jolma haduan.

3. Aha do na boi taparsiajari sian parngoluon ni Jesus?

Toktong do Jesus mangulahon lomo ni roha ni Jahowa manang songon dia pe situasina. (Jaha Johannes 8:29.) Nang pe adong tantangan, tetap do Jesus setia tu Jahowa sahat tu na mate ibana. Dipatudu ibana ma, boi do jolma manomba Debata nang pe adong sitaonon. Bibel mandok ditadikkon Jesus do ‘sitiruon tu hita asa taihutton bogas ni patna’.—1 Petrus 2:21.

ASA LAM TAATTUSI

Taparsiajari ma songon dia Jesus marbarita na uli jala mambahen tanda halongangan manang mukjizat.

4. Marbarita na uli do Jesus

Mardalan pat do Jesus marratus kilometer lao marbarita na uli tu godang halak. Jaha Lukas 8:1, dung i bahas ma sukkun-sukkun on:

Holan tu akka halak na ro manjuppangi ibana do Jesus marbarita?
Menurut ayat i, aha do na diulahon Jesus asa boi ibana manjuppangi akka halak?

Nungnga dipaboa Debata hian na lao marbarita na uli do Messias. Jaha Jesaya 61:1, 2, dung i bahas ma sukkun-sukkun on:

Toho do diulahon Jesus songon na didok ayat on?
Menurut hamu, porlu do akka halak saonari mambege barita na uli?

5. Dipaboa Jesus do ajaran na sittong

Dang holan taringot Harajaon ni Debata na dipaboa Jesus. Alai dipaboa ibana do tong akka nasehat na marguna tu parngoluon ni akka halak ganup ari. Boi do taida contohna sian Jamita di Dolok. Jaha Mateus 6:14, 34 dohot 7:12, dung i bahas ma sukkun-sukkun on:

Nasehat taringot aha do na dipaboa di ayat i?
Menurut hamu, marguna dope akka nasehat i tu hita?

6. Dibahen Jesus do mukjizat

Dilehon Jahowa do huaso tu Jesus lao mambahen godang mukjizat. Contohna, jaha Markus 5:25-34 manang putar ma VIDEO. Dung i bahas ma sukkun-sukkun on:

VIDEO: Dipamalum ma Sahalak Borua na Marsahit (5:10)

Di video i, sian dia do taboto na pos do roha ni borua i tu Jesus?
Boha do perasaanmuna dung ditonton hamu video i?

Jaha Johannes 5:36, dung i bahas ma sukkun-sukkun on:

Aha do na dipatudu Jesus sian akka mukjizat na dibahen ibana?

Diboto hamu do?

Godang do disurat hatorangan taringot Jesus di opat bukku ni Bibel, i ma Mateus, Markus, Lukas, dohot Johannes. Digoari ma opat bukku i Injil. Marragam do hatorangan na dibahen akka panuratna taringot Jesus. Molo tajaha opat bukku i, gabe boi ma lam takkas taboto taringot parngoluon ni Jesus.

MATEUS

Ibana do na manurat Injil na parjolo. Godang do ajaran ni Jesus na disurat ibana, tarlumobi taringot Harajaon ni Debata.
MARKUS

Ibana do na manuratton Injil na unjeppek. Godang do disurat ibana mukjizat na dibahen Jesus.
LUKAS

Disurat ibana do taringot na rikkot situtu do martangiang di Jesus, jala burju do Jesus tu akka borua.
JOHANNES

Disurat ibana do songon dia Jesus tikki makkata-hatai dohot akka donganna. Sian i, boi ma taida songon dia sifat ni Jesus.

ADONG DO NA MANDOK: “Dang sipalua Jesus. Holan sahalak nabi na burju do ibana.”

Boha menurut hamu? Setuju do hamu disi?

KESIMPULAN

Dipaboa Jesus do barita na uli taringot Harajaon ni Debata. Dibahen ibana do godang tanda halongangan, jala diulahon ibana do lomo ni roha ni Jahowa manang songon dia pe situasina.