LIKE SUANLƐ 16
?I nun mɔ Zezi o asiɛ’n su wa’n ngue yɛ ɔ yoli-ɔ?
Kɛ be kan Zezi i ndɛ’n sran kpanngban be bu ba nɔnman kun, annzɛ Ɲanmiɛn nuan ijɔfuɛ kun, annzɛ sran kun m’ɔ su wu’n i akunndan. Sanngɛ sɛ e fa e ɲin e sie i ninnge ng’ɔ yoli be i nun m’ɔ o asiɛ’n su wa’n su’n, é sí i su ndɛ kpanngban kpa ekun. Like suanlɛ nga nun’n, é wá fá e ɲin é síe i ninnge cinnjin wie mɔ Zezi yoli be’n, ɔ nin wafa nga i sɔ’n kwla uka wɔ’n be su.
1. ?Junman cinnjin nga Zezi dili’n yɛle benin?
Junman cinnjin nga Zezi dili’n yɛle ‘Ɲanmiɛn i Sielɛ’n i jasin fɛ’n i bolɛ’n.’ (Kanngan Liki 4:43 nun.) Ɔ seli sran’m be kɛ Ɲanmiɛn wá táka awa kun. Yɛ awa sɔ’n wá yó maan sran’m be su afɛ’n kwlaa wíe. a Ɔ tuli i klun boli jasin fɛ sɔ’n afuɛ nsan nin sin.—Matie 9:35.
2. ?Ngue ti yɛ Zezi yoli abonuan sa mun-ɔn?
Biblu’n se kɛ ‘Ɲanmiɛn sinnin Zezi i lika yoli sa kekleekle nin abonuan sa mun.’ (Sa Nga Be Yoli’n 2:22) Ɲanmiɛn fanngan nun’n Zezi ijɔli aunmuan nin jenvie’n, ɔ mannin sran kpanngban be aliɛ, ɔ yoli tukpacifuɛ’m be juejue, kpɛkun ɔ cɛnnin sran wie mun. (Matie 8:23-27; 14:15-21; Marki 6:56; Liki 7:11-17) Abonuan sa nga Zezi yoli’n be kle weiin kɛ Ɲanmiɛn yɛ ɔ sunmɛnnin i-ɔ. Asa ekun’n, abonuan sa sɔ’m be kle kɛ Zoova le tinmin naan ɔ kwla yo naan e su sa’m be kwlaa be wie.
3. ?Ngue yɛ Zezi i ayeliɛ’n kle e-ɔ?
Zezi i ɲin yili Zoova sa kwlaa nun. (Kanngan Zan 8:29 nun.) Lele nin kɛ Zezi fá wú’n kannzɛ sa kpanngban be tɔli i su’n, sanngɛ ɔ yoli like nga i si Ɲanmiɛn seli i kɛ ɔ yo’n. Zezi i ayeliɛ’n kle kɛ kannzɛ sa’m be tɔ sran kun su sɛ’n, ɔ kwla su Zoova kpa titi. I lɛ nun’n, Zezi kleli e ‘ajalɛ naan e nian like ng’ɔ yoli’n su seiin e nanti.’—1 Piɛli 2:21.
SI NDƐ’N NUN KPA EKUN
Maan e fa e ɲin e sie i jasin fɛ nga Zezi boli’n, ɔ nin abonuan sa ng’ɔ yoli be’n be su.
4. Zezi boli jasin fɛ’n
Zezi boli jasin fɛ’n kleli sran kpanngban. I sɔ yolɛ’n nun’n, ɔ nantili kilo kpanngban. An kanngan Liki 8:1 nun, i sin’n an koko kosan yɛ’m be su yalɛ:
-
?Be nga be yia be tie Zezi i ndɛ’n, be ngunmin yɛ ɔ boli jasin fɛ’n kleli be-ɔ?
-
?Ngue yɛ Zezi miɛnnin i ɲin yoli naan w’a kwla bo jasin fɛ’n w’a kle sran mun-ɔn?
Ɲanmiɛn dun mmua kannin kɛ Mesi’n wá bó jasin fɛ’n. An kanngan Ezai 61:1, 2 nun, i sin’n an koko kosan yɛ’m be su yalɛ:
-
?Wafa sɛ yɛ ndɛ nga kpɛnnin su Zezi i lika-ɔ?
-
?Kɛ a niɛn i sa’n, a bu i kɛ ɔ ti cinnjin kɛ sran’m be tie jasin fɛ’n andɛ?
5. Zezi mannin afɔtuɛ kpakpa wie mun
Nán Ɲanmiɛn Sielɛ’n i jasin fɛ’n ngunmin yɛ Zezi boli-ɔ. Ɔ mannin e afɔtuɛ kpakpa wie mun ekun. I wie yɛle afɔtuɛ nga cɛn kun’n kɛ Zezi kán ndɛ oka’n su lɔ’n ɔ mannin’n. An kanngan Matie 6:14, 34 nin 7:12 nun, i sin’n an koko kosan yɛ’m be su yalɛ:
-
?Afɔtuɛ kpakpa benin yɛ Zezi mannin be ndɛ mma sɔ’m be nun-ɔn?
-
?Kɛ a niɛn i sa’n, afɔtuɛ sɔ’m be kwla yo e wun sa ye andɛ?
6. Zezi yoli abonuan sa wie mun
Zoova fanngan nun’n, Zezi kwla yoli abonuan sa kpanngban. I wie yɛle like ng’ɔ yoli mɔ Marki 5:25-34 kɛn i ndɛ’n. An kanngan nun, annzɛ an bo VIDEO’N. I sin’n an koko kosan yɛ’m be su yalɛ.
-
?Video nun’n, ngue yɛ bla ng’ɔ kpinndinman’n ɔ lafili su-ɔ?
-
?Ngue yɛ Zezi yoli m’ɔ yoli ɔ fɛ-ɔ?
An kanngan Zan 5:36 nun, i sin’n an koko kosan yɛ’n i su yalɛ:
-
?Ngue yɛ abonuan sa nga Zezi yoli be’n be kle e-ɔ?
Nian nga wie
Zezi i su ndɛ nga e si i’n i dan lika fin Matie, nin Marki, nin Liki, ɔ nin Zan fluwa’n nun. Nán Zezi i su ndɛ kunngba’n yɛ be kwlaa be kannin-ɔn. Sanngɛ kɛ e kanngan fluwa nnan sɔ’m be nun’n, e wun ninnge nga Zezi yoli be’n be wlɛ kpa.
-
MATIE
yɛ ɔ dun mmua klɛli Zezi i su ndɛ-ɔ. Ɔ fa e ɲin sie i Ɲanmiɛn Sielɛ’n i su ndɛ nga Zezi kannin’n su.
-
MARKI
fluwa’n yɛ ɔ ti fluwa sɔ’m be nun kaan’n niɔn. Ɔ kan sa wie mɔ be juli mɔ be yo ɲɛnmɛn’n be ndɛ.
-
LIKI
kleli kɛ Ɲanmiɛn srɛlɛ’n yoli Zezi i cinnjin. Yɛ ɔ kannin wafa nga Zezi nin bla’m be fa trannin’n i ndɛ.
-
ZAN
fɛli i ɲin sieli i sran wafa nga Zezi ti’n su. Ɔ kannin yalɛ nga Zezi nin i janvuɛ mun, ɔ nin sran wie mun ekun be kokoli’n i ndɛ.
SRAN WIE’M BE WAAN: “Zezi ti sran kpa sɔ. Sanngɛ nɛ́n i yɛ ɔ ti Mesi’n niɔn.”
-
?A bu ndɛ sɔ’n i sɛ?
NDƐ’N I KPƆLƐ BOLƐ
Zezi boli Ɲanmiɛn Sielɛ’n i su jasin fɛ’n, ɔ yoli abonuan sa mun, yɛ i ɲin yili Zoova sa kwlaa nun.
Ndɛ’n i nun flanlɛ
-
?I nun mɔ Zezi o asiɛ’n su wa’n, junman cinnjin benin yɛ ɔ dili-ɔ?
-
?Ngue yɛ abonuan sa nga Zezi yoli’n be kle e-ɔ?
-
?Afɔtuɛ kpakpa benin yɛ Zezi mannin e-ɔ?
NDƐ WIE MUN EKUN
?Ngue yɛ Zezi kɛnnin i ndɛ dan-ɔn?
“Ɲanmiɛn Sielɛ’n: Like nga ti yɛ i ndɛ yoli Zezi i cinnjin’n” (Sasafuɛ Tranwlɛ’n, afuɛ 2014, Ɔktɔblu 1)
Sa nga ti yɛ e kwla lafi su kɛ Zezi yoli abonuan sa mun sakpa’n.
“?Ngue yɛ abonuan sa nga Zezi yoli be’n be kle e-ɔ?”(Sasafuɛ Tranwlɛ’n nun ndɛ)
Zezi i su ndɛ’n yoli bian kun i ye kpa.
“Laa’n n bu min ngunmin min wun akunndan” (Sasafuɛ Tranwlɛ’n nun ndɛ)
Ninnge cinnjin nga Zezi yoli be’n.
“Kɛ Zezi boli Ɲanmiɛn junman’n i dilɛ bo’n” (Ɲanmiɛn Ndɛ’n—Mɛn Uflɛ Biblu’n, Ndɛ uflɛ wie mun A7)
a Like suanlɛ 31-33 nun’n, bé wá yíyí Ɲanmiɛn Sielɛ’n i su ndɛ’n i nun kpa ekun.
Ninnge wie mɔ be kwla yo ɔ fɛ ekun'n
KOSAN NGA SRAN’M BE TA BE USA’N
?Ngue yɛle Biblu’n nun like mɔ Zoova i Lalofuɛ’m be nin sran’m be suan’n?
A kwla fa Biblu’n nga a klo’n naan Zoova i Lalofuɛ kun w’a kle ɔ like. Ɔ osufuɛ mun nin ɔ janvuɛ’m be kwla tran like suanlɛ’n i bo wie. Be deman sika.
