LEKSIYON 16
Ano an mga Ginibo ni Jesus kan Yaon Siya Digdi sa Daga?
Pag pinag-uulayan an manungod ki Jesus, naiisip kan dakul an sarong daing kalaban-laban na umboy, sarong madunong na propeta, o sarong naghihingagdan na lalaki. Pero may maaaraman pa kita manungod sa saiya pag pinag-adalan ta an nagin buhay niya digdi sa daga. Sa leksiyon na ini, pag-uulayan ta an pira sa pinakaimportanteng mga bagay na ginibo ni Jesus asin kun paano iyan makakatabang sa saimo.
1. Ano an pinakaimportanteng trabaho kaidto ni Jesus digdi sa daga?
An pinakaimportanteng trabaho kaidto ni Jesus iyo an pagbalangibog o ‘pagpahayag kan maugmang bareta kan Kahadian nin Diyos.’ (Basahon an Lucas 4:43.) Ihinulit niya an maugmang bareta na an Diyos magibo o maestablisar nin sarong kahadian, o gobyerno, na iyo an matao nin solusyon sa gabos na problema nin katawuhan. a Maigot na ibinalangibog ni Jesus an nakakapakusog na mensaheng ini sa laog nin tulo may kabangang taon.—Mateo 9:35.
2. Taano ta naggibo nin mga milagro si Jesus?
Kadakul nin mababasa sa Bibliya na “mga milagro asin mga ngangalásan saka mga tanda na ginibo nin Diyos paagi [ki Jesus].” (Gibo 2:22) Tinawan nin Diyos nin kapangyarihan si Jesus kaya nakaya niyang kontrulon an kamugtakan nin panahon, magpakakan nin ribo-ribong tawo, magpaumay nin mga hilang, asin magbuhay pa ngani nin mga gadan. (Mateo 8:23-27; 14:15-21; Marcos 6:56; Lucas 7:11-17) Malinaw sa mga milagrong ginibo ni Jesus na isinugo siya nin Diyos. Ipinahiling man kaiyan na may kapangyarihan si Jehova na solusyunan an gabos tang problema.
3. Ano an manunudan ta sa nagin buhay ni Jesus?
Sinunod ni Jesus si Jehova sa ano man na sitwasyon. (Basahon an Juan 8:29.) Dawa may pagkontra, padagos na sinunod ni Jesus an ipinapagibo sa saiya kan saiyang Ama sagkod sa kagadanan. Pinatunayan niya na kaya nin tawo na paglingkudan an Diyos dawa sa masakiton na mga sitwasyon. Kaya tinawan kita ni Jesus “nin sarong arugan tanganing sundan [niyatong] marhay an saiyang mga lakad.”—1 Pedro 2:21.
ARAMON PA
Aramon kun paano ibinalangibog ni Jesus an maugmang bareta asin kun paano siya naggibo nin mga milagro.
4. Ibinalangibog ni Jesus an maugmang bareta
Nagbaklay si Jesus nin ginatos na kilometro sa maalpog na mga dalan para ihulit an maugmang bareta sa pinakadakul na tawong mahuhulitan niya. Basahon an Lucas 8:1, dangan pag-ulayan an mga hapot na ini:
-
An hinulitan sana daw ni Jesus iyo an mga tawong nagtiripon para magdangog sa saiya?
-
Paano naghinguwa si Jesus para mahulitan an mga tawo?
Ihinula nin Diyos na ihuhulit kan Mesiyas an maugmang bareta. Basahon an Isaias 61:1, 2, dangan pag-ulayan an mga hapot na ini:
-
Paano inutob ni Jesus an propesiyang ini?
-
Sa hiling mo, kaipuhan man daw madangog kan mga tawo ngunyan an maugmang bareta na ini?
5. Nagtukdo si Jesus nin mahalagang mga leksiyon
Apuwera sa paghulit kan maugmang bareta manungod sa Kahadian nin Diyos, nagtukdo man si Jesus nin kapaki-pakinabang na mga leksiyon. Pag-isipan an pirang halimbawa sa saiyang bantog na Sermon sa Bukid. Basahon an Mateo 6:14, 34 asin 7:12, dangan pag-ulayan an mga hapot na ini:
-
Anong kapaki-pakinabang na mga leksiyon an itinukdo ni Jesus sa mga bersikulong ini?
-
Sa hiling mo, kapaki-pakinabang pa daw an mga iyan sa sato ngunyan?
6. Naggibo si Jesus nin mga milagro
Tinawan ni Jehova nin kapangyarihan si Jesus para maggibo nin kadakul na milagro. Para mahiling an sarong halimbawa kaiyan, basahon an Marcos 5:25-34 o i-play an VIDEO. Dangan pag-ulayan an mga hapot.
-
Sa video, sa ano kumbinsido an may hilang na babayi?
-
Ano an hinahangaan mo sa milagrong ini?
Basahon an Juan 5:36, dangan pag-ulayan an hapot na ini:
-
Ano an pinapatunayan manungod ki Jesus kan mga milagrong ginibo niya?
Aram mo daw?
An kadaklan sa impormasyon manungod sa buhay ni Jesus mababasa ta sa apat na libro kan Bibliya na inaapod na Mga Ebanghelyo—an Mateo, Marcos, Lucas, asin Juan. An kada kagsurat kaiyan may mga ilinaag na detalye manungod ki Jesus na dai sinambit kan ibang kagsurat kan ibang Ebanghelyo. Pag binasa ta an apat na librong iyan, maaaraman ta an kawili-wiling mga detalye sa saiyang buhay.
-
MATEO
Siya an nagsurat kan inot na Ebanghelyo. Itinatampok diyan an mga itinukdo ni Jesus, lalo na an manungod sa Kahadian nin Diyos.
-
MARCOS
Siya an nagsurat kan pinakahalipot na Ebanghelyo. Marikas asin exciting an mga pangyayari diyan.
-
LUCAS
Isinaysay niya kun gurano kaimportante ki Jesus kan pagpamibi saka kun paano trinato ni Jesus an mga babayi.
-
JUAN
Isinaysay niya an kadakul na bagay na sinabi ni Jesus sa saiyang dayupot na mga amigo asin sa iba pang tawo. Tinatabangan kita kaiyan na maaraman an personalidad ni Jesus.
MAY MGA NAGSASABI: “Marahay na tawo man lang si Jesus.”
-
Ano sa hiling mo?
SUMARYO
Ihinulit ni Jesus an Kahadian nin Diyos, naggibo nin mga milagro, asin sinunod si Jehova sa ano man na sitwasyon.
Rebyu
-
Ano an pinakaimportanteng trabaho ni Jesus kan magdigdi siya sa daga?
-
Ano an pinapatunayan kan mga ginibong milagro ni Jesus?
-
Anong kapaki-pakinabang na mga leksiyon an itinukdo ni Jesus?
HILINGON MAN
Ano an pinakagustong ipakipag-ulay pirmi ni Jesus sa mga tawo?
“Kahadian nin Diyos—Taano ta Mahalaga Iyan ki Jesus?” (An Torrengbantayan, Nobyembre-Disyembre 2014)
Pag-isipan kun taano ta makakapagtiwala kita na talagang nangyari an mga milagrong ginibo ni Jesus.
“An mga Milagro ni Jesus—Ano an Manonodan Nindo?” (An Torrengbantayan, Hulyo 15, 2004)
Basahon kun ano an nagin epekto sa sarong lalaki kan halimbawa nin pagsasakripisyo ni Jesus.
“Sadiri Ko Sana an Iniisip Ko” (An Torrengbantayan, Nobyembre-Disyembre 2014)
Hilingon an pagkasunod-sunod kan panginot na mga aktibidad ni Jesus sa saiyang ministeryo.
a Mas detalyadong ipapaliwanag an manungod sa Kahadian nin Diyos sa Leksiyon 31-33.
Puwede Mo Man Magustuhan
PARATING MGA IHINAHAPOT
Ano an Pag-adal sa Bibliya na Iinaalok kan mga Saksi ni Jehova?
Sa interactive na programa nin pag-adal na iinaalok kan mga Saksi ni Jehova, puwede mong gamiton an arin man na traduksiyon nin Bibliya. Dai mag-alangan na imbitaran an saimong bilog na pamilya o an siisay man sa mga amigo mo na umiba saimo.
