ISAMBILILO 16
Finshi Yesu Acitile Ilyo Ali Pano Isonde?
Abantu abengi nga batontonkanya pali Yesu batontonkanya fye pa fyo afwile, e lyo bambi baishiba ukuti ali ni kasesema. Lelo kuti twasambilila ifingi pali Yesu ku fyo alecita ilyo ali pano isonde. Muli lino isambililo, twalasambilila pa fintu fimo ifyacindama ifyo Yesu acitile e lyo ne fyo mwingasambililako.
1. Mulimo nshi uwacindama sana uo Yesu alebomba?
Umulimo uwacindama sana uo Yesu alebomba wa “kubila imbila nsuma iya bufumu bwa kwa Lesa.” (Belengeni Luka 4:43.) Alebila imbila nsuma ya kuti Lesa ali no kubikako Ubufumu nelyo ubuteko, ubukapwisha amafya ayo abantunse bonse bakwata. a Pa myaka itatu ne myeshi 6, Yesu alibombele apapelele amaka yakwe ukubila iyi mbila nsuma.—Mateo 9:35.
2. Cinshi Yesu alecitila ifipesha amano?
Baibolo ilalanda pa ‘fya maka, pa fipesha amano, na pa fishibilo ifyo Lesa acitiile muli Yesu.’ (Imilimo 2:22) Lesa alipeele Yesu amaka ayalengele atalalike amabimbi, aliishe abantu abengi, aposhe abalwele e lyo no kubuusha abafwa. (Mateo 8:23-27; 14:15-21; Marko 6:56; Luka 7:11-17) Ifipesha amano ifyo Yesu acitile fyalilangile apabuuta tuutu ukuti ni Yehova Lesa e wamutumine, no kuti Yehova alikwata amaka ya kupwisha amafya yonse ayo fwe bantunse tukwata.
3. Finshi twingasambilila kuli Yesu?
Yesu lyonse aleumfwila Yehova. (Belengeni Yohane 8:29.) Muli fyonse alecita ifyo Wishi alemweba ukufikila na lintu afwile, nangu ca kuti abantu abengi balemukaanya. Ifyo Yesu acitile filanga ukuti abantu kuti babombela Lesa na lintu ifintu fyafishe. Kanshi ‘atushilile icilangililo pa kuti tulekonka sana mu ntampulo shakwe.’—1 Petro 2:21.
SAMBILILENI NA FIMBI
Sambilileni ifyo Yesu alecita pa kubila imbila nsuma na pa kucita ifipesha mano.
4. Yesu alebila imbila nsuma
Pa kuti fye Yesu abile imbila nsuma ku bantu abengi, ale-enda intamfu iitali mu misebo umwali sana ulukungu. Belengeni Luka 8:1, lyena lanshanyeni aya mepusho:
-
Bushe Yesu alebila fye imbila nsuma ku mabumba ya bantu abalelongana ku kukutika kuli ena?
-
Finshi Yesu alecita pa kuti abile imbila nsuma ku bantu abengi?
Lesa alisobele ukuti Mesia ali no kulabila imbila nsuma. Belengeni Esaya 61:1, 2, lyena lanshanyeni aya mepusho:
-
Bushe Yesu afikilishe shani ubu busesemo?
-
Bushe mulemona ukutila na muno nshiku mwine abantu balakabila ukukutika kuli iyi mbila nsuma?
5. Yesu alisambilishe amasambililo ayacindama
Yesu alebila imbila nsuma pa Bufumu bwa kwa Lesa, kabili alesambilisha na bantu pa fingabafwa mu mikalile yabo. Moneni fimo ifyo abasambilishe mu Lyashi lyakwe ilya pa Lupili. Belengeni Mateo 6:14, 34 na 7:12, lyena lanshanyeni aya mepusho:
-
Finshi Yesu asambilishe abantu muli ifi fikomo?
-
Bushe mulemona ukutila ifyo abasambilishe kuti fyatwafwa na muno nshiku?
6. Yesu alecita ifipesha mano
Yehova alipeele Yesu amaka ya kucita ifipesha mano ifingi. Pa kuti mwishibe icipesha mano cimo ico Yesu acitile, belengeni Marko 5:25-34 nelyo tambeni VIDIO. Lyena lanshanyeni amepusho yakonkapo.
-
Finshi umwanakashi uwalwele uwaciba mu vidio ashaletwishika?
-
Finshi mwatemwa pali ici cipesha amano?
Belengeni Yohane 5:36, lyena lanshanyeni ici cipusho:
-
Bushe ifipesha amano ifyo Yesu acitile fyalelanga finshi pali ena?
Bushe mwalishiba ici cishinka?
Ifingi ifyo twaishiba pali Yesu fyalembwa mu mabuuku 4 aya mu Baibolo ayo beta ukuti Amabuuku ya Mbila Nsuma. Aya amabuuku ni Mateo, Marko, Luka na Yohane. Umo na umo uwalembeleko ibuuku lya Mbila Nsuma, alilembele ifyebo fimo pali Yesu ifyo bambi bashalembele. Nga twabelenga amabuuku yonse 4 aya Mbila Nsuma kuti twaishiba ifingi pa bumi bwa kwa Yesu.
-
MATEO
Mateo e walembele ibuuku lya kubalilapo ilya Mbila Nsuma ilyainikwa ishina lyakwe. Ili ibuuku lilanda sana pa fyo Yesu alesambilisha, maka maka ifyo alesambilisha pa Bufumu bwa kwa Lesa.
-
MARKO
Marko e walembele ibuuku ilinono sana pa Mabuuku ya Mbila Nsuma. Muli ili ibuuku mwaliba ifintu ifingi ifisuma ifyo Yesu acitile.
-
LUKA
Ibuuku Luka alembele lilanda pa fyo Yesu alemona ukuti ipepo lyalicindama na pa fyo ali ne cikuuku ku banakashi.
-
YOHANE
Ibuuku Yohane alembele lilanda pa fintu ifingi ifyo Yesu alelandapo ilyo alelanshanya na bali sana ifibusa fyakwe e lyo na bantu bambi. Ifyaba muli ili ibuuku filalenga twaishiba ifyo Yesu ali.
ABANTU BAMO BATILA: “Yesu ni Lesa wa Maka Yonse.”
-
Inga imwe muletipo shani?
IFYO MUSAMBILILE
Yesu alebila pa Bufumu bwa kwa Lesa, alecita ifipesha amano, kabili aleumfwila Yehova muli fyonse.
Ukupitulukamo
-
Mulimo nshi uwacindama sana uo Yesu abombele ilyo ali pano isonde?
-
Bushe ifipesha mano ifyo Yesu acitile filanga finshi pali ena?
-
Finshi Yesu asambilishe abantu ifyali no kubafwa mu mikalile?
ISHIBILENIPO NA FIMBI
Finshi Yesu alelandapo sana?
“Ubufumu bwa kwa Lesa—Ico Bwacindamina Kuli Yesu” (Ulupungu lwa kwa Kalinda, October 1, 2014)
Moneni ifingalenga twacetekela ukuti ifipesha amano ifyo Yesu acitile ca cine fyalicitike.
“Finshi Mwingasambilila ku Fipesha Mano fya kwa Yesu?” (Ulupungu lwa kwa Kalinda, July 15, 2004)
Belengeni ifyo umwaume umo a-alwike ilyo abelengele pa fyo Yesu alebika amano ku bantu.
“Nali Uwaitemwa” (Ulupungu lwa kwa Kalinda, October 1, 2014)
Moneni ifintu ifyacindama ifyo Yesu acitile ukulingana ne fyo fyakonkene ukucitika.
a Tukasambilila ifingi pa Bufumu bwa kwa Lesa mwi sambililo 31 ukufika ku 33.
Nalimo Kuti Mwatemwako ne fi
AMEPUSHO ABANTU BEPUSHA SANA
Bushe Isambililo lya Baibolo E Cinshi?
Amasuko ku mepusho pe sambililo lya Baibolo ilyabula ukulipilisha.
