FARKARKOR 16
Rosai Yesus Ifrur Kaku Fafisu Ikenem ro Supswan Ine?
Snonggaku ḇebor ḇero baboine sya skara Yesus i ḇe kapira mgun kaker. Skara monda isya ḇyarek kaker ro moḇ rofanfan sya sanan ro ya, ḇaido sisya skara kaker ima kero wer smun i fa imar ro ai kandera. Sia wer siswarepen Yesus i ḇe nabi ḇefawinanem. Imbape, kofarkor fa kofawi marandan kankenem ḇyedi fafisu ikenem ro supswan ine kada, na kofawi roi nabore. Ro farkarkor ine, nari komam roi ḇefandun kaku Yesus ifrur kwar na ma moḇsa fawawi nane nfadwer moḇ komam i raya.
1. Fararur ḇepon kaku minsai Yesus ifrur ya?
Fararur ḇepon kaku Yesus ifrur ya iso byaryas abar ḇepyum ḇekur Karajan Allah. (Kowasya Lukas 4:43.) Yesus byaryas abar ḇepyum ine bo doḇe Manseren Allah nari ḇyawes karajan, ḇaido pamarenta oso. Doḇe karajan ine iso nari ḇepyos snonggaku syakam kandera sena. a Yesus dakfawi dakmor ḇa fafisu rya byaryas abar ḇepyum ine ro swaf taun ri kyor paik ri wonem.—Matius 9:35.
2. Rosai ḇefnai fa Yesus ifrur mujisat na nabore?
Refo fyasḇair aḇyair-aḇyair kanandor ḇebor Allah ifrur kwar ro Yesus i. (Farfyar 2:22) Manseren Allah byuk papoik ḇe Yesus i, inja syambraḇ fa ḇye wam doḇer ya fa ibrin, fyan snonggaku ḇebor, byuk pararei faro ḇeduf sya, ma ḇefrur kanandor syadi iso ḇyawes snonggaku ḇemar kwar sya. (Matius 8:23-27; 14:15-21; Markus 6:56; Lukas 7:11-17) Mujisat Yesus ifrur nane nfasnai kaku Manseren Yahwe iso ḇewan i, inja nane nfasnaiḇair kako snar Yahwe nya papoik fa ipyos kandera koḇena kam.
3. Rosai kofarkor ro moḇ Yesus ikenem raya?
Yesus isouser faro Yahwe I ro fafisu nakam. (Kowasya Yohanes 8:29.) Roi ḇedwarek Yesus i nabore, fama isouser pdef isof ro imar insama ifrur Kmari marisen Ḇyena kam. Yesus fyasnai kaku ḇe snonggaku koine, koisya koro fafisu ḇesamswen yano, bisa kosouser ḇe Manseren Allah. Inja, Yesus fyasnai faro ko kwar insa koso pyum kaku moḇ imbran raya.—1 Petrus 2:21.
SWEWAR KAKU WER
Nari kawos rosai Yesus ifrur kaku fa rya byaryas abar ḇepyum ma mansei ḇebuk papoik ḇe i fa ifrur mujisat na.
4. Yesus byaryas abar ḇepyum
Yesus imbran ḇinggwan kaku ro sampak ḇeroref na fa byaryas abar ḇepyum ḇe snonggaku ḇebor syadi. Kowasya Lukas 8:1, raimnai kawos fakfuken suine:
-
Yesus byaryas faro snonggaku ḇefanjur fa ḇerower i sya serer ke?
-
Rosai Yesus ifrur kaku fa rya isrow snonggaku sya?
Manseren Allah ikofen ḇepon kwar Mesias nari byaryas abar ḇepyum ya. Kowasya Yesaya 61:1, 2, raimnai kawos fakfuken suine:
-
Rariso ḇardadi ine nejadi ro Yesus i rai?
-
Kwara ido, fandun fa snonggaku ḇero baboine sya sakrower abar ḇepyum ya ke?
5. Yesus byuk farkarkor ḇefandun kaku
Yesus byaryas abar ḇepyum ḇekur Karajan Allah monda ḇa, mboi ikofenḇair anun ḇepyum fa nbuk payamyum ḇe kawasa sya. Kwarapan anun Yesus dap ro faya ḇyeja ro bon. Kowasya Matius 6:14, 34 ma 7:12, raimnai kawos fakfuken suine:
-
Anun ḇepyum rosaiso Yesus ikofen ro mnuk-mnuk nane?
-
Kwara ido, anun Yesus byuk nane nbuk payamyum kaker ḇe ko ro baboine ke?
6. Yesus ifrur mujisat na nabore
Yahwe byuk papoik ḇe Yesus i fa ikfrur mujisat ḇebor na. Imbe wafawi mujisat oso Yesus ifrur ya ido, kowasya Markus 5:25-34 ḇaido komam VIDIO. Raimnai kawos fakfuken na.
-
Ro vidio ine, rosai bin ani ikyar kaku ya?
-
Roi ḇepyum rosai wamarisen ro mujisat ine na?
Kowasya Yohanes 5:36, raimnai kawos fakfuken ine:
-
Yesus ifrur mujisat kwar, inja rosai wafawi ro Yesus i?
Wafawi ke?
Sfas fawar ḇebor ḇekur Yesus marandan kankenem ḇyedi ro Refo ro syap ri fyak sap ḇe Injil, isoine Matius, Markus, Lukas, ma Yohanes. Manfasfas Injil oser-oser sfas roi ḇesisye ro Yesus i. Ḇape, kowasya syap Injil ri fyak nane kam kada, nari kofawi pyum Yesus kenem ḇyedi.
-
MATIUS
iso ḇefas randak syap Injil. Matius dapḇair Yesus farkarkor ḇyena ro fasfas ḇyeja, ḇepon kaku ya iso fyasḇair Karajan Allah.
-
MARKUS
dakfas syap Injil na, boi nakwan ḇa. Fyasḇair sarisa ḇepyum ro Yesus kankenem ḇyedi.
-
LUKAS
roi dakfas na nafrur fa kofawi Yesus myam nadi ima roi ḇefandun kaku ma fyasḇair moḇ Yesus ifrur pyum bin sya raya.
-
YOHANES
fyasḇair Yesus awawos ḇyena faro bati ḇefanam ḇyesi ma snonggaku ḇese. Nane nafnoḇek ko fa kofawi pyum Yesus rari-rari ḇyena.
SIA SOḆE: ”Yesus ima Manseren Allah dirya, inja nya papoik fa ifrur mujisat nabore.”
-
Moḇsa wakkara roi ine rai?
FARKARKOR ḆYENA
Yesus byaryas abar ḇepyum ḇekur Allah Karajan Ḇyedi, ifrur mujisat nabore, ma isouser ḇe Yahwe I ro fafisu nakam.
Waswarepen Kaḇer
-
Fararur ḇepon kaku rosaiso Yesus ifrur ro fafisu ikenem kaker ro supswan ine?
-
Yesus ifrur mujisat kwar, inja rosai wafawi ro Yesus i?
-
Wos anun minsai Yesus byuk fa nbuk payamyum faro snonggaku sya kenem sena?
SWEWAR NABOR WER
Roi risaiso Yesus imarisen dawos ker ḇe snonggaku ḇesesya?
”Karajan Allah—Moḇsa Yesus Myam Na Rai” (Syap Baryas 1 Oktober 2014)
Rosai ḇefrur fa kokyar mujisat Yesus ifrur nakam ndarirya kaku kwar?
”Mujisat ro Yesus I—Rosai Wafawi ya?” (Syap Baryas 15 Juli 2004)
Wawasya fawar ro snon oso, mam moḇsa fyadwer kenem ḇyedi fafisu ifawi Yesus ima iswar kaku snonggaku koine.
”Yamarisen Yakenem faro Manggundaya” (Syap Baryas 1 Oktober 2014)
a Insape nari kawos nabor syadi Karajan Allah ine ro Farkarkor 31-33 iwama.
Wamarisen Ido Mam Ine Kako
FAKFUKEN RO KAWASA KAM
Moḇsa Saksi-Saksi Yahwe Sya Farkarkor Refo Sena Isnai Rai?
Bisa bepake Refo rosai monda fa wafarkor Refo ḇeyor ḇaḇyak ḇa kuker Saksi-Saksi Yahwe sya. Wamgak awer fa wor kina karyer Bansya kam ḇaido bati Besya fa sakso.
