IRUẸMWI 16

De Emwi Ne Jesu Ru Vbe Ọ Rre Agbọn Na?

KPẸRE

A ghaa ta ẹmwẹ Jesu, emwi nọ la emwa nibun ekhọe ọre ẹghẹ nọ ya gha re ọmobọ, ra vbene ọ ya wu hẹ. Eso vbe roro ẹre wẹẹ, akhasẹ ẹre Jesu khin. Sokpan, ma gha miẹn emwi nibun ruẹ vbekpa e Jesu, vbe ima gha gbarokotọ ghee emwi eso nọ ru vbe ọ rre agbọn na. Vbe iruẹmwi na, ma gha ziro yan emwi eso ne kpataki ne Jesu ru kevbe emwi ne u gha miẹn ruẹ vbọ.

1. De iwinna ne Jesu wa mobọ gha ru?

Iwinna ikporhu “iyẹn nọ maan . . . ọghe Arriọba Osanobua” ẹre Jesu wa mobọ gha ru. (Tie Luk 4:43.) Ọ kegha tama emwa wẹẹ, Osanobua gha mu Arriọba ọghẹe gbọọ, nọ khian sọfurre ye ọlọghọmwa hia ne emwa nagbọn werriẹ aro daa. a Ukpo eha vbe ukhiọnmwẹ, ẹre Jesu ya rhiegba ye iwinna na.—Matiu 9:35.

2. Vbọ ya e Jesu gha ru iwinna ọyunnuan?

E Baibol tama ima wẹẹ, “Osanobua keghi lekpae [Jesu] winna iwinna ọyunnuan” nibun. (Iwinna 2:22) Jesu dobọ ogbigbi ẹhoho yi, ọ rhie evbare ne emwa nibun, ọ mu emwa egbe rran, uhiẹn, ọ na huẹn emwa ni wulo kpaegbe. Ẹtin Osanobua ẹre ọ ya ru ena hia. (Matiu 8:23-27; 14:15-21; Mak 6:56; Luk 7:11-17) Emwi ọyunnuan ne Jesu ru so igiẹ yọ wẹẹ, Osanobua ẹre ọ gie ẹre rre. Ọ vbe rhie ma wẹẹ, e Jehova mwẹ ẹtin nọ khian ya sọfurre ye ọlọghọmwa ọghe ima hia.

3. Vbe ima miẹn ruẹ vbe odẹ ne Jesu ya yin vbe ọ rre agbọn na?

Ẹghẹ hia ẹre Jesu wa ya gha họn ẹmwẹ ne Jehova. (Tie Jọn 8:29.) Agharhemiẹn wẹẹ ọ miẹn ukpokpo, te ọ wa ru emwi hia ne Erhae wẹẹ nọ ru, uhiẹn ya sẹ ẹdẹ nọ wu. Ọ keghi rhie ẹre ma wẹẹ, emwa nagbọn gha ye sẹtin gha ga Osanobua, uhiẹn vbe emwi ghaa lọghọ. Te Jesu ‘rhie igiemwi ne ima, ne ima gha lele ukpowẹ irẹn.’—1 Pita 2:21.

GUALỌ OTỌ RE SAYỌ

Gia ziro yan vbene Jesu ya kporhu iyẹn nọ maan hẹ kevbe iwinna ọyunnuan nọ ru.

4. Jesu kporhu iyẹn nọ maan

Ibiriki nibun ẹre Jesu khian la vbe odẹ ne ebubẹ vuọẹn, nọ mieke na sẹtin kporhu ma emwa nibun. Tie Luk 8:1, iyeke ọni, uwa ghi ziro yan avbe inọta na:

Emwa ni gbẹbu lẹga e Jesu ọkpa, ẹre Jesu ghaa kporhu ma ra?
De ẹrhiọn ne Jesu loo ro, nọ mieke na miẹn emwa kporhu ma?

Osanobua keghi tae yotọ wẹẹ, e Mẹzaia gha kporhu iyẹn nọ maan. Tie Aizaia 61:1, 2, iyeke ọni, uwa ghi ziro yan avbe inọta na:

De vbene ẹmwẹ akhasẹ na, ya mwẹ amusẹ hẹ vbe egbe Jesu?
Uwẹ ghee ẹre wẹẹ ọ khẹke, ne emwa ni rrọọ vbe ẹdẹnẹrẹ vbe họn nene iyẹn nọ maan ra?

5. Ẹmwata ne uhunmwu ẹmwẹ, ẹre Jesu ghaa maa emwa re

Gberra wẹẹ Jesu ghaa kporhu iyẹn nọ maan ọghe Arriọba Osanobua, ọ vbe gha maa emwa emwi nọ gha gia rhie ye uyinmwẹ. Gia ziro yan ẹmwẹ eso ne Jesu tae vbe ikporhu nọ kpee re vbe uhunmwu oke. Tie Matiu 6:14, 34 kevbe 7:12, iyeke ọni, uwa ghi ziro yan avbe inọta na:

De ẹmwẹ ibude ne Jesu rhie ne ima vbe avbe ako na tiere na?
Uwẹ yayi wẹẹ ẹmwẹ ibude na ye mwẹ esa ne iran ye vbe ẹdẹnẹrẹ ra?

6. Jesu ru emwi ọyunnuan nibun

E Jehova keghi rhie ẹtin ne Jesu ya ru emwi ọyunnuan nibun. Tie Mak 5:25-34 ne u ya rẹn emwi ọyunnuan ọkpa nọ ru, ra kpee VIDIO na. Iyeke ọni, uwa ghi ziro yan inọta ni lelẹe.

E VIDIO: Ọ Mu Okhuo Ọkpa Nọ Khuọnmwi Egbe Rran (5:10)

Vbe vidio na, de iyayi ne okhuo nọ khuọnmwi nii ghaa mwẹ?
Vbọ mu ruẹ ekhọe vbe emwi ọyunnuan na?

Tie Jọn 5:36, iyeke ọni, uwa ghi ziro yan inọta na:

De emwi ne avbe emwi ọyunnuan ne Jesu ru, maa ima re vbekpa re?

U ka rẹn ra?

Ebe Enẹ Ni Ta Okha Ọghe Jesu ni re Matiu, Mak, Luk, kevbe Jọn, ẹre ọ ya ima rẹn emwi nibun vbekpa e Jesu. Agharhemiẹn wẹẹ okha ọghe Jesu ẹre iran hia tae, ọ mwẹ emwi eso ne dọmwadẹ iran tae vbekpa e Jesu, ne nikẹre ma ta. Ma gha ghi tie ebe enẹ na, ma ghi do rẹn emwi ughughan ni gbe ọmwa otiti, ni sunu vbe ẹdagbọn e Jesu.

MATIU

ẹre ọ ka gbẹn ebe ọghẹe. Ọ wa kakabọ guan kaẹn imamwaemwi ọghe Jesu, katekate nọ dekaẹn Arriọba Osanobua.
MAK

ẹre ọ gbẹn ebe nọ ghi kherhe sẹ. Emwi eso ni gbe ọmwa otiti ni sunu vbe arrọọ ọghe Jesu, ẹre ọ wa mobọ guan kaẹn.
LUK

wa kakabọ guan kaẹn vbene erhunmwu ru ekpataki sẹ hẹ vbe arrọọ ọghe Jesu kevbe obọ nọ ya gha mu ikhuo.
JỌN

wa kakabọ guan kaẹn vbene Jesu ya gha gu avbe ọse ni sikẹ ọre kevbe emwa ọvbehe guan hẹ. Ọna wa ya ima rẹn aro ọmwa ne Jesu khin.