KALANSEN 16
Yesu ye mun de kɛ k’a to dugukolo kan?
Mɔgɔ caman bɛ miiri Yesu la i n’a fɔ denyɛrɛnin dɔ se tɛ min ye, kira hakilitigi dɔ, walima cɛ dɔ min bɛ ka sa. Nka yala an bɛ se ka fɛn caman kalan a ko la an kɛtɔ k’a ka dugukolokan ɲɛnamaya sɛgɛsɛgɛ wa? Nin kalansen in kɔnɔ, an bɛna fɛn nafamaba dɔw sɛgɛsɛgɛ Yesu ye minnu kɛ ani an bɛna a ye o bɛ se ka i dɛmɛ cogo min na.
1. Yesu ka baara bɛɛ la nafama tun ye jumɛn ye?
Yesu ka baara bɛɛ la nafama tun ye ka “Ala ka masaya Kibaru Duman fɔ.” (Luka 4:43 kalan.) A ye kibaru duman fɔ min b’a jira ko Ala bɛna Masaya dɔ walima gofɛrɛnɛman dɔ sigi, o min bɛna Hadamadenw ka gɛlɛyaw bɛɛ ban. a San saba ni tila kɔnɔna na, Yesu ye baaraba kɛ ka o cikan fɔ mɔgɔw ye, o min bɛ dusu don mɔgɔw kɔnɔ.—Matiyu 9:35.
2. Yesu ka kabakow kun tun ye mun ye?
Bibulu bɛ “kobaw ni kabakow ani taamashyɛnw” caman kofɔ Ala tɛmɛnna Yesu fɛ ka minnu kɛ. (Kɛwalew 2:22) Ala ye sebaaya di Yesu ma a ka se sɔrɔ waati kɛcogoya kan, ka dumuni di mɔgɔ waa caman ma, ka banabagatɔw kɛnɛya, ani hali yɛrɛ ka mɔgɔ salenw lasegin ɲɛnamaya la. (Matiyu 8:23-27; 14:15-21; Marka 6:56; Luka 7:11-17) Yesu ka kabakow y’a jira k’a jɛya ko Ala de y’a ci. U fana y’a jira ko se bɛ Jehova ye ka an ka gɛlɛyaw bɛɛ ban.
3. Jesu ka ɲɛnamaya kɛcogo bɛ an kalan mun de la?
Yesu ye Jehova kan minɛ kow bɛɛ la. (Yuhana 8:29 kalan.) Hali kɔrɔbɔli kɔnɔna na, Yesu Fa ye min ɲini a fɛ a ye o kɛ ni kantigiya ye fo ka taa se a ka saya ma. A y’a jira k’a jɛya ko Hadamadenw bɛ se ka Ala bato hali ko gɛlɛnw kɔnɔna na. O cogo la, Yesu “ye cogo jira [an na], walisa [an] ka tugu a sen nɔ na.”—1 Piɛrɛ 2:21.
DƆ FARA I KA DƆNNIYA KAN
Yesu ye kibaru duman fɔ mɔgɔw ye cogo min na ani a ye kabakow kɛ cogo min na, an ka o sɛgɛsɛgɛ.
4. Yesu ye kibaru duman fɔ
Yesu ye kilomɛtɛrɛ ba caman taama kɛ sen na siraw kan buguri tun bɛ minnu kan walasa ka kibaru duman fɔ mɔgɔ caman ye. Luka 8:1 kalan, o kɔ aw ka baro kɛ nin ɲininkaliw kan:
-
Mɔgɔ minnu tun bɛ fara ɲɔgɔn kan ka Yesu lamɛn, yala a tun bɛ olu dɔrɔn de waaju wa?
-
Yesu tun bɛ cɛsiri jumɛnw de kɛ walasa ka mɔgɔw ɲini?
Ala tun kɔnna k’a fɔ ko Masiya bɛna kibaru duman fɔ. Esayi 61:1, 2 kalan, o kɔ aw ka baro kɛ nin ɲininkaliw kan:
-
Yesu ye o kiraya kuma tiimɛ cogo di?
-
Yala e hakili la, mɔgɔw mago b’a la ka o kibaru duman mɛn bi wa?
5. Yesu ye mɔgɔw kalan kalansira nafamaw la
Ka fara Ala ka Masaya kibaru duman waajuli kɛli kan, Yesu ye mɔgɔw kalan kalansira nafamaw la. A ka kulu kan waajuli dɔnnen don kosɛbɛ, an ka o misali damadɔw sɛgɛsɛgɛ. Matiyu 6:14, 34 ani 7:12 kalan, o kɔ aw ka baro kɛ nin ɲininkaliw kan:
-
Yesu ye laadilikan nafama jumɛnw de di nin tɛmɛsira ninnu kɔnɔ?
-
E hakili la, nafa bɛ o laadilikanw la hali bi wa?
6. Yesu ye kabakow kɛ
Jehova ye kabako caman kɛli sebaaya di Yesu ma. Walasa ka o misali kelen ye, a’ye Marka 5:25-34 kalan walima a’ye WIDEYO lajɛ. O kɔ aw ka baro kɛ nin ɲininkaliw kan:
-
Wideyo kɔnɔ, muso banabagatɔ tun dalen bɛ mun de la?
-
Mun de diyara e ye nin kabako in kɔnɔna na?
Yuhana 5:36 kalan, o kɔ aw ka baro kɛ nin ɲininkali kan:
-
Yesu ka kabakow bɛ “seereya kɛ” mun de ko la walima u bɛ mun de jira Yesu ko la?
I tun bɛ nin dɔn wa?
An bɛ fɛn minnu dɔn Yesu ko la, olu fanba bɛ Bibulu kitabu naani kɔnɔ minnu bɛ wele Linjili, ni olu ye—Matiyu, Marka, Luka ani Yuhana. O Linjili kelen-kelen bɛɛ sɛbɛnbagaw bɛɛ ye fɛn pereperelatigɛlen dɔw sɛbɛn Yesu ko la. Ni an ye o kitabu naani bɛɛ kalan, Yesu ka ɲɛnamaya kɛcogo bɛ don an na kosɛbɛ.
-
MATIYU
de fɔlɔ ye a ka Linjili sɛbɛn. O bɛ fɛn caman fɔ an ye Yesu ka kalansiraw ko la, kɛrɛnkɛrɛnnenya la, Yesu ye mɔgɔw kalan min na Ala ka Masaya ko la.
-
MARKA
de ye Linjiliw bɛɛ la surunman sɛbɛn. O bɛ fɛn caman fɔ minnu bɛ don mɔgɔ la kosɛbɛ.
-
LUKA
delili ani Yesu ye musɔw minɛ cogo min na, ale sinsinna o kan kɛrɛnkɛrɛnnenya la.
-
YUHANA
bɛ fɛn caman fɔ an ye Yesu jogo kan a kɛtɔ ka kuma baro caman kan Yesu ye minnu kɛ ni a teri sɛbɛw ani mɔgɔw wɛrɛw ye.
MƆGƆ DƆW B’A FƆ KO: “Yesu tun ye mɔgɔ ɲuman dɔrɔn de ye, ko fɛn wɛrɛ tɛ o kɔ.”
-
E dun, e hakilina ye mun ye?
BAKURUBAFƆLI
Yesu ye Ala ka Masaya waajuli kɛ, a ye kabakow kɛ ani a ye Jehova kan minɛ kow bɛɛ la.
Seginnkanni
-
Yesu ka baara bɛɛ la nafama tun ye jumɛn ye k’a to dugukolo kan?
-
Yesu ka kabakow bɛ mun de jira?
-
Yesu ye mɔgɔw kalan kalansira nafama jumɛnw de la?
NINNU LAJƐ
Yesu kumana barokun jumɛn de kan kosɛbɛ?
A lajɛ kun minnu na an bɛ se ka da a la ko Yesu ka kabakow kɛra tiɲɛ yɛrɛ la.
“Yesu ka kabakow—Olu bɛ se ka i kalan mun de la?” (w04 15/07)
Yesu ka yɛrɛsaraka misali ye nɔ bila cɛ dɔ la cogo min na, o kalan.
“Ne ka ɲɛnamaya bɛɛ tun sinsinnen bɛ n’yɛrɛ de kan” (wp14 01/10)
A lajɛ Yesu ye ko nafama minnu kɛ ani a y’u kɛ ka tugu ɲɔgɔn kɔ cogo min na.
a Kalansen 31-33nan bɛna Ala ka Masaya ɲɛfɔ cogo jɛlen na.
