PARLAJARAN 16

Aha do na Ibahen Jesus Sanggah Ia i Tanoh On?

PADALAN

Dong halak na mambayangkon Jesus ai sada poso-poso. Dong homa na mangkatahon anggo ia sahalak nabi. Tapi, bahat do na boi ibotoh hita pasal Jesus anggo iparlajari hita aha na ibahenni sanggah ia i tanoh on. Bani parlajaran on iulas hita ma aha do na dob ibahen Jesus janah aha do gunani ai bamu.

1. Aha do tugas ni Jesus na sipontingan?

‘Mambaritahon barita na madear pasal Harajaon ni Naibata’ do tugas ni Jesus na sipontingan. (Basa Lukas 4:43.) Ia mambaritahon anggo Naibata sihol pajongjongkon Harajaon-Ni. Marhitei Harajaon ai, isasap Naibata ma ganup sitaronon ni jolma. a Sadokah tolu satongah tahun, lang marnaloja Jesus mambaritahon pasal Harajaon ai.—Mateus 9:35.

2. Mase ibahen Jesus tanda halongangan atap mukjizat?

Bibel mangkatahon bahat do “tanda halongangan na ibahen Naibata marhiteihon [Jesus]”. (Lahoan 2:22) Umpamani, boi do Jesus pasohkon haba-haba, mambere mangan marribu halak, pamalumkon na boritan, ampa papuhohon halak na dob matei. (Mateus 8:23-27; 14:15-21; Markus 6:56; Lukas 7:11-17) Humbani halongangan ai, taridah ma sinuruh ni Naibata do Jesus ai. Anjaha ibotoh hita ma markuasa do Jahowa pasaloseihon ganup masalahta.

3. Aha do na boi iparlajari hita humbani sitiruon na ibahen Jesus?

Tongtong do Jesus unduk hubani Jahowa. (Basa Johannes 8:29.) Age pe dong tantangan, ihorjahon Jesus do ganup harosuh ni Bapani sadokah goluhni. Ibere Jesus do ‘sitiruon ase boi iihutkon hita bokas ni naheini’. Halani ai, hita pe boi do totap setia mangidangi Naibata age pe lang urah situasini.—1 Petrus 2:21.

PARLAJARI ROH BAHATNI

Parlajari hita ma sonaha Jesus mambaritahon ambilan na madear janah sonaha ia mambahen mukjizat.

4. Ibaritahon Jesus do ambilan na madear

Marratus kilometer do Jesus mardalan laho mambaritahon ambilan na madear hubani buei halak. Basa ma Lukas 8:1, janah ulas ma sungkun-sungkun on:

Ai pitah hubani halak na manjumpahi ia dassa Jesus marbarita?
Aha ma na ibahen Jesus ase boi manjumpahi halak?

Domma ipatugah hinan anggo Mesias roh laho mambaritahon ambilan na madear. Basa ma Jesaya 61:1, 2, janah ulas ma sungkun-sungkun on:

Sonaha panjahaion ai saud bani Jesus?
Anggo iahap ham, porlu do homa halak sonari on manangar ambilan na madear?

5. Bahat do podah na iajarhon Jesus

Leganni ai, iajarhon Jesus do homa podah na marguna hubanta. Pardiateihon ma piga-piga contohni sanggah ia marambilan i atas dolog. Basa ma Mateus 6:14 34, pakon 7:12, janah ulas ma sungkun-sungkun on:

Bani ayat ai, aha ma podah na ibere Jesus?
Anggo iahap ham, marguna do podahni ai ronsi sonari?

6. Ibahen Jesus do mukjizat

Ibere Jahowa do kuasa bani Jesus laho mambahen mukjizat. Contohni, basa ma Markus 5:25-34, atap tonton ma VIDEO. Dob ai balosi ma sungkun-sungkun on.

VIDEO: Sahalak Naboru na Ipamalum Jesus (5:10)

Bani video ai, aha do na ihaporsayai naboru na boritan ai?
Aha do na iharosuhkon ham humbani sarita ai?

Basa ma Johannes 5:36, janah ulas ma sungkun-sungkun on:

Aha ma na ipatuduh Jesus humbani mukjizat na ibahen ia?

Ai ibotoh ham do?

Bahat do sarita pasal Jesus isurat bani buku Mateus, Markus, Lukas, pakon Johannes. Jadi anggo ibasa hita ganup saritani bani ompat buku ai, lambin tangkas ma ibotoh hita sonaha hagoluhan ni Jesus.

MATEUS

Bani buku on, bahat do ipatugah pasal ajaran ni Jesus, tarlobih pasal Harajaon ni Naibata.
MARKUS

Bani buku on, bahatan do ipatugah pasal halongangan na ibahen Jesus.
LUKAS

Humbani buku on, ibotoh hita ma ponting tumang do tonggo ai bani Jesus. Ipatugah do homa sonaha pambahenanni bani naboru.
JOHANNES

Bani buku on, bahat do isurat pasal aha na ihatahon Jesus hubani susianni pakon halak na legan. Hunjon gabe ibotoh hita ma sonaha sifat ni Jesus.