NLÔ AJÔ 16

Jé Yésus a nga bo éyoñ a mbe si va?

Vô’ôlô nkobô

Éyoñ bôte ba simesane Yésus, abui da yene nye ane nkeñelé mon, bevok ane beta nkulu mejô, ba bevo’o ke ane môt a nga wu awu mintaé. Jé bi ne yé’é a lat a Yésus nge bia tu’a fas ényiñe jé éyoñ a mbe si va? Nlô ajô wu, wo zu yene beta be mam béziñ Yésus a nga bo, a aval avé be ne volô wo.

1. Ésaé évé é mbe é dañe mfi mise me Yésus?

Ésaé Yésus a nga dañe telé ôsu é mbe na a “kate bôt mbamba foé ya Ayoñe [nge ke Éjôé] Zambe.” (Lañe’e Luc 4:43.) A nga kañete na Zambe a ye telé éjôé ja ye mane vaa minju’u mise ya si nyi. a Yésus a nga ve ngule jé ése na a kañete mbamba foé ate tañe mimbu milal a étun.—Matthieu 9:35.

2. Jé mesimba Yésus a nga bo me nga liti?

Bible a kobô ajô ya “bitua bi mam a mam bôt be nga semen, a mendem, mame mete Zambe a nga bo [a zene ya be Yesus].” (Mam Minlôman 2:22) A ngule Zambe a nga ve nye, Yésus a nga bame ôkôs, a ve betoyini be bôt bidi, a saé minkôkon, a wômôlô fe bewu. (Matthieu 8:23-27; 14:15-21; Marc 6:56; Luc 7:11-17) Mesimba Yésus a nga bo me nga liti ne fômelé na Zambe nnye a nga lôme nye. Me nga liti fe na Yéhôva a bili ngule ya vaa minju’u mise ya si nyu.

3. Jé ényiñe Yésus ja ye’ele bia?

Yésus a nga bo Yéhôva mewôk ényiñe jé ése. (Lañe’e Jean 8:29.) Akusa bo étibela’a, Yésus a nga bo nkômban Ésaa wé akekui awu. A nga liti na môt a ne bo Zambe ésaé to’o a tele meve’ele été. Yésus a nga li’i bia “éve’ela, nde [bia] ye tône bibô’a mebo bié.”—1 Pierre 2:21.

TUKA’A FAK

Yene’ aval avé Yésus a nga kañete mbamba foé, a bo mesimba.

4. Yésus a nga kañete mbamba foé

Yésus a nga wulu mintete bekilimeta minjoñ mi tyia asu na a kañete abui bôt mbamba foé. Lañe’e Luc 8:1, mvuse ya valé, yala’ane minsili mi:

Ye Yésus a mbe a yange’e na bôt be sulan ngume vôm asu na a kañete be?
Nju’u ôvé Yésus a nga nyoñe na a kañete bôt?

Zambe a nga kuli ajô na Messie a ye kañete mbamba foé. Lañe’e Ésaïe 61:1, 2, mvuse ya valé, yala’ane minsili mi:

Aval avé Yésus a nga tôé nkulan ajô ôte?
Ye wo simesane na e ne mfi na bôt be wô’ô mejô me Zambe den?

5. Yésus a nga ve mbamba melep

Ane ô vaa na Yésus a nga kañete mbamba foé, a nga ve fe bia mbamba meleb ma volô bia na bi yeme nyiñ a bôte bevok. Bia koone melebe méziñe ya été nkañete a nga bo nkôle yôp. Lañe’e Matthieu 6:14, 34 a 7:12, mvuse ya valé, yala’ane minsili mi:

Melebe mevé Yésus a ve bifuse bi?
Ye wo simesane na melebe mete me ne volô bia den?

6. Yésus a nga bo mesimba

Yéhôva a nga ve Yésus ngule ya bo abui mesimba. Lañe’e Marc 5:25-34 asu na ô yen asimba éziñ Yésus a nga bo, nge ke futi’i VIDÉO. Mvuse ya valé, yala’ane minsili mi.

VIDÉO: Yésus a saé nkôkone minga (5:10)

Nkôkone minga ô mbe ô bili ndi nleme fé?
Jé nje wo te nye’e vidéo ate?

Lañe’e Jean 5:36, mvuse ya valé, yala’ane nsili wu:

Mesimba Yésus a nga bo ma liti na ngule jé ja so be za?

Ye wo too ô yeme’ek?

Bia koone mame Yésus a nga bo a mam a nga jô bekalate benyin ba kañete ényiñe jé. Bekalate bete be ne na: Matthieu, Marc, Luc, a Jean. Kalate ase a ngôné bone be mame béziñ bekalate bevok be nji bi a lat a ényiñe Yésus. Nalé a bo na éyoñ bia lañe bekalate bete benyin, bia kôme yem avale môte Yésus a mbe.

MATTHIEU

Nnye a nga tili kalate ôsu. A nga ngôné miñye’elane mi Yésus, e dañedañ mi mi tii a Éjôé Zambe.
MARC

Nnye a nga tili kalate a dañ étun. A dañe ngôné beta be mame Yésus a nga bo.
LUC

A nga liti abim avé meye’elan me mbe mfi asu Yésus, a avale Yésus a mbe a nyoñe’e binga a ôsesa.
JEAN

A dañe kobô ajô ya mefulu Yésus a nga liti a zene ya minlañ a mbe a la’an a bemvôé bé a bôte befe.