LEKSIYON 16
Unsay Gihimo ni Jesus sa Dinhi Siya sa Yuta?
Dihang maghunahuna ang mga tawo bahin kang Jesus, ang ilang mahunahunaan mao nga siya atimanonon nga bata, maalamon nga propeta o, himalatyon nga tawo. Pero naa pa ba tay makat-onan bahin niya kon atong susihon ang iyang kinabuhi sa yuta? Niini nga leksiyon, hisgotan nato ang pipila sa pinakaimportanteng butang nga gihimo ni Jesus ug kon sa unsang paagi ni makatabang nimo.
1. Unsa ang pinakaimportanteng buluhaton ni Jesus?
Ang pinakaimportanteng buluhaton ni Jesus mao ang ‘pagsangyaw sa maayong balita sa Gingharian sa Diyos.’ (Basaha ang Lucas 4:43.) Iyang gisangyaw ang maayong balita nga ang Diyos magtukod ug gingharian, o gobyerno, nga magsulbad sa tanang problema sa tawo. a Sulod sa tulo ka tuig ug tunga, si Jesus nagkugi pag-ayo sa pagsangyaw niining makapadasig nga mensahe.—Mateo 9:35.
2. Nganong naghimog mga milagro si Jesus?
Gihisgotan sa Bibliya ang daghang “gamhanang mga buhat ug katingalahang mga butang ug mga ilhanan” nga gihimo sa Diyos pinaagi kang Jesus. (Buhat 2:22) Pinaagi sa gahom sa Diyos, si Jesus nakahimo sa pagkontrol sa hangin ug dagat, pagpakaon sa linibo, pag-ayo sa mga naay sakit, ug bisan sa pagbanhawg patay. (Mateo 8:23-27; 14:15-21; Marcos 6:56; Lucas 7:11-17) Klarong gipakita sa mga milagro ni Jesus nga gipadala siya sa Diyos. Gipakita sab niini nga si Jehova naay gahom sa pagsulbad sa tanan natong problema.
3. Unsay atong makat-onan sa paagi sa pagkinabuhi ni Jesus?
Gisunod ni Jesus si Jehova sa tanang panahon. (Basaha ang Juan 8:29.) Bisan pa sa pagsupak, matinumanong gisunod ni Jesus ang tanang gisugo kaniya sa iyang Amahan hangtod sa iyang kamatayon. Gipamatud-an niya nga ang mga tawo posibleng makaalagad sa Diyos, bisan sa lisod nga mga kahimtang. Busa si Jesus “nagbilin [kanatog] sulondan aron sundon [nato] pag-ayo ang iyang mga tunob.”—1 Pedro 2:21.
TUN-IG DUGANG
Matikdi kon sa unsang paagi si Jesus nagsangyaw sa maayong balita ug naghimog mga milagro.
4. Gisangyaw ni Jesus ang maayong balita
Si Jesus mibaktas ug gatosan ka kilometro sa abogon nga mga dalan aron isangyaw ang maayong balita sa mas daghang tawo kutob sa iyang mahimo. Basaha ang Lucas 8:1, ug dayon hisgoti kini nga mga pangutana:
-
Kadto lang bang miduol kang Jesus ang iyang gisangyawan?
-
Unsang paningkamot ang gihimo ni Jesus aron iyang makaplagan ang mga tawo?
Gitagna sa Diyos nga isangyaw sa Mesiyas ang maayong balita. Basaha ang Isaias 61:1, 2, ug dayon hisgoti kini nga mga pangutana:
-
Giunsa pagtuman ni Jesus kining tagnaa?
-
Sa imong hunahuna, kinahanglan bang madunggan sa mga tawo karon kining maayong balita?
5. Si Jesus nagtudlo ug importanteng mga leksiyon
Gawas sa pagsangyaw sa maayong balita bahin sa Gingharian sa Diyos, si Jesus nagtudlo pod ug praktikal nga mga leksiyon. Matikdi ang pipila ka pananglitan gikan sa iyang Wali sa Bukid. Basaha ang Mateo 6:14, 34 ug 7:12, ug dayon hisgoti kini nga mga pangutana:
-
Unsang praktikal nga tambag ang gihatag ni Jesus niini nga mga teksto?
-
Para nimo, mapuslanon pa ba ni nga tambag karon?
6. Si Jesus naghimog mga milagro
Gihatagan ni Jehova si Jesus ug gahom sa paghimog daghang milagro. Ingong pananglitan, basaha ang Marcos 5:25-34 o i-play ang VIDEO. Dayon hisgoti ang mosunod nga mga pangutana:
-
Sa video, sa unsa kombinsido ang babaye nga nasakit?
-
Unsay ganahan nimo niini nga milagro?
Basaha ang Juan 5:36, ug dayon hisgoti kini nga pangutana:
-
Ang mga milagro ni Jesus ‘nagpamatuod’ sa unsa bahin niya?
Nahibalo ba ka?
Kadaghanan sa atong nahibaloan bahin kang Jesus atong nakat-onan gikan sa upat ka basahon sa Bibliya nga gitawag ug mga Ebanghelyo—ang Mateo, Marcos, Lucas, ug Juan. Ang matag magsusulat sa Ebanghelyo naay gihisgotang laing detalye bahin kang Jesus. Kon atong basahon ang upat ka Ebanghelyo, mainteres gyod ta sa iyang kinabuhi.
-
MATEO
Siyay nagsulat sa unang Ebanghelyo. Gipasiugda sa iyang basahon ang mga pagtulon-an ni Jesus, ilabina ang gitudlo ni Jesus bahin sa Gingharian sa Diyos.
-
MARCOS
Siyay nagsulat sa kinamub-ang Ebanghelyo. Ang iyang basahon punog makapainteres kaayo nga mga hitabo.
-
LUCAS
Iyang gipasiugda kon unsa ka importante kang Jesus ang pag-ampo ug kon giunsa pagtratar ni Jesus ang mga babaye.
-
JUAN
Siya daghan ug gipadayag bahin sa personalidad ni Jesus pinaagi sa paghisgot sa mga gisulti ni Jesus sa iyang suod nga mga higala ug sa uban pa.
ANG UBAN MOINGON: “Maayo nga tawo si Jesus, pero dili siya ang Mesiyas.”
-
Unsay imong hunahuna?
SUMARYO
Si Jesus nagsangyaw bahin sa Gingharian sa Diyos, naghimog mga milagro, ug iyang gisunod si Jehova sa tanang panahon.
Review
-
Unsa ang pinakaimportanteng buluhaton ni Jesus sa dinhi siya sa yuta?
-
Ang mga milagro ni Jesus nagpamatuod sa unsa?
-
Unsang praktikal nga mga leksiyon ang gitudlo ni Jesus?
SUSIHA
Bahin sa unsa ang sagad hisgotan ni Jesus?
“Gingharian sa Diyos—Nganong Importante Kini Kang Jesus?” (Ang Bantayanang Torre, Oktubre 1, 2014)
Sayra kon nganong makasalig ta nga nahitabo gyod ang mga milagro ni Jesus.
“Ang mga Milagro ni Jesus—Unsay Imong Makat-onan?” (Ang Bantayanang Torre, Hulyo 15, 2004)
Basaha kon sa unsang paagi nausab ang kinabuhi sa usa ka tawo dihang iyang nakat-onan ang gihimong sakripisyo ni Jesus.
“Kaugalingon ray Akong Gihunahuna” (Ang Bantayanang Torre, Oktubre 1, 2014)
Tan-awa ang importanteng mga butang nga gihimo ni Jesus nga gilista sumala sa pagkasunodsunod niini.
a Ang Leksiyon 31-33 maghisgot ug dugang detalye bahin sa Gingharian sa Diyos.
Basin Ganahan Pod Ka
KOMON NGA MGA PANGUTANA
Unsa ang Bible Study Program nga Gina-offer sa mga Saksi ni Jehova?
Sa libreng interactive program nga gina-offer sa mga Saksi ni Jehova, puwede nimong gamiton ang bisan unsang bersiyon sa Bibliya. Puwede nimong paapilon ang tibuok pamilya o mga amigo o amiga.
