LESEN 16
Met Jesus A Féri Atun A Nóm Fénúfan?
Chómmóng aramas ra ekieki pwe Jesus a chúen emén ménúkol are emén soufós mi tipachem. Nge mi wor met sia pwal tongeni káé seni ach etittina pwóróusen manawan atun a nóm fénúfan? Sipwe káé lón ei lesen ekkóch mettóch mi kon aúchea a féri me ifa usun ra tongeni álisuk.
1. Ifa ewe angang mi kon aúchea Jesus a féri?
Ewe angang mi kon aúchea Jesus a féri, ina an “afalafala ewe Pworausen Manau usun Mwün Kot.” (Álleani Lukas 4:43.) A afalafalafeili ewe pwóróus allim pwe Kot epwe fératá eú mwú, are nemenem epwe pwákini meinisin án aramas kewe osukosuk. a Ren úkúkún úlúngát esopw ier, Jesus a fókkun achocho le esile ngeni aramas ena pwóróus mi apéchékkúla letiper.—Mateus 9:35.
2. Met popun Jesus a féri ekkewe manaman?
Ewe Paipel a fós usun chómmóng “tufich me manaman me asisil Kot a föri ren Jesus.” (Föför 2:22) Ren án Kot manaman, Jesus a tufichin amasésétiw eú watteen mélúmél, amwéngééni fitengeréú aramas, echikara mi samau, me pwal mwo nge amanawasefáli ekkewe mi máló. (Mateus 8:23-27; 14:15-21; Markus 6:56; Lukas 7:11-17) Ekkewe manaman Jesus a féri, ra affata pwe i a tiitiito me ren Kot. Ra pwal pwári pwe a wor án Jiowa manaman le pwákini meinisin ach kewe osukosuk.
3. Met sa tongeni káé seni minne Jesus a féri lón manawan?
Jesus a álleasochisi Jiowa fansoun meinisin. (Álleani Johannes 8:29.) A féri meinisin met Seman we a ereni an epwe féri. A féri ena lón ánein manawan wóón fénúfan inaamwo ika chómmóng ra sótun eppeti. A pwári pwe a tufich án aramas repwe angang ngeni Kot, pwal mwo nge lón fansoun weires. Ina minne, Jesus a ‘likiti ngenikich eu lenien apirü, pwe sipwe tapwela mürin lon ipwan.’—1 Petrus 2:21.
KÚTTAFICHI
Ppii ifa usun Jesus a afalafala ewe kapas allim me féri ekkewe manaman.
4. Jesus a afalafala ewe kapas allim
Jesus a fetál ren úkúkún fitepúkú mwail wóón ekkewe al mi súsú, me afalafala ewe kapas allim ngeni aramas úkúkún an tufich. Álleani Lukas 8:1, me mwirin pwóróusfengen wóón ekkeei kapas eis:
-
Itá Jesus a chék afalafal ngeni chókkewe mi chuto pwe repwe aúseling ngeni?
-
Met Jesus a achocho le féri pwe epwe tongeni afalafal ngeni aramas?
Kot a oesini pwe ewe Messaia epwe afalafala ewe kapas allim. Álleani Aisea 61:1, 2, me mwirin pwóróusfengen wóón ekkeei kapas eis:
-
Ifa usun Jesus a apwénúetá ena oesini?
-
Óm ekiek nge a pwal lamot án aramas lón ei fansoun repwe rong ena kapas allim?
5. Jesus a áiti ngeni aramas lesen mi álilliséch
Me lúkún án Jesus afalafala ewe kapas allim usun ewe Mwúún Kot, a pwal áiti ngeni aramas ekkewe lesen mi álilliséch. A fós usun ekkóch me leir lón an we Afalafal Wóón ewe Chuuk. Álleani Mateus 6:14, 34 me 7:12, me mwirin pwóróusfengen wóón ekkeei kapas eis:
-
Ikkefa ekkewe kapasen emmwen Jesus a eáni lón ekkeei wokisin?
-
Óm ekiek nge a chúen álilliséch ngeni aramas lón ei fansoun?
6. Jesus a féri manaman
Jiowa a atufichi Jesus an epwe féri chómmóng manaman. Ren óm kopwe kúna eú me leir, álleani Markus 5:25-34 are fichi ei VIDEO. Mwirin pwóróusfengen wóón ekkeei kapas eis.
-
Lón ei video, met ei fefin mi samau a fókkun lúkú?
-
Pwata ka ingeló ren ei manaman?
Álleani Johannes 5:36, me mwirin pwóróusfengen wóón ei kapas eis:
-
Met ekkewe manaman Jesus a féri “ra pwärätä” are, ánneta usun i?
En mi silei?
Lape ngeni ekkewe pwóróus sia silei usun Jesus, ra mak lón ekkewe rúáánú puk lón Paipel mi iteni Puken Kapas Allim, iter Mateus, Markus, Lukas, me Johannes. Emén me emén ekkena chón mak, ra apachaalong sókkopaten tichikin pwóróusen Jesus lón makkeier kana. Atun sia álleani ekkena puk, sia tongeni anchangei minne a fis lón manawen Jesus.
-
MATEUS
a akkomw makkeei makkeian we Puken Kapas Allim. A menlapei án Jesus angangen asukul, nge ákkáeúin minne a eáni asukul usun ewe Mwúún Kot.
-
MARKUS
a makkeei ewe Puken Kapas Allim mi mwoch seniir meinisin. A apwóróusa usun ekkewe pwóróus mi ámmeseik.
-
LUKAS
a pwári úkúkún aúchean iótek me ren Jesus, me a áweweei féfféréchún Jesus ngeni fefin.
-
JOHANNES
a áiti ngenikich chómmóng mettóch Jesus a fós usur ngeni chiechian kewe me pwal ekkóch aramas. Ena, a álisikich le silei met sókkun aramas Jesus.
EKKÓCH RA ERÁ: “Jesus a feito pwe epwe fangóló manawan fán iten aramas.”
-
Óm ekiek nge ina chék ewe popun Jesus a feito fénúfan?
MENLAPAN
Jesus a afalafala pwóróusen ewe Mwúún Kot, féri manaman, me álleasochisi Jiowa fansoun meinisin.
Enniwili
-
Ifa ewe angang mi kon aúchea Jesus a féri atun a nóm fénúfan?
-
Met ekkewe manaman Jesus a féri ra ánnetatá?
-
Ikkefa ekkewe lesen mi álilliséch Jesus a áiti ngeni aramas?
PWAL EKKÓCH PWÓRÓUS
Ifa ewe pwóróus Jesus a kon alapa an fós usun?
“Án Kot we Mwú—Ifa Aúchean me ren Jesus?” (Ewe Leenien Mas, October 1, 2014)
Ppii ika pwata sia tongeni lúkú pwe mi wesewesen fis ekkewe manaman Jesus a fériir.
“An Jises Kewe Manaman Met Kopwe Kaeo Seniir?” (Ewe Leenien Mas, November 1, 2004)
Álleani ifa usun án Jesus leenien áppirú ren an pennúkúóló pwisin mochenin a álisi emén mwán.
“My Life Was All About Me” (The Watchtower, October 1, 2014)
Ppii ekkewe mettóch mi aúchea Jesus a fériir mi tettelitiw lón en me tettelin atun an fis.
“Menlapen Kinikinin Manawen Jesus Wóón Fénúfan” (Minen Álillis fán Iten Káéén Paipel, 4-B)
a Lesen 31 ngeni 33 repwe áiti ngenikich pwal ekkóch pwóróus usun ewe Mwúún Kot.
