LONGESO 16
Yika Yesu Alingile Muze Apwile Hano Hashi?
Atu anji kananyingika Yesu, alioze amwe kananyingika wika yize yalingiwile kuli iye muze te uchili mwana-kemba, akwo kanamunyingika ngwe umwe profeta walongoloka, eka kananyingika wika kufwa chenyi. Ha longeso lino, mutulilongesa yuma yimwe yilemu yize Yesu alingile ni chize yuma yacho muyihasa kukukwasa.
1. Mulimo uka ulemu uze Yesu alingile?
Mulimo ulemu uze Yesu alingile wapwile “kwambujola sango lipema lia wanangana wa Zambi.” (Tanga Luka 4:43.) Iye kambujolwele sango lipema ngwenyi Zambi te makolesa umwe wanangana hanji ngwetu unguvulu uze muukahwisa lamba lieswe lia atu. a Yesu kambujolwele sango jino ja utakamiso ha miaka yitatu ni chipinji.—Mateu 9:35.
2. Mumu liaka Yesu apwile ni kulinga yikomokeso?
Mbimbiliya yakuhanjika ha yuma yinji ngwe, “yipupu ni yipekesa ni yilayi yize alingile Zambi ku kwoko lia [Yesu].” (Yilinga 2:22) Zambi yahana ndundo kuli Yesu ja kuhasa kuholesa kangonga, kulisa tununu twa atu, kuuka mieji ni kuhindwisa afu. (Mateu 8:23-27; 14:15-21; Marku 6:56; Luka 7:11-17) Yikomokeso yize Yesu alingile yasolwele pundu ngwo Zambi mwe wamutumine. Chikwo nawa, yikomokeso yacho yakusolola ngwo Yehova kakwete ndundo jakuhwisa lamba lieswe hano hashi.
3. Yika mutuhasa kulilongesa ha chize mwono wa Yesu wapwile?
Yesu kononokenene Yehova ku mwono wenyi weswe. (Tanga Yoano 8:29.) Yesu kalingile yuma yeswe yize Tato amutumine. Kachilingile ku mwono wenyi weswe hano hashi, chipwe muze apwile ni kumuhungumiona. Iye kasolwele ngwenyi atu mahasa kulingila Zambi chipwe muze yuma ku mwono wo muyikala. Hachino, Yesu yatuhichikila ‘cheseko, hanga tukakaule mu ngano jenyi.’—1 Petulu 2:21.
NYINGIKA NAWA
Tala chize Yesu ambulwile sango lipema ni kulinga yikomokeso.
4. Yesu kambujolwele sango lipema
Yesu kendele wenyi usuku-usuku mu matapalo a too ni fufuta hanga ambujole sango lipema kuli atu anji. Tanga Luka 8:1, mba nushimutwine yihula yino:
-
Shina Yesu kambujolwele wika kuli atu waze ayile kuli iye hanga amupanjike?
-
Tachi jika Yesu asele hanga awane atu?
Zambi kaliangile kwamba ngwenyi Mesaya te mambujola sango lipema. Tanga Izaia 61:1, 2, mba nushimutwine yihula yino:
-
Kuchi Yesu amanunwine uprofeto uno?
-
Ku nyonga lie, shina atu musono kanafupiwa kupanjika sango jino jipema?
5. Yesu kalongesele yuma yilemu
Kuchizako sango lipema hakutwala ku Wanangana wa Zambi, Yesu kalongesele malongeso akwo alemu. Tala yilweza yimwe yize yili ha Longeso lia ha Mulundu. Tanga Mateu 6:14, 34 ni 7:12, mba nushimutwine yihula yino:
-
Yiyulo yika yipema yize Yesu ahanyine ha versu jino?
-
Ku nyonga lie, shina yiyulo yino muyihasa kukwasa atu musono?
6. Yesu kalingile yikomokeso
Yehova kakwashile Yesu hanga alinge yikomokeso. Tala chimwe chilweza. Tanga Marku 5:25-34 hanji tala CHINEMA, mba nushimutwine yihula yinahateho.
-
Kulita ni chinema, shindakenyo yika pwo wacho apwile nayo?
-
Chuma chika wazanga chinji ha chikomokeso chino?
Tanga Yoano 5:36, mba nushimutwine chihula chino:
-
Yikomokeso yize Yesu alingile yika yakusolola hali iye?
Unachinyingika nyi?
Sango jinji jize tunanyingika hakutwala kuli Yesu, twakujiwana mu mikanda yiwana avuluka ngwo Evanjelu—Mateu, Marku, Luka ni Yoano. Hita mukwa-kusoneka, kasonekene yikuma yimwe yalisa hakutwala kuli Yesu. Kutanga mikanda yino chakutukwasa kunyingika yuma yinji yipema hakutwala ku mwono wa Yesu.
-
MATEU
kasonekene mukanda utangu wa Evanjelu. Mukanda wacho wakushindakenya ha malongeso a Yesu, chipi-chipi ha yize alongesele hakutwala ku Wanangana wa Zambi.
-
MARKU
kasonekene mukanda ukehe wa Evanjelu. Mukanda wacho unazala too ni sango jipema.
-
LUKA
kanasolola chize Yesu apwile ni kulemesa yilemba ni chize apwile nikumona mapwo.
-
YOANO
kanasolola yuma yinji yize Yesu ahanjikile ni masepa jenyi ni atu akwo nawa. Chino chakutukwasa kunyingika kanawa utu wa Yesu.
ATU AMWE KAKWAMBA NGWO: “Yesu kapwile mutu mupema, alioze iye hi Mesaya ko.”
-
Kuchi wakunyonga?
YIZE WALILONGESA
Yesu kambujolwele Wanangana wa Zambi, kalingile yikomokeso ni kwononokena Yehova ha yuma yeswe.
Kuhitulula
-
Mulimo uka ulemu uze Yesu apwile nawo hano hashi?
-
Yika yikomokeso yize Yesu alingile yakusolola hali iye?
-
Malongeso aka alemu waze Yesu alongesele?
HENGWOLA NAWA
Chikuma chika chize Yesu ahanjikile chinji?
“Wanangana wa Zambi—Yika Unalumbunuka Kuli Yesu?” (Kaposhi wa Kutalila 1 wa Outubro, 2014)
Tala mumu liaka tuli ni shindakenyo ngwetu chamwenemwene yikomokeso ya Yesu yalingiwile lume.
“Yilakenyo ya Yesu—Yika Muyihasa Kukulongesa?” (Kaposhi wa Kutalila 15 wa Julho, 2004)
Tala chize mwono wa umwe lunga walumukine muze alilongesele hakutwala ku chitapo cha Yesu.
“Yami Napwile ni Kunyonga Wika Hali Yami Mwene” (Kaposhi wa Kutalila 1 wa Outubro, 2014)
Tala yuma yize Yesu alingile mu mulimo wenyi wa kwambujola kulita ni chize yalingiwile.
a Malongeso 31-33 makalumbununa Wanangana wa Zambi mu yimako-yimako.
