LESON 16
Ki Zezi ti fer ler i ti lo later?
Bokou dimoun i mazin Zezi konman en pti baba san defans, en profet saz oubyen en zonm ki pe mor. Me eski nou kapab konn plis lo li par egzamin son lavi ler i ti lo later? Dan sa leson, nou pou vwar serten keksoz enportan ki Zezi ti fer e ki lefe sa i kapab annan lo nou.
1. Ki travay pli enportan Zezi ti fer?
Travay pli enportan ki Zezi ti fer ti “anons bon nouvel Rwayonm Bondye.” (Lir Lik 4:43.) I ti anons sa bon nouvel ki Bondye ti pou etabli en Rwayonm oubyen en gouvernman ki ti pou rezourd tou problenm limanite. a Pour trwa-z-an edmi, i ti depans tou son lafors pour anons sa zoli mesaz.—Matye 9:35.
2. Akoz Zezi ti fer mirak?
Labib i dir ki “atraver [Zezi,] Bondye ti fer bann mirak, bann keksoz merveye ek bann siny.” (Akt 2:22) Gras a sa pouvwar ki Bondye ti donn li, Zezi ti kapab annan kontrol lo letan, nouri en lafoul dimoun, geri bann malad e menm resisit bann ki’n mor. (Matye 8:23-27; 14:15-21; Mark 6:56; Lik 7:11-17) Sa bann mirak ki Zezi ti fer ti prouve ki Bondye ki ti’n anvoy Zezi. Sa bann mirak ti osi montre ki Zeova i annan sa pouvwar pour rezourd tou nou problenm.
3. Ki nou kapab aprann avek lafason ki Zezi ti viv?
Zezi ti obei Zeova dan tou sirkonstans. (Lir Zan 8:29.) Kantmenm i ti ganny opoze, Zezi ti fidelman fer sa ki son Papa ti demann li ziska son lanmor. I ti montre ki i posib pour nou servi Bondye, menm dan bann sirkonstans vreman difisil. Alor, Zezi in kit “en model pour ki [nou] swiv son lepa fidelman.”—1 Pyer 2:21.
AL PLI O PROFON
Vwar ki mannyer Zezi ti anons sa bon nouvel avek lezot e fer mirak.
4. Zezi ti anons sa bon nouvel avek lezot
Zezi ti mars bann gran zistans pour li anons sa bon nouvel avek otan dimoun ki ti kapab zwenn. Lir Lik 8:1 e apre reponn sa bann kestyon:
-
Eski Zezi ti anons sa bon nouvel zis avek bann dimoun ki ti rasanble pour ekout li?
-
Ki zefor Zezi ti fer pour rod dimoun?
Bondye ti predir ki Mesi ti pou anons sa bon nouvel avek lezot. Lir Izai 61:1, 2 e apre reponn sa bann kestyon:
-
Ki mannyer Zezi ti akonpli sa profesi?
-
Eski ou krwar dimoun ozordi i bezwen tann sa bon nouvel?
5. Zezi ti ansenny bann leson ki annan bokou valer
Apard ki anons sa bon nouvel, Zezi ti ansenny bann leson ki vreman kapab ed nou. Annou vwar enn de legzanp dan son Sermon ki i ti fer lo montanny. Lir Matye 6:14, 34 ek 7:12 e apre reponn sa bann kestyon:
-
Ki konsey itil Zezi ti donnen dan sa bann verse?
-
Eski ou krwar sa konsey i kapab ed dimoun ozordi?
6. Zezi ti fer bann mirak
Zeova ti donn Zezi pouvwar pour fer plizyer mirak. Annou vwar en legzanp. Lir Mark 5:25 a 34 oubyen zwe sa VIDEO. Apre, reponn sa bann kestyon.
-
Ki sa madanm malad dan sa video ti krwar?
-
Ki ou’n kontan avek sa mirak?
Lir Zan 5:36 e apre reponn sa kestyon:
-
Ki bann mirak Zezi ti prouve?
Eski ou ti konnen?
Laplipar keksoz ki nou konnen lo Zezi i sorti dan sa kat liv Labib ki apel Levanzil—Matye, Mark, Lik ek Zan. Sak ekriven Levanzil i mansyonn diferan keksoz lo Zezi. Sa i donn nou en zoli apersi lo lavi Zezi.
-
MATYE
ti ekri son Levanzil premye. I met lanfaz lo lansennyman Zezi, sirtou sa ki i ti ansennyen lo Rwayonm Bondye.
-
MARK
ti ekri sa Levanzil ki pli kourt. I koz konsernan en kantite levennman vreman eksitan.
-
LIK
i koz lo lenportans lapriyer dan lavi Zezi e ki mannyer i ti tret bann madanm.
-
ZAN
i fer nou konn bokou lo personnalite Zezi par rakont plizyer konversasyon ki Zezi ti fer avek son bann zanmi pros ek lezot.
SERTEN DIMOUN I DIR: “Zezi ti zis en bon dimoun, se tou.”
-
Ki ou panse?
REZIMEN
Zezi ti koz lo Rwayonm Bondye, fer bann mirak e obei Zeova dan tou sirkonstans.
Revizyon
-
Ki travay pli enportan Zezi ti fer ler i ti lo later?
-
Ki bann mirak Zezi ti prouve?
-
Ki leson Zezi ti ansennyen ki kapab ed nou?
FER PLIS RESERS
Ki size Zezi ti koz plis lo la?
“Rwayonm Bondye—Akoz i enportan pour Zezi?” (Latour Veyer Novanm–Desanm 2014)
Vwar akoz nou kapab krwar ki Zezi ti vreman fer sa bann mirak.
“The Miracles of Jesus—What Can You Learn?” (Latour Veyer 15 Zilyet 2004 an Angle)
Lir ki mannyer en msye ti sanz son lavi ler i ti aprann konman Zezi ti vreman enterese avek dimoun.
“Mon ti viv mannyer mon oule” (Latour Veyer Novanm–Desanm 2014)
Vwar bann keksoz enportan ki Zezi ti fer dan son minister dan lord ki sa ti arive.
“Bann levennman enportan dan lavi Zezi lo later” (En led pour etidye Parol Bondye, 4-A ziska 4-H)
a Leson 31 a 33 pou diskit lo Rwayonm Bondye pli an detay.
You May Also Like
BANN KESTYON KI DIMOUN I SOUVAN DEMANDE LO TEMWEN ZEOVA
Ki sa letid Labib ki Temwen Zeova i ofer?
Ou kapab servi nenport tradiksyon Labib avek sa progranm Labib enteraktif gratwit ki Temwen Zeova i ofer. Santi ou alez pour envit ou fanmir antye oubyen nenport zanmi pour asiste ou letid.
