YI 16

¿Kʼãrẽta osi Jesu nama egorodebasidera?

Bed’eabira

Ẽbẽra mejãchaʉba Jesu jẽda kĩrãbebʉrʉdera krĩchapanʉ wũãwũã zaketa, propeta buru biata, maʉ̃ta neẽ bʉrʉ, iyi sãwũã zʉbʉria beidata. Mamina, Jesuba nama egorode odata ũdukʼawuara, ¿iyita ũdukʼawuai ẽka? Naʉ̃ne kʼawuadayi kʼãrẽta osita Jesu nama egorode zeside akʉza maʉ̃ba bʉra sãwũã kʼarebaseabʉta.

1. ¿Jesubara kʼãrẽta audre osi?

Jesubara audre jaradiabasi «bedʼea bia Daizeze Nokʼo ʉ̃rʉ» (akʉra Lucas 4:43). Daizeze Nokʼo ʉ̃rʉ ẽbẽrarã jõmaʉ̃ʼa jaradiasi akʉza jarasi naʉ̃ nokʼo bʉrʉ ẽbẽrarã bedʼea zroma erbʉra jõbita. a Jesubara poaga ẽzadra ũbeabayeda maʉ̃ bedʼea biara ẽbẽrarã jõmaʉ̃ʼa jaradiasi (Mateo 9:35).

2. ¿Kʼãrẽta ũdubibʉ Jesuba miõba oka oũdubidadebara?

Daizeze Bedʼeabara jarabʉ «Daizezebara ũdudakata bio osia iyi deba [Jesu]» (Hechos 2:22). Jesubara Daizeze zareadeba pʉ̃adrʉ mejãchabʉta taʉbisi, ẽbẽrata mejãcha nekobisi, adewara kayaberata bebisi akʉza beidata jẽda piradrʉbisi (Mateo 8:23-27; 14:15-21; Marcos 6:56; Lucas 7:11-17). Jesuba miõba oka odaba ũdubisi Daizezeba zokʼasita, adewara Jeowabʉrʉ dayirã bedʼea zroma erbʉra jõma ara oseabʉta.

3. ¿Dayirãbara kʼãrẽta kʼawuaseapanʉ Jesuba odadebara?

Jesubara ewari jõmaʉ̃nẽ ũrĩbasi Jeowa bedʼeara (akura Juan 8:29). Jesura kʼẽrẽpabasi yi Zezeʉ̃me iyi beiyeda akʉza ũrĩbasi yi Zezeba jõma zokʼabʉra, wuabema ẽbẽraba kãga ẽ basimina. Mawũã ũdubisi ẽbẽra jõmaʉ̃ba oseabʉta Daizezeba zokʼabʉra bedʼea zroma erpanʉmina. Jesubara «yizata amaesi» yi kʼaidubemaraba «iyide kĩrãkʼa odamarẽã» (1 Pedro 2:21).

AUDRE BIʼIA KʼAWUADADRɄ

Kʼawuadayi sãwũã Jesuba bedʼea bia ẽbẽra jõmaʉ̃ʼa jaradiadata akʉza iya miõba oka odata.

4. Jesubara bedʼea biata jõmaʉ̃ʼa jarakasi

Jesura jĩgara wãsi jĩrʉne Daizeze Bedʼea ẽbẽrarãʼa iya jaradiaseabʉa jaradiaita. Akʉra Lucas 8:1, mõbe naʉ̃ta panʉidua:

¿Jesubara jaradiabasika ẽbẽrarã iyi orrapanʉ awabʉrʉ?
¿Kʼãrẽta oibarabasi Jesuba ẽbẽrarã ũduita?

Daizezebara jarasi Dayirã ẽdrʉbibaribara jarakaita bedʼea biara. Akʉra Isaías 61:1, 2, mõbe naʉ̃ta panʉidua:

¿Sãwũã aribaesi Jesubara naʉ̃ propesiara?
Bʉmara, ¿idi ewadebida ẽbẽrarãbara naʉ̃ bedʼea biata ũrĩta nesidapanʉka?

5. Jesubara ũrãgʼa biata jaradiasi

Jesuba Daizeze Nokʼo ʉ̃rʉ jaradiabʉ, awuara jaradiasi ũrãgʼa biata. Akʉra ʉ̃kʉrʉ ũrãgʼa bia Jesuba Katumane Bedʼea Bia jaradade. Akʉra Mateo 6:14, 34 akʉza 7:12, mõbe naʉ̃ta panʉidua:

¿Kʼãrẽ ũrãgʼa biata jaradiasi Jesubara naʉ̃ra testodera?
Bʉmara, ¿naʉ̃ ũrãgʼabara idi ewadera ẽbẽrarãra kʼarebaika?

6. Jesubara miõba okata oũdubisi

Jeowabara Jesuʼa zareata diasi miõba okata oũdubimarẽã. Maʉ̃ ʉ̃rʉ kʼawuaita, akʉra Marcos 5:25-34, mawũã ẽ bʉrʉ akʉra BIDEOTA. Mõbe naʉ̃ta panʉidua:

BIDEO: Wẽrã aba kayabʉta bebisi (5:10)

Bideodera, ¿wẽrãbara kʼãrẽta kʼawuabasi?
Naʉ̃ bideode Jesuba miõba oka ũdubidadera, ¿bʉara saʉ̃ta audre kãgabʉ?

Akʉra Juan 5:36, mõbe naʉ̃ta panʉidua:

¿Kʼãrẽta ũdubibʉ Jesuba miõba oka oũdubidadebara?

¿Kʼawuabasika?

Jõma dayirãba Jesu ʉ̃rʉ kʼawuabʉra bʉ Evangelios librorane. Libro Evangelios kimare bʉdapeadarabara (Mateo, Marcos, Lucas akʉza Juan) Jesu ʉ̃rʉ jõma aripe bʉsida. Ãya jõma bʉdadebara kʼarebabʉ dayirãba bia ũrĩta Jesu ʉ̃rʉ akʉza maʉ̃ra librodera yiya jara ẽ.

MATEO

naʉ̃bara bʉsi nããbema libro Evangeliosdebemata. Naʉ̃ libroba bedʼeabʉ Jesuba jaradiada ʉ̃rʉ akʉza Jesuba kʼãrẽta jarasita Daizeze Nokʼo ʉ̃rʉ.
MARCOS

naʉ̃ba bʉsi libro Evangeliosdebema yi audre wiñabʉta. Naʉ̃ librobara erbʉ nebʉra dayi soidu jʉ̃ẽbʉta.
LUCAS

naʉ̃ba ũdubibʉ kʼãrẽa yibiata dayirã yiwidʼira akʉza Jesuba wẽrãra sãwũã bia edadata.
JUAN

audre jarasi Jesu sãwũãchuadata, iyi librodera jarabʉ baera Jesura bedʼeadata yi neũdukʼawuarabawara akʉza awuru ẽbẽrabawara.