GWERS 16
Beth a Wnaeth Iesu ar y Ddaear?
Mae llawer o bobl yn meddwl am Iesu fel baban mewn preseb, fel dyn doeth, neu fel dyn ar fin marw. Ond a allwn ni ddysgu mwy amdano drwy edrych ar ei fywyd ar y ddaear? Yn y wers hon, byddwn ni’n ystyried rhai o’r pethau pwysicaf a wnaeth Iesu, a sut maen nhw’n effeithio arnoch chi.
1. Beth oedd gwaith pwysicaf Iesu?
Gwaith pwysicaf Iesu oedd ‘cyhoeddi’r newyddion da am Deyrnas Dduw.’ (Darllenwch Luc 4:43.) Cyhoeddodd ef y newyddion da y bydd Duw yn sefydlu Teyrnas, neu lywodraeth, a fydd yn datrys holl broblemau’r ddynoliaeth. a Am dair blynedd a hanner, roedd Iesu yn gweithio yn ddiflino i gyhoeddi’r neges galonogol hon.—Mathew 9:35.
2. Beth oedd pwrpas gwyrthiau Iesu?
Mae’r Beibl yn disgrifio llawer o “weithredoedd nerthol, rhyfeddodau, ac arwyddion a wnaeth Duw” drwy Iesu. (Actau 2:22) Yn nerth Duw, roedd Iesu yn gallu rheoli’r tywydd, bwydo miloedd, iacháu pobl sâl, a hyd yn oed atgyfodi’r meirw. (Mathew 8:23-27; 14:15-21; Marc 6:56; Luc 7:11-17) Roedd gwyrthiau Iesu yn profi mai Duw oedd wedi ei anfon. Dangoson nhw hefyd fod y gallu gan Jehofa i ddatrys pob un o’n problemau.
3. Beth gallwn ni ei ddysgu o’r ffordd roedd Iesu yn byw?
Roedd Iesu bob amser yn ufudd i Jehofa. (Darllenwch Ioan 8:29.) Er bod rhai yn ei wrthwynebu, roedd Iesu yn gwneud popeth a ofynnodd ei Dad, hyd ddiwedd ei fywyd ar y ddaear. Profodd ei bod hi’n bosib i fodau dynol wasanaethu Duw, hyd yn oed mewn amgylchiadau anodd. Gadawodd Iesu “esiampl [inni] ddilyn ôl ei draed yn agos.”—1 Pedr 2:21.
CLODDIO’N DDYFNACH
Ystyriwch sut roedd Iesu yn cyhoeddi’r newyddion da ac yn gwneud gwyrthiau.
4. Cyhoeddodd Iesu newyddion da
Cerddodd Iesu gannoedd o filltiroedd ar hyd ffyrdd llychlyd i rannu’r newyddion da â chymaint o bobl â phosib. Darllenwch Luc 8:1, ac yna trafodwch y cwestiynau hyn:
-
A oedd Iesu yn pregethu dim ond i’r bobl aeth ato ef i wrando?
-
Pa ymdrech a wnaeth Iesu i siarad â phobl?
Rhagfynegodd Duw y byddai’r Meseia yn cyhoeddi newyddion da. Darllenwch Eseia 61:1, 2, ac yna trafodwch y cwestiynau hyn:
-
Sut cyflawnodd Iesu’r broffwydoliaeth hon?
-
Ydych chi’n meddwl bod pobl angen clywed y newyddion da heddiw?
5. Dysgodd Iesu wersi pwysig
Yn ogystal â chyhoeddi’r newyddion da am Deyrnas Dduw, rhoddodd Iesu wersi ymarferol. Ystyriwch esiamplau o’i anerchiad enwog, y Bregeth ar y Mynydd. Darllenwch Mathew 6:14, 34 a 7:12, ac yna trafodwch y cwestiynau hyn:
-
Pa gyngor ymarferol a roddodd Iesu yn yr adnodau hyn?
-
Ydych chi’n meddwl bod y cyngor hwn yn dal yn ddefnyddiol?
6. Roedd Iesu yn gwneud gwyrthiau
Rhoddodd Jehofa nerth i Iesu i wneud llawer o wyrthiau. I weld un enghraifft, darllenwch Marc 5:25-34 neu gwyliwch y FIDEO. Yna trafodwch y cwestiynau sy’n dilyn.
-
Yn y fideo, beth oedd y ddynes sâl yn ei gredu am Iesu?
-
Beth sy’n eich taro chi am y wyrth hon?
Darllenwch Ioan 5:36, ac yna trafodwch y cwestiwn hwn:
-
Beth roedd gwyrthiau Iesu yn ei brofi amdano?
Oeddech chi’n gwybod?
Mae’r rhan fwyaf o’n gwybodaeth am Iesu yn dod o’r Efengylau—llyfrau Mathew, Marc, Luc, ac Ioan yn y Beibl. Roedd ysgrifenwyr yr Efengylau i gyd yn cynnwys manylion gwahanol am Iesu. At ei gilydd, mae’r manylion hyn yn creu darlun o’i fywyd sy’n hynod o ddiddorol.
-
MATHEW
oedd y cyntaf i ysgrifennu ei Efengyl. Mae’r pwyslais ar ddysgeidiaeth Iesu, yn enwedig ei ddysgeidiaeth am Deyrnas Dduw.
-
MARC
a ysgrifennodd yr Efengyl fyrraf. Mae’r hanes yn llawn digwyddiadau ac yn symud yn gyflym.
-
LUC
sy’n rhoi sylw arbennig i weddi a’r ffordd roedd Iesu yn trin menywod.
-
IOAN
sy’n datgelu mwy am bersonoliaeth Iesu drwy gynnwys llawer o’r sgyrsiau rhwng Iesu, ei ffrindiau agos, ac eraill.
BYDD RHAI YN DWEUD: “Dyn da oedd Iesu, ond dyna i gyd.”
-
Beth rydych chi’n ei feddwl?
CRYNODEB
Roedd Iesu yn pregethu am Deyrnas Dduw, yn gwneud gwyrthiau, ac yn ufuddhau i Jehofa bob amser.
Adolygu
-
Beth oedd gwaith pwysicaf Iesu ar y ddaear?
-
Beth mae gwyrthiau Iesu yn ei brofi?
-
Pa wersi ymarferol a roddodd Iesu?
DARGANFOD MWY
Pa bwnc roedd Iesu yn ei drafod fwyaf?
“Teyrnas Dduw—Pam Mae’n Bwysig i Iesu” (Y Tŵr Gwylio, Hydref 1, 2014)
Ystyriwch pam gallwn gredu bod gwyrthiau Iesu wedi digwydd.
“Gwyrthiau Iesu—Beth Gallwch Chi ei Ddysgu?” (Y Tŵr Gwylio, Gorffennaf 15, 2004)
Darllenwch am y ffordd newidiodd bywyd un dyn ar ôl iddo weld faint roedd Iesu yn caru pobl eraill.
“O’n I’n Meddwl am Neb Arall Ond y Fi” (Y Tŵr Gwylio, Hydref 1, 2014)
Gwelwch brif ddigwyddiadau gweinidogaeth Iesu yn eu trefn gronolegol.
“Prif Ddigwyddiadau ym Mywyd Daearol Iesu” (Cymorth i Astudio Gair Duw, rhan 4)
a Cawn fwy o fanylion am Deyrnas Dduw yng ngwersi 31-33.
Efallai Byddwch Hefyd yn Hoffi
CWESTIYNAU CYFFREDIN
Beth Yw’r Cwrs am y Beibl Mae Tystion Jehofa yn Ei Gynnig?
Gallwch ddefnyddio unrhyw gyfieithiad o’r Beibl y dymunwch i gymryd rhan yng nghwrs rhyngweithiol Tystion Jehofa am y Beibl. Mae croeso ichi wahodd eich teulu neu’ch ffrindiau.
