SHIRONGWA 16

Nke aya rughanine Jesus palivhu?

PLAY

Opo vantu vavangi va vhurukanga Jesus kumughayara ashi mukeke, ndi muporofete ndi muntu vana pampara. Kuvhura ngoli tu kushongere ko vyavingi pakukonakona liparu lyendi lyapalivhu ndi? Mushirongwa shino, ngatu ka kushonga vininke vimwe vyamulyo a ya rughanine Jesus ntani omo vikuvatera muliparu lyoye.

1. Shirughana munke sha kaliro shamulyo unene shaJesus?

Shirughana shendi shamulyo po kwa kalire “kuyuvhita mbudi yayiwa yaUhompa waKarunga.” (Varura Lukas 4:43.) Ghuye ka yuvhitangashi Karunga nga tura po uhompa ndi lipangero olyo ngali ya koshonono maudito naghantje ghavantu. a Jesus kwa rughanine unene yuvhitangashi mbudi yayiwa yaUhompa ure wamwaka ntatu naukahe.—Matheus 9:35.

2. Morwanke Jesus ka rughanenanga vitetu?

Bibeli kwa shingonona ‘virughana vyankondo vyavitetu ovyo Karunga a rughanine kupitira mwaJesus.’ (Virughana 2:22) Karunga kwa tapire nkondo kwaJesus dakuvhura kupangera ukarompepo nakukutika mbunga davantu nakuvaverura ntani kurambwita vafe kuufe. (Matheus 8:23-27; 14:15-21; Markus 6:56; Lukas 7:11-17) Vitetu karughananga Jesus kwa neghedire nawa-nawa ashi Karunga a mu tumino. Ntani nka kwa neghedire ashi Jehova a kara nankondo dakughupapo maudito ghetu naghantje.

3. Nke tukushongera ko kuliparu lyaJesus palivhu?

Jesus ka limburukanga Jehova mwanavintje. (Varura Johannes 8:29.) Mpiri mumaudito, Jesus a rughanine naulimburukwi ovyo va mu tantilire Vashe dogoro kumfa dendi. Jesus a neghedire ashi vantu kuvhura kurughanena Karunga mpiri mumaukaro ghaudito. Mukonda oyo, Jesus atu “shuvilire shihonenito tukwame nawa-nawa ntambo dendi.”—1 Petrus 2:21.

TEDA KO

Konakona omo Jesus ka yuvitanga mbudi yayiwa nakurughana vitetu.

4. Jesus a yuvhitire mbudi yayiwa

Jesus kayendanga parupadi kilomita dadingi a yuvitire vantu vavangi mbudi yayiwa. Varura Lukas 8:1 makura timwitirenu mapuro ghano:

Ngoli Jesus ka yuvitiranga tupu vantu ovo ka va yapongango va mu tegherere ndi?
Nke ka rughananga Jesus mukuwana vantu?

Karunga kwa pumbire ashi Mesias nga yuvhita mbudi yayiwa. Varura Jesaja 61:1, 2 makura timwitirenu mapuro ghano:

Weni Jesus a tikitire mo uporofete uno?
Weni una kughayara, hepero vantu va yuvhe mbudi yino yayiwa ndi?

5. Jesus a shongire virongwa vyamulyo

Kughupa ko tupu kuyuvita mbudi yayiwa yaUhompa waKarunga, Jesus a tapire nka mapukururo ghakuvatera muntu muliparu. Kenga vihonenito vimwe vyaLishongo lyendi lyapaNdundu olyo lya yiviko. Varura Matheus 6:14, 34 ntani 7:12 makura timwitirenu mapuro ghano:

Mapukururo munke ghamuliparu a tapire Jesus muvelise odo?
Mapukururo ogho kuvhura shimpe atu vatere mumayuva ghetu ndi?

6. Jesus a rughanine vitetu

Jehova kwa tapire nkondo kwaJesus a rughane vitetu vyavingi. Mukumona shihonenito shimwe, varura Markus 5:25-34 ndi kengera VIDIYO. Makura timwitirenu mapuro ghano.

VIDIYO: Mukadi wakuvera vana mu verura (5:10)

Muvidiyo, lipuliro munke a kalire nalyo mukadi wakuvera?
Nke una hafere kuhamena shitetu shino?

Varura Johannes 5:36, makura timwitirenu lipuro lino:

“Umbangi” munke vya tapire vitetu vyaJesus kumuhamena?

Maukenu nka ghamweya

Shingi shavininke twa yiva kuhamena Jesus kuviwana mumbapira ne damuBibeli va twenyanga ashi Mavangeli: Matheus, Markus, Lukas ntani Johannes. Kehe mutjangi waLivangeli kwa tjangire maukenu ghakukushuvashuva kuhamena Jesus. Maukenu ogho naghantje kutuvatera tu yive kuhamena liparu lyendi.

MATHEUS

kwa tjangire Livangeli lyakuhova. Ghuye kwa demenine kumashongo ghaJesus unene po kuhamena Uhompa waKarunga.
MARKUS

kwa tjangire Livangeli lyalifupi po. Mwamo kwa karo mo vishorokwa vyavingi.
LUKAS

kwa tjangire omo Jesus a monine mulyo wandapero ntani nkedi yayiwa omo Jesus ka tekuranga vakadi.
JOHANNES

kwa tjangire kuhamena ndjoghera dakukushuvashuva daJesus navaholi vendi ntani vantu vapeke, odo da shororo nkedi dendi.