TOLI 16

San Yesesi be kon du a goontapu?

PEE

Te omen sama yee a nen Yesesi, da den e pakisei wan beibi, wan polofeiti, efuso wan man di dede omen ondoo yali kaba. Ma i si enke u sa leli moo fu Yesesi te u luku fa a be e libi di a be de a goontapu? Aini a toli ya, wo luku wantu fu den moo pelensipali sani di Yesesi du, anga sowtu wini mi anga i sa fende fu den sani ya.

1. San na a moo pelensipali wooko di Yesesi be e du?

Di Yesesi be de a goontapu, a be e ‘paati a bun nyunsu fu a Kownukondee fu Gadu’. (Leisi Lukasi 4:43.) A be e leli sama taki Gadu o sete wan Kownukondee, efuso wan tiimakiti di o puu ala den polobelema fu libisama. a A dii anga afu yali Yesesi du a wooko ya.—Mateyesi 9:35.

2. Saide Yesesi be e du wonduu di a be de a goontapu?

Beibel taki di Yesesi be de a goontapu, ‘a omen wonduu Gadu be gi en a kaakiti fu du’ (Toli fu den apostel 2:22). A be gi en a kaakiti fu basi sani enke a winta anga a se. A be e gi dunsudunsu sama nyanyan. A be e deesi siki sama. Boiti dati, a be e weki dedesama tu (Mateyesi 8:23-27; 14:15-21; Malikisi 6:56; Lukasi 7:11-17). Den wonduu di Yesesi be e du be e soi kiin taki a Gadu be sende en kon a goontapu. Den be e soi tu taki Yehofa abi a makiti fu puu ala den polobelema anga den booko-ede fu libisama.

3. San u sa leli fu a fasi fa Yesesi be e du sani?

Na ala yuu Yesesi be e du san Yehofa taki. (Leisi Yohanisi 8:29.) Winsi fa omen sani be e miti en di a be de a goontapu ya, toku a aliki en Dda te enke en boo koti. A fasi fa Yesesi aliki en Dda e soi taki libisama poi dini Gadu winsi omen sani e miti den. Useefi sa meke moiti ‘fu waka a Yesesi baka’.—1 Peitilisi 2:21.

LUKU A TOLI YA MOO FINI

Kow luku fa Yesesi be e paati a bun nyunsu. Wo luku wantu fu den wonduu di a be e du tu.

4. Yesesi be e paati a bun nyunsu

A omen foto Yesesi be e go fu paati a bun nyunsu gi den sama di be wani aliki en. Leisi Lukasi 8:1, da i luku efii poi piki den akisi ya:

Yesesi be e wakiti fu sama kon neen fosi a be peleiki gi den?
Fa Yesesi be e miti son wan fu den sama di a be e peleiki gi?

Gadu be taki a fesi taki a Mesiyas be o paati bun nyunsu. Leisi Yesaya 61:1, 2, da i luku efii poi piki den akisi ya:

Fa Yesesi du a sani di sikiifi aini a tekisi ya?
I si enke a de fanowdu fu sama yee a bun nyunsu aini a ten ya?

5. Yesesi be e leli sama sani di be e tyai wini gi den

Yesesi á be e paati a bun nyunsu namo da a kaba, ma a be e leli sama sani tu di be e tyai wini gi den. Luku fa a be du a sani ya di a be holi a lezing na a mongo. Leisi Mateyesi 6:14, 34 anga 7:12, da i luku efii poi piki den akisi ya:

Sowtu pelensipali sani Yesesi be leli den sama aini den tekisi ya?
I si enke u sa wooko anga den sani ya aini a ten ya ete?

6. Yesesi be e du wonduu

Yehofa be gi Yesesi kaakiti fu du omen wonduu. Efii wani si wan fu den toli ya, da leisi Malikisi 5:25-34 efuso pee a FELON. Baka dati da i luku efii poi piki den akisi ya.

FELON: Yesesi deesi a uman di be siki (5:10)

San a uman aini a felon ya be e biibi?
Sai lobi fu a wonduu di Yesesi du ya?

Leisi Yohanisi 5:36, da i luku efii poi piki a akisi ya:

San den wonduu di Yesesi be e du e soi?

I be sabi a sani ya?

Den Beibel buku di e taki fu a libi fu Yesesi, a Mateyesi, Malikisi, Lukasi anga Yohanisi. Ibiiwan fu den buku ya abi toli aini di á de aini den taa dii buku. Neen meke efii wani fusutan a libi fu Yesesi moo bun, i mu leisi ala den fo buku ya.

MATEYESI

na a fosi buku di e taki fu a libi fu Yesesi. Ai taki moo fuu fu den sani di Yesesi be e leli sama fu a Kownukondee fu Gadu.
MALIKISI

na a moo satu buku di e taki fu a libi fu Yesesi. Winsi fa a satu, toku a lai simpan toli.
LUKASI

e taki fu a fasi fa Yesesi be e libi anga umansama, anga a gwenti di a be abi fu begi.
YOHANISI

e taki moo fu den manii fu Yesesi, anga den sani di a be e leli den mati fi en anga taa sama.